Tuhan Yesus nanti bale kombali
3:1-16
3
1 Basudara samua yang beta sayang, ini ni surat kadua yang beta tulis par kamong. Dalang beta pung surat partama deng kadua ni, beta mau kasi inga kamong kombali soal ajarang-ajarang yang batul yang kamong su dengar, biar kamong bisa hidop deng pikirang yang batul. 2 Beta biking bagitu tagal beta mau kamong inga apa yang Allah pung juru-juru bicara yang Antua pili tu su bilang dolo-dolo. Beta jua mau kamong inga parenta-parenta dari Tuhan Yesus yang Kasi Salamat Manusia, yang Antua pung utusang-utusang su bilang par kamong. 3 Yang paleng panting, kamong musti tau kalo sakarang waktu dunya su mau kiamat ni, orang-orang yang suka hina Allah deng Antua pung orang-orang nanti muncul. Dong tu hidop iko dong pung napsu jahat.* 4 Dong bilang kata, “Haha e! Yesus su janji kalo Dia mau bale kombali, mar sampe oras ni mana Dia? Dari waktu katong pung tete-nene moyang mati sampe oras ni, dunya masi tetap sama macang waktu Allah partama kali biking akang.”5 Waktu dong bilang bagitu, itu sama sa deng dong kasi unju kalo dong sangaja lupa kalo dolo Allah cuma bilang sa la langit langsung jadi. La cuma deng bilang sa, dunya ni jadi dari aer-aer, deng Antua pake aer par biking dunya.* 6 La deng aer tu jua Antua dolo kasi ancor dunya ni deng banjir basar.* 7 Mar, cuma deng bilang sa Antua jaga langit deng dunya yang masi ada sampe sakarang ni, biar satu waktu Antua nanti kasi ancor akang deng api, waktu Antua bale par hukum deng kasi binasa orang-orang yang hidop jau dari Antua.
8 Mar basudara samua yang beta sayang, inga ini bae-bae: Par Tuhan, satu hari tu sama sa deng saribu taong la saribu taong tu sama sa deng satu hari.* 9 Jadi kalo ada orang yang pikir kata Antua ada tunda-tunda par biking apa yang Antua su janji, itu seng batul. Antua seng tunda-tunda, mar ada kasi waktu biar samua orang bisa sadar la kasi tinggal dong pung dosa-dosa, la bale hidop iko Antua pung mau. Barang, Antua seng mau satu orang lai binasa. 10 Mar seng ada orang yang tau apa tempo Tuhan Yesus nanti bale kombali. Akang macang deng pancuri yang datang pas waktu yang katong seng sangka-sangka. Waktu itu, ada suara macang deng guntur yang babunyi kuat paskali la langit abis samua, la matahari, bulang, deng bintang-bintanga tabakar abis. Tarus, dunya deng samua yang ada di dunya ni binasa abis.*
11 Jadi basudara e, kalo samua yang ada di dunya ni nanti ancor macang bagitu, kamong musti hidop bagemana sakarang? Kamong musti hidop iko Allah pung mau deng seng biking dosa, 12 waktu kamong ada harap paskalib deng tunggu-tunggu hari yang Allah su putus par Yesus bale kombali ka dunya. Waktu itu langit samua nanti binasa abis dalang api, la matahari, bulang, deng bintang-bintang nanti malele tagal akang pung panas. 13 Mar Allah su janji mau kasi langit deng dunya yang baru par katong, la katong ada tunggu-tunggu akang. Cuma orang-orang yang pung hidop batul di muka Allah sa yang bisa tinggal di situ.*
14 Tagal itu basudara samua yang beta sayang e, waktu kamong ada tunggu-tunggu samua tu jadi, kamong musti usaha biar kamong seng ada pung dosa deng seng ada pung sala di muka Allah, deng biar kamong hidop dame deng Antua tarus. 15 Inga bae-bae! Kalo Tuhan ada sabar tarus deng katong, itu pung arti Antua ada kasi waktu par katong par kasi tinggal katong pung dosa-dosa biar katong dapa kasi salamat. Ini jua sama deng apa yang katong pung sudara Paulus yang katong sayang tu su tulis par kamong. Dia tulis akang iko pikirang tajang yang Tuhan su kasi par dia. 16 Dalang dia pung surat-surat samua, dia jaga tulis hal-hal macang bagitu. Memang dalang dia pung surat-surat tu, ada babarapa hal yang susa par katong mangarti akang. Tagal itu sampe orang-orang yang seng mangarti akang pung maksud deng yang balong kuat dalang dong pung parcaya, dong putar bale akang iko dong pung pikirang sandiri. Dong biking bagitu lai par babarapa dari Allah pung Tulisang yang laeng. Itu tu yang biking sampe dong nanti binasa.
Petrus tutu dia pung surat
3:17-18
17 Basudara samua yang beta sayang. Kamong su tau apa yang beta bilang soal guru-guru parlente tu. Tagal itu, kamong musti ati-ati deng dong yang jaga malawang Allah tu, biar kamong seng anyo iko dong pung ajarang yang seng batul, deng biar kamong seng bale balakang dari kamong pung parcaya par Tuhan. 18 Jadi, beta minta biar kamong labe hari labe tamba batumbu par mangarti Tuhan Yesus Kristus pung hati bae, deng biar kamong labe tamba kanal Antua yang katong somba deng yang Kasi Salamat Katong. Mari katong puji deng taru hormat par Antua, dari sakarang sampe tarus-tarus. Amin.
Hormat, Petrus