Langit baru deng dunya baru
21:1-8
21
1 Abis beta lia Allah hukum orang satu-satu iko apa yang dong su biking, beta lia langit deng dunya baru. Barang langit deng dunya yang partama su seng ada lai, deng lautang jua su seng ada lai.* 2 Beta lia kota yang kudus, Yerusalem baru tu, turung dari Allah di sorga. Kota tu paleng bagus macang deng panganting parampuang yang su bahias par dia pung panganting laki-laki.* 3 Tarus, beta dengar suara basar dari kadera raja tu bilang kata, “Lia! Allah pung tampa tinggal ada di tenga-tenga manusia. Antua nanti tinggal sama-sama deng dong, deng dong nanti jadi Antua pung orang-orang. Antua sandiri nanti ada deng dong, deng Antua jadi dong pung Allah.* 4 Antua nanti seka dong pung aer mata. Seng ada kamatiang lai. La dong nanti seng marata, ka manangis, ka rasa saki lai, tagal dunya partama su seng ada lai.”*5 La Antua yang dudu di kadera raja tu bilang, “Lia! Beta biking samua jadi baru.” Antua bilang lai, “Tulis apa yang Beta bilang ni, tagal kata-kata ni batul jadi orang bisa parcaya akang.” 6 La Antua bilang lai par beta kata, “Samua su klar! Beta ni Alfa deng Omega, Yang Partama deng Yang Laste. Sapa sa yang aos, Beta nanti kasi minong dia deng cuma-cuma dari mata aer yang biking dia hidop tarus-tarus.* 7 Sapa yang manang, dia nanti tarima samua yang Beta bilang tu. La Beta jadi dia pung Allah deng dia jadi Beta pung ana.* 8 Mar sapa yang taku iko Beta, sapa yang seng parcaya, sapa yang pung kalakuang-kalakuang paleng jahat, sapa yang bunu orang, sapa yang tidor deng orang yang bukang dia pung laki ka bini, sapa yang pake-pake, sapa yang somba apa sa yang bukang Allah, deng samua orang yang mulu parlente, dong samua tu nanti dapa siksa dalang lautang api walirang yang manyala-manyala. Itu tu kamatiang kali kadua.”
Yerusalem baru
21:9-27
9 Abis itu, satu dari tuju malekat yang pegang tuju cawan, yang pono deng tuju cilaka yang laste tu, dia datang par beta la bilang kata, “Mari sini! Beta mau kasi unju panganting parampuang yang mau kaweng deng Domba Ana tu par ale.” 10 La Allah pung Roh pimping beta, la malekat tu bawa beta ka atas gunung yang tinggi paskali. Di sana malekat tu kasi unju par beta kota yang kudus, Yerusalem tu, turung dari Allah di sorga.* 11 Kota tu pung sinar tarang tagal cahaya yang datang dari Allah. Akang pung tarang macang deng batu permata yaspis, jarning macang deng kaca. 12 Kota tu dapa ron deng tembok yang tinggi paskali. Akang pung pintu maso ada sapulu dua bua. Di satu-satu pintu tu ada satu malekat yang jaga akang, deng ada tatulis satu nama dari sapulu dua suku Israel di akang. 13 Dari sapulu dua pintu tu, tiga tangada matahari nai, tiga tangada matahari maso, tiga tangada utara, deng tiga lai tangada salatang.* 14 Tembok kota tu ada pung sapulu dua batu pandasi. Di batu tu, satu-satu ada tatulis satu nama dari Domba Ana pung sapulu dua utusang.
15 Malekat yang bicara deng beta tu ada pegang tongka pangukur dari mas par ukur kota tu, akang pung pintu maso, deng akang pung tembok-tembok.* 16 Kota tu segi ampa. Akang pung panjang deng lebar sama. La malekat tu ukur kota tu pake tongka tu. Dia dapa akang pung lebar, tinggi, deng panjang 12.000 stadia.a 17 Dia ukur tembok tu lai. La akang pung tabal 144 hasta.b Ukurang yang dia pake tu sama deng ukurang yang manusia biasa pake. 18 Kota tu pung tembok dapa biking dari batu permata yaspis. La antero kota tu dari mas asli, mangkilat macang deng kaca. 19 Sapulu dua batu pandasi di kota tu pung tembok-tembok dapa hias deng sagala macang batu permata yang bagus-bagus deng yang rupa-rupa warna. Batu pandasi yang partama pake batu yaspis, yang kadua pake batu nilam, yang katiga pake batu mira, yang kaampa pake batu samrud, 20 yang kalima pake batu unam, yang kaanam pake batu sardis, yang katuju pake batu ratna cempaka, yang kadalapang pake batu beril, yang kasambilang pake batu krisolit, yang kasapulu pake batu krisopras, yang kasapulu satu pake batu lasuardi, deng yang kasapulu dua pake batu kecubung. 21 La sapulu dua pintu maso tu dapa biking dari sapulu dua mutiara, satu pintu satu mutiara. La kota pung jalang basar dapa biking dari mas asli, yang mangkilat macang deng kaca.*
22 Dalang kota tu beta seng lia tampa sombayang, tagal Tuhan Allah yang pung Kuasa Paleng Basar deng Domba Ana sandiri ada di situ. 23 Kota tu seng parlu matahari ka bulang par biking tarang akang lai, tagal Allah pung sinar tarang deng Domba Ana tu su kasi tarang kota tu.* 24 Bangsa-bangsa di dunya nanti hidop dalang tarang tu, deng raja-raja nanti bawa dong pung harta ka dalang kota tu.* 25 Kota tu pung pintu-pintu maso tabuka tarus deng seng parna tatutu, tagal seng ada malang di sana. 26 Orang-orang dari bangsa-bangsa nanti bawa dong pung harta samua ka dalang kota tu par taru hormat par Allah deng Domba Ana.* 27 Mar, orang-orang yang pung kalakuang jahat, orang-orang yang somba apa sa yang bukang Allah, ka orang-orang yang mulu parlente, dong seng bole maso ka dalang kota tu. Cuma orang-orang yang pung nama ada tatulis dalang Domba Ana pung buku yang isi nama-nama orang yang nanti hidop tarus-tarus deng Allah sa yang bisa maso ka situ.*