Sapa sa yang parcaya Yesus, dong bisa kasi kala samua yang jahat
5:1-5
5
1 Basudara samua yang beta sayang, sapa sa yang parcaya kalo Yesus tu Orang yang Allah su Angka par Kasi Salamat Manusia, dia tu Allah pung ana. La sapa sa yang sayang Allah Bapa, dia pasti sayang Antua pung anana lai. 2 Kalo katong sayang Allah deng iko Antua pung parenta samua, itu tu tanda kalo katong sayang Antua pung anana lai. 3 Jadi kalo katong sayang Antua, katong pasti biking Antua pung parenta samua. Antua pung parenta tu seng barát par katong biking akang.* 4 Barang sapa sa yang jadi Allah pung ana, dia bisa kasi kala samua yang jahat di dunya ni. Dia bisa kasi kala samua yang jahat tu tagal dia parcaya Yesus. 5 Cuma orang-orang yang parcaya kalo Yesus tu Allah pung Ana yang bisa kasi kala samua yang jahat tu. Seng ada yang laeng! Kamong tau to?Yesus tu Allah pung Ana yang jadi manusia yang bisa biking katong hidop tarus-tarus deng Allah
5:6-12
6 Basudara samua yang beta sayang, Yesus Kristus datang ka dunya la Yohanis Tukang Baptis, baptis Antua deng aer. Tarus waktu Antua mati di kayo salib, Antua pung dara tumpa. Antua datang ka dunya bukang par dapa baptis deng aer sa, mar par dapa baptis deng jua par kasi Antua pung diri sandiri sampe Antua pung dara tumpa. Allah pung Roh yang bilang par katong kalo samua soal Yesus tu batul. Barang, Allah pung Roh seng parna bilang apapa yang seng batul. 7 Jadi ada tiga bukti yang biking katong tau deng batul soal Yesus. 8 Tiga bukti tu: Allah pung Roh, aer yang Yohanis Tukang Baptis pake par baptis Yesus, deng Yesus pung dara yang su tatumpa di kayo salib. Tiga bukti tu kasi unju satu hal yang sama soal Yesus par katong.
9 Kalo manusia jadi saksi, katong parcaya apa yang dia bilang. Apalai kalo Allah sandiri yang jadi saksi. Katong musti labe parcaya lai deng apa yang Antua bilang. Antua sandiri yang bilang soal Antua pung Ana. 10 Jadi sapa yang parcaya kalo Yesus tu Allah pung Ana, dia pasti parcaya sunggu-sunggu kalo apa yang Allah bilang soal Antua pung Ana tu batul. Mar sapa yang seng parcaya akang, itu sama sa dia bilang kalo Antua tu mulu parlente. Barang, dia seng parcaya apa yang Allah bilang soal Antua pung Ana. 11 Katong parcaya kalo apa yang Allah bilang par katong tu batul. Antua bilang kalo katong bisa hidop tarus-tarus deng Antua tagal katong su parcaya Antua pung Ana.* 12 Jadi sapa yang parcaya Antua pung Ana, dia nanti hidop tarus-tarus deng Antua. Mar sapa yang seng parcaya Antua pung Ana, dia seng bisa hidop tarus-tarus deng Antua.
Hidop tarus-tarus deng Allah
5:13-21
13 Basudara samua yang parcaya Allah pung Ana, beta tulis surat ni biar kamong tau batul-batul kalo kamong su mulai hidop tarus-tarus deng Allah. 14 La katong seng usa taku waktu katong sombayang par Allah. Barang, katong tau kalo apa sa yang katong minta dari Antua, Antua pasti dengar akang, asal apa yang katong minta tu sama deng apa yang Antua mau. 15 La kalo katong tau Antua salalu dengar apa yang katong minta, katong jua tau kalo Antua su biking akang.
16 Jadi, kalo kamong tau kalo kamong pung basudara yang iko Yesus ada biking dosa, biar kata dosa tu seng biking dia tapisa dari Allah tarus-tarus, kamong musti sombayang par Allah biar Antua kasi salamat dia la dia bisa hidop tarus-tarus deng Antua. Beta ada bicara soal dosa-dosa yang seng biking orang tapisa dari Allah tarus-tarus. Mar ada dosa yang bisa biking orang tapisa dari Allah tarus-tarus. Kalo yang macang bagitu tu, beta seng paksa kamong musti sombayang biar Allah kasi salamat orang yang biking dosa tu. 17 Sapa sa yang biking apapa yang jahat, dia tu su biking dosa. Mar ada dosa yang seng biking orang tapisa dari Allah tarus-tarus.
18 Katong tau kalo sapa yang jadi Allah pung ana, dia seng biking dosa tarus-tarus lai. Barang, Allah pung Ana jaga dia tarus. Jadi Setang pung Rajaa seng bisa biking apapa dia. 19 Katong tau kalo katong ni Allah pung anana. Katong jua tau kalo Setang pung Raja pegang parenta par samua orang yang seng kanal Allah.
20 Katong jua tau kalo Allah pung Ana su datang ka dunya ni la biking sampe katong bisa kanal Allah yang batul. Katong satu hati deng Allah yang batul tagal katong su satu hati deng Antua pung Ana Yesus Kristus. Antua tu Allah yang batul deng yang biking orang hidop tarus-tarus. Seng ada Allah yang laeng lai.
21 Jadi anana e, jaga diri bae-bae jang sampe kamong somba ka taru harap par apa sa yang bukang Allah.b
Hormat, Yohanis