Bagemana katong tau ajarang yang batul deng ajarang yang sala
4:1-6
4
1 Basudara yang beta sayang! Jang capat parcaya par sapa sa yang bilang kalo apa yang dia ajar tu asal dari Allah pung Roh. Mar kamong musti tes apa yang dia bilang tu bae-bae do, biar kamong bisa tau kalo ajarang tu asal dari Allah pung Roh ka seng. Barang, ada banya juru bicara parlente yang su pi ka sagala tampa par kasi balajar ajarang yang seng batul. 2 Kamong bisa tau kalo apa yang dong ajar tu asal dari Allah pung Roh ka seng deng cara bagini: Kalo dong mangaku Yesus Kristus datang ka dunya jadi manusia, itu pung arti dong pung ajarang tu batul-batul dari Allah pung Roh.a 3 Mar kalo dong seng mangaku kalo Yesus Kristus datang ka dunya jadi manusia, itu pung arti dong pung ajarang tu bukang dari Allah pung Roh. Dong pung ajarang tu, akang asal dari roh yang sama deng roh yang ada dalang satu orang yang paleng jahat paskali yang musu Yesus Kristus tu.* Kamong su parna dengar kalo roh tu nanti datang ka dunya ni to? Sakarang akang memang su ada.4 Mar anana e, kamong tu Allah pung orang-orang. Kamong su kasi kala juru-juru bicara parlente tu waktu kamong seng tarima dong pung ajarang. Kamong su kasi kala dong tagal Allah pung Roh pung kuasa yang ada dalang kamong tu labe hebat dari Setang pung Raja pung kuasa yang ada dalang orang-orang di dunya ni yang seng parcaya Allah. 5 Juru-juru bicara parlente tu asal dari orang-orang di dunya ni yang seng parcaya Allah tu. Jadi dong pung ajarang tu iko pikirang dari orang yang seng parcaya Allah. La orang-orang yang seng parcaya Allah di dunya ni tarima dong pung ajarang tu. 6 Mar katongb ni Allah pung anana. Jadi sapa sa yang kanal Allah, dia tarima katong pung ajarang. Mar sapa yang bukang Allah pung anana, dia seng tarima katong pung ajarang.
Itu tu cara katong bisa tau kalo dong pung ajarang batul-batul dari Allah pung Roh ka dari Setang pung Raja yang tukang parlente.
Allah yang biking sampe katong baku sayang satu deng laeng
4:7-21
7 Basudara yang beta sayang! Mari katong samua baku sayang satu deng laeng tarus. Barang, Allah yang biking sampe katong samua bisa baku sayang. Jadi sapa sa yang sayang orang laeng, dia tu Allah pung ana deng dia kanal Antua. 8 Sapa yang seng sayang orang laeng, dia seng kanal Allah. Barang, Allah salalu sayang katong manusia. Itu tu Antua pung tabiat. 9 Antua kasi unju kalo Antua sayang katong deng cara utus Antua pung Ana satu areng-areng datang ka dunya. Tagal apa yang Antua pung Ana biking, katong bisa hidop tarus-tarus deng Antua. 10 Sayang yang batul pung arti tu, bukang katong yang sayang Allah, mar Allah yang sayang katong. Antua sayang katong sampe Antua utus Antua pung Ana par tabus katong pung dosa-dosa.
11 Basudara yang beta sayang, kalo Allah sa paleng sayang katong macang bagitu paskali, katong jua musti baku sayang satu deng laeng. 12 Seng ada satu orang lai yang parna lia Allah deng dia pung mata kapala sandiri. Mar kalo katong baku sayang, itu pung arti kalo Antua su satu hati deng katong. Antua biking sampe katong batul-batul baku sayang macang deng Antua sayang katong.*
13 Tagal Allah su kasi Antua pung Roh par katong, katong bisa tau kalo katong satu hati deng Antua la Antua satu hati lai deng katong. 14 Katong su lia Antua pung Ana deng katong pung mata kapala sandiri deng jadi saksi par kamong kalo Allah su utus Antua pung Ana datang par Kasi Salamat Manusia di dunya ni. 15 Sapa sa yang mangaku kalo Yesus tu Allah pung Ana, Allah satu hati deng dia la dia jua satu hati deng Allah. 16 Katong jua tau deng parcaya kalo Allah paleng sayang katong tarus.
Allah salalu sayang katong manusia. Itu tu Antua pung tabiat. Sapa yang salalu sayang orang laeng, dia tu su satu hati tarus deng Allah la Antua jua su satu hati tarus deng dia.
17 Basudara samua, Allah biking sampe katong batul-batul baku sayang macang deng Antua sayang katong. Jadi katong nanti seng parlu taku pas waktu Allah putus manusia di dunya pung parkara. Barang, katong pung cara hidop di dunya ni sama deng Yesus pung cara hidop. 18 Sapa sa yang sayang Allah deng orang laeng, dia seng parlu taku. Barang, kalo dia batul-batul sayang Allah deng orang laeng, dia pung taku di hati tu ilang samua. Orang taku tagal dong pikir kalo nanti waktu Allah putus manusia di dunya pung parkara, Antua nanti hukum dong. Jadi, sapa sa yang taku kalo Allah nanti hukum dia, dia balong batul-batul sayang Allah deng orang laeng macang deng Allah sayang dia.
19 Katong bisa sayang Allah deng orang laeng tagal Allah sayang katong kamuka. 20 Sapa sa yang bilang, “Beta sayang Allah”, mar kalo dia binci dia pung basudara yang iko Yesus, dia tu mulu parlente putar bale. Barang, kalo dia seng sayang dia pung basudara yang dia ada lia sabang hari, kong Allah lai? Bagemana kong dia bisa sayang Allah yang dia seng parna lia? 21 Jadi ini ni parenta yang Allah su kasi par katong: Sapa yang sayang Allah, dia jua musti sayang dia pung basudara yang iko Yesus lai.