Petrus
pung Surat Partama
Tabea
1:1-2
1
1-2 Par basudara samua yang Allah su pili par jadi Antua pung orang-orang, yang tinggal talamburang jadi orang dagang di propinsi Pontus, Galatia, Kapadokia, Asia, deng Bitinia.Tabea! Beta ni Petrus, Yesus Kristus pung utusang. Beta minta biar Allah kasi berkat basar deng dame batambong-tambong par kamong samua.
Basudara e, kamong su dapa pili jadi Allah Bapa pung orang-orang tagal memang dari dolo lai Antua su ator akang bagitu. Antua pung Roh jua yang biking sampe kamong jadi Antua pung orang-orang biar kamong dengar-dengarang par Yesus Kristus. La lewat Yesus Kristus pung dara yang su tatumpa di kayo salib, Antua basu kamong barsi dari dosa-dosa.
Orang parcaya nanti tarima harta pusaka di sorga
1:3-12
3 Basudara e, mari katong puji-puji Allah. Antua tu Tuhan Yesus Kristus yang katong somba pung Bapa. Mari katong puji-puji Antua tagal Antua pung hati bae paskali par katong sampe Antua roba katong pung hidop jadi baru,a tagal Yesus Kristus su hidop kombali dari kamatiang. Deng cara bagitu katong labe tamba taru harap par Antua, 4 kalo satu waktu nanti katong tarima harta pusaka yang seng bisa ancor, busu, deng bakarat, yang Antua su sadia par katong di sorga. 5 Harta tu par kamong yang parcaya Antua, yang Allah jaga deng Antua pung kuasa sampe waktu dunya su mau kiamat la kasi salamat kamong, sama deng apa yang Antua su janji.
6 Tagal itu basudara e, kamong pung hati musti paleng sanang tarus biar kata sakarang ni par sadiki tempo, kamong pung hati paleng susa tagal sagala macang sangsara yang kamong tarima. 7 Samua tu musti jadi macang bagitu par kasi unju kalo kamong pung parcaya par Tuhan tu asli ka seng. Kamong pung parcaya par Antua tu labe panting dari mas, tagal mas bisa binasa. Kalo orang mau cari tau kalo mas tu asli ka seng, dong musti bakar akang dalang api. Bagitu jua deng kamong. Kalo mau tau kamong tu batul-batul parcaya Tuhan ka seng, kamong musti dapa tes lai. La kalo kamong batul-batul parcaya Antua, Antua nanti puji-puji deng hormat kamong, deng angka kamong pung nama waktu Yesus Kristus bale kombali.
8 Biar kata kamong balong parna baku dapa langsung deng Yesus Kristus, kamong tetap sayang Antua. Biar kata sakarang ni kamong balong lia Antua, kamong tetap parcaya Antua. Itu tu yang biking kamong pung hati sanang paskali sampe seng tau mau bilang apa lai. 9 Barang, Allah kasi salamat kamong tagal kamong parcaya Yesus Kristus tu.
10 Basudara e, Allah pung juru-juru bicara su kasi tau dari dolo kalo Antua nanti kasi salamat kamong tagal Antua pung hati bae par kamong. Dong cari tau deng pikir akang bae-bae biar dong bisa mangarti akang. 11 Kristus pung Roh su karja dalang dong pung hati par kasi unju par dong kalo Kristus nanti dapa siksa biar katong salamat, mar abis itu Allah puji-puji Antua. Jadi, dong coba cari tau apa tempo deng bagemana akang nanti jadi. 12 Antua su kasi unju par dong kalo apa yang dong su kasi tau tu, akang nanti jadi bukang di dong pung jamang mar di kamong pung jamang. La apa yang dong su kasi tau tu, itu tu Kabar Bae yang kamong su dengar sakarang dari orang-orang yang dapa kuasa dari Allah pung Roh yang Antua utus dari sorga. Mala malekat-malekat jua mau cari tau soal akang.
Jang biking dosa
1:13—2:3
13 Jadi basudara e, kamong musti kasi siap kamong pung hati deng pikirang, jaga diri bae-bae, deng taru harap sunggu-sunggu par Allah yang nanti kasi berkat basar par kamong waktu Yesus Kristus bale kombali. 14 Kamong tu Allah pung anana, jadi kamong musti dengar-dengarang Antua. Jang hidop iko kamong pung napsu jahat dolo-dolo waktu kamong balong tau Kabar Bae. 15 Mar sama deng Allah yang su panggel kamong jadi Antua pung anana tu seng biking dosa, kamong jua jang biking dosa dalang kamong pung hidop sabang hari. 16 Barang dalang Allah pung Tulisang ada bilang kata, “Jang kamong biking dosa, tagal Beta seng biking dosa.”*
17 Waktu kamong sombayang, kamong jaga panggel Allah tu par Bapa. Antua tu Bapa yang seng lia-lia muka waktu jadi hakim par samua orang iko apa yang dong su biking. Tagal itu, waktu kamong ada hidop manumpang di dunya ni, kamong musti taku deng taru hormat par Antua. 18 Barang, kamong tau kalo Allah su tabus kamong biar kamong talapas dari kamong pung cara hidop yang seng ada pung guna, yang kamong tarima dari kamong pung tete-nene moyang. Antua tabus kamong bukang pake mas ka perak yang nanti binasa. 19 Mar Antua tabus kamong deng Kristus pung dara yang mahal paskali. Kristus su kasi Antua pung diri par tabus kamong samua, sama deng domba ana yang seng ada pung cacat ka apapa yang kurang, yang dapa pili par jadi korbang. 20 Allah su pili Kristus dari waktu dunya balong ada lai. Mar sakarang waktu dunya su mau kiamat, Antua datang ka dunya par kasi salamat kamong. 21 Lewat apa yang Kristus biking tu, kamong parcaya Allah yang su kasi hidop Antua kombali dari kamatiang deng yang su biking Antua dapa puji deng hormat. La deng bagitu, kamong tetap parcaya deng taru harap par Allah.
22 Basudara e, kamong su kasi barsi kamong pung diri dari dosa-dosa tagal kamong su hidop iko Allah pung ajarang yang batul. Itu tu yang biking sampe kamong bisa batul-batul sayang kamong pung basudara yang parcaya Tuhan. Jadi kamong musti batul-batul baku sayang satu deng laeng deng hati antero-antero. 23 Barang kamong pung hidop su jadi baru. Kamong pung hidop yang jadi baru tu, kamong dapa akang bukang dari manusia yang bisa mati, mar dari Allah yang seng parna mati tu pung ajarang yang hidop deng yang ada tarus-tarus. 24 Barang, Allah pung Tulisang ada bilang kata,
“Samua manusia di dunya ni macang deng rumpu.
La dong pung hebat sama deng rumpu pung bunga.
Rumpu nanti karing la akang pung bunga gugur.
25 Mar Tuhan pung ajarang ada tarus-tarus.”*
Antua pung ajarang tu Kabar Bae yang su dapa kasi tau par kamong.