Hidop iko Allah pung mau
4:1-6
4
1 Jadi basudara e, tagal Kristus sandiri su susa deng sangsara di kayo salib, kamong jua musti kasi kuat kamong pung hati par tarima susa deng sangsara macang Antua lai. Barang sapa yang su susa deng sangsara, dia pasti seng mau biking dosa lai. 2 Akang musti jadi macang bagitu biar kamong pung hidop sisa di dunya ni bisa kamong pake akang par hidop iko Allah pung mau, bukang par hidop iko kamong pung napsu jahat. 3 Barang, kamong su lama iko orang-orang yang seng parcaya Allah pung cara hidop. Waktu itu, kamong hidop iko kamong pung sagala macang napsu jahat deng biking apa sa iko suka. Kamong mabo-mabo, pesta pora, biking pesta minong, deng somba patong-patong. Samua tu seng pantas par katong biking. 4 Mar sakarang, dong yang seng parcaya Allah tu jadi herang, tagal kamong su seng iko dong par hidop iko sagala macang napsu jahat lai. Tagal itu sampe dong hojat kamong. 5 Mar satu waktu nanti, dong musti tanggong jawab dong pung hidop di muka Allah yang su siap par jadi hakim par samua orang yang hidop deng yang mati. 6 Tagal itu tu sampe Kabar Bae soal Yesus jua su dapa kasi tau par orang-orang yang sakarang su mati.a Biar kata dong su dapa hukum par mati sama deng samua manusia, mar dong pung roh hidop tarus, tagal itu yang Allah mau.Orang parcaya pung cara hidop
4:7-11
7 Basudara e, seng lama lai dunya su mau kiamat. Tagal itu, kamong musti jaga diri deng pung hati tenang, biar kamong bisa sombayang. 8 Yang paleng panting tu, kamong musti batul-batul baku sayang. Barang, kalo katong baku sayang, katong bisa kasi ampong orang yang biking sala banya par katong.* 9 Kamong musti tarima basudara laeng par manumpang di kamong pung ruma deng hati sanang. Jang barsungut. 10 Kamong satu-satu su tarima berkat rohani yang beda-beda dari Allah. Tagal itu, kamong musti urus deng pake akang bae-bae par tolong orang laeng, biar dong bisa lia Allah pung hati bae lewat kamong. 11 Akang pung conto bagini: Sapa yang dapa berkat rohani par kasi balajar orang, dia musti bicara sama deng apa yang Allah pung kata-kata bilang. La sapa yang dapa berkat rohani par tolong orang laeng, dia musti pake akang deng kuasa yang Allah su kasi par dia. La deng bagitu Allah dapa puji tagal Yesus Kristus yang kasi kuat dia par biking akang. Antua tu yang pung kuasa deng yang pantas par dapa puji tarus-tarus. Amin.
Nasehat par orang-orang yang susa deng sangsara tagal parcaya Yesus Kristus
4:12-19
12 Basudara samua yang beta sayang, kamong memang dapa susa deng sangsara yang hebat paskali sama deng api pung panas yang hebat paskali. Samua tu musti jadi bagitu par tes kalo kamong tu batul-batul parcaya ka seng. Jadi, jang herang deng samua tu, deng jang pikir kalo samua tu hal yang luar biasa. 13 Labe bae kamong pung hati sanang, tagal kamong su susa deng sangsara macang deng Kristus. La deng bagitu, waktu Antua bale kombali la kasi unju Antua pung kuasa yang hebat paskali, kamong pung hati nanti labe sanang lai. 14 Kalo orang hina kamong tagal iko Kristus, kamong tu paleng baruntung. Barang, itu tu tanda kalo Allah pung Roh yang hebat ada dalang kamong. 15 Mar jang sampe kamong musti susa deng sangsara tagal bunu orang ka, pancuri ka, biking apa yang jahat ka, ka suka tamaso deng orang pung parkara. 16 Mar kalo kamong susa deng sangsara tagal kamong tu orang Kristen, jang malu deng akang. Labe bae kamong puji-puji Allah tagal kamong tu Kristus pung orang-orang. 17 Barang, sakarang su oras par Allah nilai samua orang. Mar Antua nilai Antua pung orang-orang sandiri kamuka. Jadi kalo Antua nilai katong kamuka, apa yang nanti jadi lai deng orang-orang yang seng dengar-dengarang Antua pung Kabar Bae? 18 Allah pung Tulisang jua ada bilang kata,
“Kalo orang-orang yang hidop iko Allah pung mau sa musti susa deng sangsara do baru dapa kasi salamat,
apa yang nanti jadi deng orang-orang yang seng parcaya Allah deng yang biking dosa?”*
19 Jadi sapa yang susa deng sangsara tagal itu yang Allah mau, dia musti taru dia pung hidop antero-antero par Antua yang biking katong deng yang seng parna kasi tinggal katong sandiri. Dia jua musti biking apa yang bae tarus.