Juru-juru bicara parlente deng guru-guru parlente
2:1-22
2
1 Basudara e, dolo juru-juru bicara parlente su muncul di tenga-tenga orang Israel. Bagitu jua sakarang ni, guru-guru parlente nanti muncul di tenga-tenga kamong. Waktu dong kasi balajar orang, dong tado-tado kasi maso dong pung ajarang-ajarang yang seng batul yang bisa kasi ancor orang-orang pung hidop. Dong mala manyangkal Tuhan Yesus yang su tabus dong, la deng bagitu dong sandiri biking dong capat binasa. 2 Banya orang nanti iko dong pung cara hidop yang lahir dari dong pung napsu jahat tu, la tagal dong tu sampe orang-orang nanti hojat Allah pung ajarang yang batul. 3 La tagal guru-guru parlente tu mata kepeng, dong nanti karang-karang carita par parlente kamong biar dong bisa dapa untung dari kamong. Mar Allah su putus dari dolo lai par hukum dong, la Antua su siap par kasi binasa dong.4 Barang, Allah sa seng kasi biar malekat-malekat yang su biking dosa. Antua buang dong dalang naraka la rante dong dalang liang-liang yang galap paskali sampe waktu Antua hukum dunya ni. 5 Bagitu lai deng orang-orang yang hidop jau dari Antua dolo-dolo paskali. Antua seng kasi biar dong bagitu sa, mar kiring banjir basar yang tutu dunya ni samua par hukum dong. Mar Antua cuma kasi salamat Nuh yang jaga kasi balajar cara hidop yang batul tu, sama-sama deng tuju orang laeng lai.* 6 Bagitu lai deng orang-orang di kota Sodom deng Gomora. Antua kasi turung api dari langit par kasi binasa samua sampe abis.* Antua biking bagitu par kasi inga samua orang yang hidop jau dari Antua, kalo Antua nanti hukum dong. 7 Mar Antua kasi salamat Lot yang pung hidop batul di muka Antua. Dia pung hati susa paskali tagal orang-orang di situ pung cara hidop yang malawang Allah deng baku tarika kiri-kanang. 8 Lot yang pung hidop batul tu tinggal di tenga-tenga dong deng hati susa tagal sabang hari dia tinggal kong lia deng dengar dong pung kalakuang-kalakuang yang jahat.*
9 Jadi dari conto-conto tu, katong tau kalo Tuhan Allah pasti kasi salamat orang-orang yang hidop iko Antua pung mau, waktu dong ada susa deng sangsara. Mar Antua jua pasti tahang deng hukum orang-orang yang seng hidop batul di muka Antua tu tarus-tarus, sampe hari waktu Antua putus orang-orang di dunya ni pung parkara. 10 Labe-labe lai par guru-guru parlente yang hidop iko dong pung napsu jahat yang biking dong pung tabiat hidop tarbae deng yang anggap enteng Allah pung kuasa tu.
Dong barani deng sombong paskali sampe dong seng tanggong-tanggong par hojat samua yang pung kuasa yang ada di sorga. 11 Sapa tau bagini, malekat-malekat yang labe kuat deng yang pung kuasa labe hebat dari dong tu sa seng barani sadiki lai par hojat samua yang pung kuasa tu waktu tudu samua tu di muka Tuhan. 12 Mar guru-guru parlente tu hojat apa yang dong sandiri seng mangarti akang. Dong sama deng binatang yang seng ada pung akal, yang cuma biking apa sa iko suka. La sama deng binatang yang ada di dunya cuma par dapa tangkap deng dapa bunu, dong jua nanti binasa. 13 Dong nanti dapa susa deng sangsara, tagal dong jua su biking orang laeng susa deng sangsara. Dong suka paskali par biking apa sa iko dong pung napsu sandiri biar kata siang tarang manyala lai. La kalo dong dudu makang deng minong sama-sama deng kamong, dong suka biking yang kurang-kurang ajar. Tagal dong pung kalakuang tu paleng kotor deng badaki paskali, orang laeng jua pikir seng bae soal kamong. 14 Kalo guru-guru parlente tu lia parampuang satu, dong pung napsu langsung nai. Dong sama seng parna puas par biking dosa. Dong buju orang-orang yang balong kuat parcaya Tuhan par iko dong biking apa yang jahat. Dong tu orang-orang yang baringing, tagal dong su biasa hidop macang bagitu. Dong tu orang-orang yang su dapa kutok dari Allah. 15 Dong su bale balakang kasi tinggal Allah pung jalang yang batul la hidop iko jalang yang seng batul, macang Beor pung ana Bileam yang cuma mau dapa kepeng dari biking apa yang jahat. 16 Mar tagal dia pung kajahatang tu, Allah tagor dia deng karas lewat dia pung keledai yang biasa seng bisa bicara, mar skrek bagini bisa bicara macang deng manusia. Keledai tu tagor juru bicara tu biar dia jang biking dia pung rencana bodo tu.*
17 Guru-guru parlente tu seng ada pung guna apapa, sama deng mata aer yang karing, ka awang itang tabal yang dapa tiop dari anging ribut sampe seng jadi ujang. Allah su kasi siap tampa yang paleng galap paskali par hukum dong. 18 Barang, dong bicara mangarti mar akang seng ada pung arti apapa. Dong jua buju orang-orang yang baru kasi tinggal dong pung cara hidop yang seng batul par bale hidop macang bagitu lai. Dong buju orang-orang tu par biking apa sa iko dong pung napsu jahat yang kurang-kurang ajar. 19 Dong janji kata orang-orang yang iko dong pung ajarang tu nanti bebas, jadi dong bisa biking apa sa iko dong pung napsu sandiri. Sapa tau bagini, guru-guru parlente tu jongos par dong pung napsu jahat yang biking binasa dong. Barang, sapa sa yang dapa parenta dari apa sa, itu sama sa deng dia su jadi jongos par akang. 20 Barang, kalo sapa sa su talapas dari dunya pung hal-hal jahat tagal kanal Tuhan Yesus Kristus yang katong somba deng yang Kasi Salamat Katong mar bale tarika deng akang kombali, dong pung hidop pasti labe rusak dari yang kamuka lai. 21 Tagal itu, labe bae jang dong tau Allah pung ajarang yang bawa orang par hidop batul tu sama sakali, daripada tau mar bale balakang dari Antua pung parenta yang batul yang orang su kasi tau akang par dong. 22 Par dong yang macang bagitu tu, apa yang orang biasa bilang ni batul,
“Anjing bale makang akang pung munta kombali,*
deng babi yang su dapa kasi barsi bale barmaeng dalang tonaal kombali.”*