Aer deng pohong yang biking orang hidop tarus-tarus
22:1-5
22
1 Abis malekat kasi unju kota tu par beta, dia kasi unju aer yang biking orang hidop tarus-tarus. Aer tu jarning macang deng kaca. Akang kaluar dari Allah deng Domba Ana pung kadera raja, 2 deng akang bajalang di tenga-tenga jalang basar di kota tu.* Di aer tu pung pinggir-pinggir ada pohong yang biking orang hidop tarus-tarus. Pohong tu babua satu taong sapulu dua kali, jadi sabang bulang akang babua. La akang pung daong-daong jadi obat par bangsa-bangsa.* 3 Dalang kota tu seng ada apapa yang Allah kutok.* Allah deng Domba Ana pung kadera raja ada dalang kota tu deng Antua pung jongos-jongos somba Antua. Dong tu samua orang yang parcaya. 4 Dong lia Antua pung muka, la Antua pung nama tatulis di dong pung testa. 5 Seng ada malang lai di kota tu. Dong seng parlu lampu deng matahari lai tagal Tuhan Allah sandiri yang kasi tarang dong. La dong pegang parenta tarus-tarus.*Yesus su mau datang
22:6-17
6 Abis itu, malekat tu bilang par beta kata, “Kata-kata ni batul deng orang bisa parcaya akang. Tuhan Allah yang kasi Antua pung Roh par Antua pung juru-juru bicara tu suru malekat datang kasi unju par Antua pung jongos-jongos soal apa yang seng lama lai mau jadi.”
7 Yesus bilang, “Dengar! Seng lama lai Beta datang! Sapa yang iko kata-kata soal apa yang nanti jadi, yang tatulis dalang kitab ni, dia tu paleng baruntung.”
8 Beta Yohanis yang su dengar deng lia samua-samua tu. Abis beta dengar deng lia akang, beta tikang lutu par somba malekat yang su kasi unju akang par beta. 9 Mar dia bilang par beta, “Jang biking bagitu! Beta ni Allah pung jongos sama deng ale, deng ale pung basudara juru-juru bicara, deng samua orang yang iko kata-kata yang ada dalang kitab ni. Somba Allah sa!” 10 La dia bilang lai par beta, “Jang tutu mati kata-kata dari Allah soal apa yang nanti jadi, yang tatulis dalang kitab ni. Barang, akang pung waktu su dekat. 11 Orang-orang jahat, kasi biar dong biking kajahatang tarus. Orang-orang yang pung pikirang kotor, kasi biar dong bagitu tarus. La orang-orang yang hidop iko Allah pung mau, kasi biar dong biking akang tarus. Orang-orang yang pung hidop barsi, kasi biar dong bagitu tarus.”*
12 Yesus bilang, “Dengar! Seng lama lai Beta datang! Beta datang bawa hadia ka hukumang par balas orang-orang iko apa yang dong su biking.* 13 Beta ni Alfa deng Omega, Yang Partama deng Yang Laste.”* 14 Orang yang basu dong pung baju panjang luar sampe barsi, dong tu paleng baruntung. Barang, dong tu yang nanti dapa hak par lewat pintu-pintu maso ka dalang kota tu deng par makang bua dari pohong yang biking orang hidop tarus-tarus.* 15 Mar sapa yang pung kalakuang jahat, sapa yang pake-pake, sapa yang tidor deng orang yang bukang dia pung laki ka bini, sapa yang bunu orang, sapa yang somba apa sa yang bukang Allah, deng sapa sa yang suka parlente orang deng dia pung mulu ka kalakuang, dong samua tu seng bole maso ka dalang kota tu.
16 Yesus bilang, “Beta Yesus su utus Beta pung malekat par pi kasi tau samua hal tu par kamong, biar kamong kasi tau akang par jamaat-jamaat. Beta ni Raja Daud pung Turunang. Beta ni Bintang Timur yang tarang.”*
17 Allah pung Roh deng panganting parampuanga bilang kata, “Datang jua!”
Sapa yang dengar pasáng ni mari bilang, “Datang jua!”
Sapa yang aos, mari datang! Sapa yang mau minong, mari ambe aer yang biking orang hidop tarus-tarus tu deng cuma-cuma.*
Kata-kata laste
22:18-21
18 Beta kasi inga deng sunggu-sunggu par sapa sa yang su dengar kata-kata dari Allah soal apa yang nanti jadi, yang tatulis dalang kitab ni: Sapa yang tamba apa sa par kata-kata yang tatulis dalang kitab ni, Allah nanti tamba cilaka-cilaka yang tatulis dalang kitab ni par dia.* 19 La sapa yang kasi kurang apa sa dari kata-kata dari Allah soal apa yang nanti jadi, yang tatulis dalang kitab ni, Allah nanti cabu dia pung hak par makang bua dari pohong yang biking orang hidop tarus-tarus deng hak par tinggal di kota kudus, macang deng yang tatulis dalang kitab ni.
20 Antua yang kasi tau soal samua ni bilang, “Batul, seng lama lai Beta datang.”
Beta Yohanis bilang, “Amin! Datang jua Tuhan Yesus!”
21 Beta minta biar Tuhan Yesus kasi berkat basar par Antua pung orang-orang samua. Amin.