2
1 Tagal itu, jang biking sagala macang kajahatang, jang parlente, jang munafik, jang culas, deng jang biking busu orang pung nama. 2 Kamong musti suka paskali par dengar Allah pung ajarang, biar kamong labe tamba batumbu dalang kamong pung parcaya la salamat. Itu sama deng ana kacil yang baru lahir yang suka paskali par minong aer susu yang asli, biar dia tamba basar deng kuat. 3 Kamong musti biking bagitu tagal kamong sandiri su rasa Tuhan pung bae par kamong.*Yesus tu batu yang paleng panting par orang parcaya
2:4-10
4 Basudara e, kamong musti dekat deng Yesus, yang sama deng batu yang hidop. Batu tu, orang-orang su buang akang, mar Allah su pili batu tu deng akang paleng panting par Antua. 5 Kamong tu jua batu-batu yang hidop, yang Allah pake par kasi badiri Antua pung ruma, tampa Antua pung Roh tinggal. Antua su pili kamong par jadi imam-imam par kasi kamong pung hidop par jadi korbang rohani par Antua. Kamong pung korbang rohani tu biking Antua pung hati sanang, tagal apa yang Yesus Kristus su biking par kamong. 6 Beta bilang bagitu tagal dalang Allah pung Tulisang ada bilang kata:
“Dengar bae-bae! Beta su pili batu satua yang paleng panting
par taru pandasi di Beta pung Ruma di kota Yerusalem.b
Sapa sa yang parcaya Antua, dia pasti seng malu.”*
7 Tagal itu, par kamong yang parcaya, batu tu paleng panting paskali.c Mar par orang-orang yang seng parcaya, Allah pung Tulisang ada bilang kata:
“Batu yang tukang-tukang su buang tu,
Akang su jadi batu pandasi yang paleng panting.”*
8 La Allah pung Tulisang jua ada bilang kata,
“Batu tu biking orang-orang tasonto la jatu.”*
Dong tasonto batu tu tagal dong seng dengar-dengarang Allah pung ajarang. Itu yang Allah su ator dari kamuka par dong.
9 Mar kamong tu orang-orang yang Allah su pili. Kamong tu imam-imam yang karja par Allah, kamong pung Raja. Kamong tu jua bangsa yang Allah su pili kusus par jadi Antua pung orang-orang. Antua biking bagitu biar kamong bisa kasi tau hal-hal hebat yang Antua su biking, tagal Antua su bawa kamong kaluar dari galap la maso ka Antua pung tarang yang luar biasa.* 10 Dolo kamong tu bukang Allah pung orang-orang, mar sakarang kamong su jadi Antua pung orang-orang. Dolo kamong seng rasa Antua pung hati bae, mar sakarang kamong su rasa akang. *
Orang-orang parcaya pung kalakuang
2:11-17
11 Basudara samua yang beta sayang, kamong tu orang-orang dagang yang manumpang sadiki tempo di dunya ni. Tagal itu, beta minta deng sunggu-sunggu dari kamong par jang hidop iko kamong pung sagala macang napsu jahat, yang tinggal kong malawang kamong pung hati yang mau biking yang bae. 12 Kamong musti bawa diri bae-bae di tenga-tenga orang-orang yang seng parcaya Allah. Kamong musti biking bagitu biar kalo dong biking busu kamong pung nama kata kamong tu orang jahat, dong nanti bisa lia sandiri kalo kamong pung kalakuang tu bae la puji-puji Allah waktu Antua datang.
13 Basudara e, Tuhan mau kamong dengar-dengarang samua orang yang pegang kuasa di dunya ni. Kamong musti dengar-dengarang raja yang pung kuasa paleng tinggi, 14 deng orang-orang yang antua pili par ganti antua par hukum orang-orang yang biking kajahatang deng par taru hormat par orang-orang yang biking bae. 15 Barang, Allah mau kamong biking apa yang bae biar orang-orang yang seng parcaya Antua tu barenti bicara yang seng batul-batul soal kamong. 16 Kamong musti hidop sama deng orang yang su bebas dari dosa. Mar, jang tagal kamong su bebas la kamong pake akang par jadi alasang par bale biking dosa kombali. Mar kamong musti dengar-dengarang Allah, tagal kamong tu Antua pung jongos. 17 Kamong musti taru hormat par samua orang, sayang basudara laeng yang parcaya, taku deng taru hormat par Allah, deng taru hormat par raja.
Yesus Kristus jadi conto par jongos-jongos deng par samua orang
2:18-25
18 La kamong basudara yang jadi jongos e, kamong musti batul-batul taru hormat deng dengar-dengarang par kamong pung bos. Jang biking bagitu cuma par bos yang bae deng yang hidop manis deng kamong sa, mar par bos yang kasar lai. 19 Barang, kalo dari kamong ada yang susa deng sangsara biar kata dia seng biking apapa yang sala, la dia sabar tarus sa tagal dia inga Allah pung mau, itu biking Antua pung hati sanang. 20 Mar kalo kamong susa deng sangsara tagal kamong pung sala, akang pung untung apa? Seng ada to! Mar, kalo kamong susa deng sangsara tagal biking apa yang bae la kamong sabar par tarima samua tu, itu biking Allah pung hati sanang. 21 Barang, Allah panggel kamong par biking apa yang bae tarus biar kata kamong dapa susa deng sangsara. Barang, Kristus jua su susa deng sangsara par kamong deng su kasi conto par kamong biar kamong jua iko akang.
22 “Antua seng parna biking dosa
deng seng parna parlente putar bale.”*
23 Waktu orang-orang maki Antua, Antua seng parna balas maki dong. Waktu orang-orang siksa Antua, Antua seng parna ancam par balas dong. Mar Antua kasi Antua pung diri par Allah, tagal Allah tu hakim yang seng barát sabala.* 24 Antua sandiri su pikol katong pung dosa-dosa di atas kayo salib, biar katong bisa talapas dari dosa-dosa la hidop par biking apa yang batul di muka Allah. Lewat Antua pung luka-luka, katong jadi bae.* 25 Dolo, kamong sama deng domba yang bajalang kaluar dari jalang yang batul.* Mar sakarang, kamong su bale kombali par Antua yang jaga deng kalesang kamong bae-bae, macang deng orang yang jaga domba.