Nasehat par orang kaya
5:1-6
5
1 Hoe kamong orang kaya! Coba dengar bae-bae! Kamong musti manangis deng marata tagal kamong nanti susa deng sangsara. 2 Kamong pung harta su busu. La kamong pung pakiang-pakiang yang bagus-bagus tu, soro su makang akang. 3 Kamong pung mas deng perak su bakarat. Allah nanti pake akang pung karat tu par jadi bukti par hukum kamong deng kasi ancor kamong pung badang. Kamong pung badang nanti ancor sama deng api yang makang kayo sampe abis. Barang, dunya su mau abis mar kamong tinggal kong kumpul harta banya-banya par diri sandiri. 4 Coba pikir bae-bae apa yang kamong su biking! Kamong seng bayar orang-orang yang karja di kamong pung kabong tu pung ongkos lala. Dong tu jua yang kamong suru par pata kamong pung hasil kabong. Dong su bataria minta tolong dari Tuhan yang pung Kuasa par Samua-Samua tu la Antua su dengar dong pung susa tu.* 5 Kamong su hidop talalu sanang di dunya ni. Kamong su biking puas kamong pung diri deng apa sa yang kamong mau. Ingatang! Seng lama lai Tuhan nanti hukum kamong. Kamong sama deng binatang saekor yang orang piara sampe gamu par dapa potong pas akang pung hari. 6 Kamong su hukum deng su bunu orang-orang yang seng ada pung sala apapa, yang seng bisa malawang kamong.Sabar tarus biar kata susa deng sangsara
5:7-11
7 Basudara samua yang iko Yesus, Tuhan nanti hukum orang-orang kaya yang biking susa kamong. Tagal itu, kamong musti sabar tarus sampe Tuhan Yesus bale kombali. Coba lia orang yang bakabong. Dia sabar tarus sampe waktu par ambe hasil kabong yang panting par dia tu. Dia sabar par tunggu ujang turung biar dia bisa batanang. Abis itu, dia tunggu ujang turung lai biar tatanamang tu batumbu bae-bae la akang ada pung hasil. 8 Bagitu lai deng kamong. Kamong musti sabar tarus deng tahang hati, tagal seng lama lai Tuhan Yesus su mau bale kombali. 9 Jang barsungut la jang laeng kasi sala laeng biar Allah seng hukum kamong basudara e. Ingatang! Orang yang jadi hakim par katong manusia ni sadiki lai su mau datang.a
10 Basudara e, coba lia Tuhan pung juru-juru bicara. Dong tu sabar tarus par kasi tau Antua pung pasáng biar kata dong susa deng sangsara. Kamong musti balajar sabar dari dong la iko akang. 11 Katong su tau kalo orang yang tahang hati tarus dalang susa deng sangsara, dia tu orang yang paleng baruntung. Kamong su dengar soal Ayub to? Dia tahang hati tarus biar kata susa deng sangsara. La akang pung laste bagini, Tuhan kasi apa yang bae par dia, tagal Tuhan paleng sayang deng pung hati bae par manusia.
Jang basumpa
5:12
12 Basudara e! Yang paleng panting tu, jang kamong basumpa. Jang basumpa demi langit, dunya, ka demi apa sa. Kalo batul, bilang sa batul. La kalo sala, bilang sa sala. Kalo kamong biking bagitu, Tuhan Allah seng hukum kamong.*
Sombayang tarus
5:13-20
13 Basudara yang iko Yesus, kalo ada dari kamong yang susa, dia musti sombayang minta Tuhan tolong dia. La kalo ada yang pung hati sanang, dia musti manyanyi puji-puji Tuhan. 14 Kalo dari kamong ada yang saki, labe bae dia panggel penatua-penatua jamaat biar dong sombayang deng goso minya di dia pung badang la minta Tuhan kasi bae dia.* 15 Kalo orang-orang yang sombayang par orang saki tu batul-batul parcaya Tuhan, Antua nanti kasi bae orang yang saki tu. La kalo orang yang saki tu ada biking dosa, Antua nanti kasi ampong dia pung dosa-dosa. 16 Tagal itu, kamong musti laeng mangaku laeng pung sala deng laeng sombayang par laeng biar yang saki jadi bae. Orang yang hidop iko Tuhan pung mau, dia pung sombayang tu pung kuasa paleng basar. 17 Conto, Allah pung Juru Bicara Elia. Dia tu manusia biasa sama deng katong. Dia sombayang sunggu-sunggu minta biar ujang jang turung ka bumi la ujang seng turung-turung sampe tiga taong anam bulang tare-tare.* 18 Abis itu, dia sombayang kombali minta ujang turung dari langit ka bumi. Tarus, ujang turung la tatanamang babua.*
19 Basudara e, kalo ada dari kamong yang su seng hidop iko Tuhan pung ajarang yang batul lai, tarus ada orang laeng yang kasi nasehat dia la dia bale kombali iko Tuhan, 20 kamong musti inga bae-bae kata-kata ni, “Sapa yang biking orang bardosa bale kombali iko Tuhan pung mau, itu sama sa dia su tolong orang tu par hidop tarus deng Tuhan, la Tuhan kasi ampong orang tu pung dosa-dosa.”*
Hormat, Yakobis