Yakobis
pung Surat
Tabea
1:1
1
1 Par orang-orang Yahudi yang su parcaya Yesusa yang tinggal talamburang di sagala tampa di dunya.Tabea! Beta ni Yakobis, Allah deng Tuhan Yesus Kristus pung jongos.
Jang bimbang waktu susa deng sangsara
1:2-8
2 Basudara samua, kalo dalang hidop kamong dapa sagala macang susa deng sangsara, kamong musti tarima akang deng hati paleng sanang. 3 Barang, kamong su tau kalo kamong parcaya Allah tarus waktu susa deng sangsara, kamong nanti labe tamba kuat par tahang hati dalang hal apa sa. 4 Kamong musti tahang hati tarus sampe kamong kaluar dari kamong pung susa deng sangsara tu. Kamong musti biking bagitu biar kamong pung parcaya par Yesus Kristus batumbu deng baakar kuat-kuat, deng biar kamong jadi orang yang pung hidop batul deng seng kurang apapa satu yang bae lai. 5 Mar, kalo dari kamong ada yang seng mangarti apa yang Allah mau dia musti biking waktu susa deng sangsara, dia musti minta Allah kasi tau akang par dia. Allah nanti kasi tau akang par dia bae-bae, tagal Antua paleng bae deng seng kasi sala orang yang minta tolong dari Antua. Jadi sapa sa yang minta tolong dari Antua, Antua nanti kasi tau apa yang dia musti biking. 6 Mar kalo dia minta dari Antua, dia musti batul-batul parcaya kalo Antua nanti tolong dia. Dia seng bole bimbang sadiki lai. Sapa sa yang bimbang, dia tu macang deng galombang di lautang yang anging tiop kasana-kamari. 7-8 Orang yang bimbang tu, dia pung hati tabage dua. Dia seng tau mau biking mana yang batul. Tagal itu, jang harap kalo dia nanti dapa apapa dari Tuhan.
Nasehat par orang kasiang deng orang kaya
1:9-11
9 Basudara orang kasiang yang parcaya Yesus e, kamong pung hati musti paleng sanang tarus biar kata kamong seng pung apapa. Barang, Allah anggap kamong tu orang yang panting par Antua. 10 La basudara orang kaya yang parcaya Yesus e, kamong pung hati jua musti paleng sanang lai tagal kamong mangarti kalo kamong pung harta yang banya tu seng pung arti apapa par Allah. Barang, kamong nanti mati sama deng bunga rumpu yang gugur. 11 Waktu matahari nai, akang pung panas padis tikang bunga rumpu tu la akang layu. Abis itu bunga tu gugur la su seng bagus lai. Bagitu lai deng orang kaya. Satu waktu jua dong nanti mati waktu dong ada sibuk urus dong pung usaha.
Allah seng parna coba-coba orang par biking apapa yang jahat
1:12-18
12 Basudara e, sapa yang tahang hati tarus waktu susa deng sangsara, dia tu paleng baruntung paskali. Barang, kalo dia bisa tahang hati tarus waktu susa deng sangsara, Allah nanti kasi par dia hadia yang Antua su janji par orang-orang yang batul-batul sayang Antua. Hadia tu, dia nanti hidop tarus-tarus deng Antua. 13 Kalo satu orang ada dapa coba par biking apapa yang jahat, dia seng bole bilang kalo itu Allah yang coba dia. Barang, Allah seng parna coba-coba orang. Antua jua seng parna bisa tagoda par biking apapa yang jahat. 14 Mar sapa sa yang tagoda par biking apapa yang jahat, itu tagal dia pung pikirang jahat sandiri yang garu-garu deng buju dia par biking akang. 15 La waktu dia biking akang, dia bardosa. La kalo dosa tu batumbu deng baakar tarus dalang dia pung hidop, dia nanti mati.
16 Basudara samua yang beta sayang, jang sangka kata Allah biking hal-hal yang jahat. 17 Barang, samua yang bae deng samua berkat yang katong dapa dalang hidop ni asal dari Allah Bapa. Antua yang biking matahari, bulang, deng bintang-bintang. Matahari, bulang, deng bintang-bintang tu baroba iko akang pung waktu par kasi tarang dunya. Mar Antua seng parna baroba. Antua tu bae tarus. 18 Antua pung mau sandiri par pili katong jadi Antua pung anana tagal katong parcaya Antua pung ajarang yang batul. Antua biking bagitu biar dari samua yang Antua su biking, katong jadi yang paleng panting.
Inga Allah pung ajarang la biking akang tarus
1:19-27
19 Basudara samua yang beta sayang, inga bae-bae apa yang beta mau bilang ni: Kalo ada orang bicara, kamong musti pasang talingang bae-bae. Jang paparipi par bicara deng jang capat par mara. 20 Tagal sapa yang ada mara, dia seng bisa biking apa yang batul iko Allah pung mau. 21 Jadi kamong musti kubur kamong pung kalakuang tarbae deng kajahatang samua, la deng randa hati tarima Allah pung ajarang yang Antua su tanang dalang kamong pung hati. Barang, ajarang tu yang bisa kasi salamat kamong.
22 Jang kamong cuma dengar Allah pung ajarang sa, mar musti biking akang lai dalang hidop. Kalo kamong cuma dengar mar seng biking akang, kamong su parlente kamong pung diri sandiri. 23 Tagal sapa yang cuma dengar Allah pung ajarang mar seng biking akang, dia tu sama deng orang yang ada nganga dia pung muka sandiri di muka kaca. 24 Abis nganga dia pung muka di kaca la pi dari situ, dia su lupa kalo dia pung muka tu bagemana. 25 Basudara e, Allah pung ajarang tu ajarang yang batul deng yang bisa kasi bebas kamong dari dosa. Kamong musti balajar akang tarus. Sapa yang seng lupa Allah pung ajarang yang dia su dengar, mar inga deng biking akang tarus, Allah nanti kasi berkat par dia dalang samua yang dia biking.
26 Kalo ada orang yang anggap dia pung diri tu orang yang rajing ibada mar seng bisa jaga dia pung mulu, dia tu su parlente dia pung diri sandiri. La dia pung ibada tu seng ada pung guna apapa. 27 Ibada yang batul deng yang ada pung guna di muka Allah Bapa yang katong somba tu bagini: Tolong anana yang seng pung mama-papa, tolong janda-janda yang susa, deng jaga katong pung diri biar seng iko dunya pung mau yang jahat.