Nasehat par laki deng bini
3:1-7
3
1 Bagitu lai deng kamong bini-bini, kamong musti dengar-dengarang kamong pung laki. Kamong musti biking bagitu biar kalo ada dari kamong pung laki yang seng parcaya Allah pung ajarang, dong nanti parcaya sandiri tagal lia kamong pung cara hidop, biar kata kamong seng minta dong par parcaya.* 2 Dong jadi parcaya tagal dong lia kamong pung cara hidop yang batul di muka Allah deng yang salalu iko Antua pung mau. 3 Kalo kamong mau dapa lia manis, jang cuma manis dari luar sa, macang biking rambu deng sagala macang model, bastel deng mas ka deng pakiang yang bagus-bagus.* 4 Mar kalo kamong mau batul-batul dapa lia manis, itu musti dari dalang kamong pung hati, dari kamong pung tabiat yang manis deng hati yang tenang. Kamong pung manis tu batahang tarus deng pung harga tinggi par Allah. 5 Parampuang-parampuang dolo-dolo yang su jadi Allah pung orang-orang deng yang taru harap par Antua jua bastel par jadi manis deng cara macang bagitu. Dong dengar-dengarang dong pung laki, 6 sama deng Sara yang dengar-dengarang dia pung laki Abraham sampe panggel Abraham tu par “tuang”.* Kamong tu jua Sara pung anana kalo kamong iko dia pung cara hidop yang bae tu deng seng mundur tagal taku.7 Bagitu jua deng kamong laki-laki. Kamong musti hidop bae-bae deng kamong pung bini, tagal dong tu seng kuat macang kamong. Kamong musti taru hormat par dong, tagal dong tu jua nanti tarima berkat dari Allah sama-sama deng kamong. Berkat tu, kamong nanti hidop tarus-tarus deng Antua. Kalo kamong seng biking bagitu, Tuhan seng dengar kamong pung sombayang.*
Baku sayang deng hidop dame satu deng laeng
3:8-12
8 Jadi basudara e, akang pung konci rekeng, kamong musti satu hati, laeng mangarti laeng, sayang kamong pung basudara yang parcaya Yesus, pung hati bae, deng randa hati. 9 Jang balas kajahatang deng kajahatang ka maki deng maki, mar minta Allah kasi berkat par dong. Barang Allah panggel kamong par jadi berkat par orang laeng, biar kamong jua nanti dapa berkat dari Antua. 10 Barang dalang Allah pung Tulisang ada bilang kata,
“Sapa yang mau dia pung hidop bae deng sanang,
dia musti jaga dia pung mulu biar dia seng bicara hal-hal yang jahat lai deng seng parlente putar bale.
11 Dia musti kasi tinggal apa yang jahat la biking apa yang bae.
Dia jua musti usaha sunggu-sunggu par hidop dame deng orang laeng.
12 Barang, Tuhan pasang mata taru kira orang-orang yang hidop iko Antua pung mau,
deng pasang talingang dengar dong pung sombayang.
Mar Antua bale balakang dari orang-orang yang biking kajahatang.”*
Sabar tarus biar kata susa deng sangsara
3:13-22
13 Basudara e, sapa yang mau biking susa kamong kalo kamong salalu biking apa yang bae? 14 Mar biar kata kamong musti dapa susa deng sangsara tagal biking apa yang batul lai, kamong tu paleng baruntung. Jadi, kalo ada orang yang biking bagitu par kamong, jang taku ka hati susa.* 15 Mar dalang kamong pung hati, kamong musti parcaya deng taru hormat par Kristus tagal Antua tu Tuhan! Kamong jua musti salalu siap par jawab orang-orang yang tanya kamong soal mangapa kong kamong taru harap par Antua. Mar jawab dong bae-bae, deng hormat,* 16 deng hati barsi. Deng bagitu, orang-orang yang hojat kamong soal kamong pung kalakuang yang batul tagal parcaya Kristus, dong tu nanti jadi malu sandiri tagal apa yang dong bilang tu seng batul. 17 Barang, kalo memang Allah pung mau par katong musti susa deng sangsara tagal biking apa yang bae, itu labe bae daripada musti susa deng sangsara tagal biking apa yang jahat. 18 Barang, Kristus su susa deng sangsara sampe mati satu kali sa par tabus katong samua dari katong pung dosa-dosa. Antua tu hidop batul di muka Allah deng seng biking dosa, mar Antua mati par tabus katong samua yang seng hidop batul di muka Allah, biar Allah bisa tarima katong. Orang-orang bunu Antua, mar Antua hidop kombali tagal Allah pung Roh pung kuasa. 19 Deng Allah pung Roh pung kuasa, Kristus pi kasi tau Allah pung pasáng par roh-roh yang ada dalang bui. 20 Roh-roh tu, roh dari orang-orang yang seng dengar-dengarang Allah, yang su mati waktu jamang Nuh. Waktu itu, Allah sabar tunggu-tunggu manusia par kasi tinggal dong pung dosa-dosa waktu Nuh ada biking kapal kayo basar satu. Mar cuma dalapang orang sa yang nai kapal kayo tu la dapa kasi salamat dari aer banjir.* 21 Aer banjir tu, katong bisa banding akang deng aer yang dapa pake par baptis kamong sakarang ni. Aer tu bukang par kasi barsi kamong pung badang dari daki-daki, mar par jadi tanda kalo katong minta Allah kasi barsi katong pung hati deng pikirang biar katong hidop deng batul. La waktu katong dapa baptis, katong parcaya kalo Allah su kasi salamat katong tagal Yesus Kristus su hidop kombali. 22 Antua su nai ka sorga la ada di Allah pung sabala kanang, tampa paleng panting. La malekat-malekat samua deng samua yang pung kuasa deng yang pegang parenta di langit deng di dunya tundu par Antua pung parenta.