Samua di sorga puji Tuhan
19:1-4
19
1 Abis itu, beta dengar suara macang deng orang banya paskali pung suara di sorga bilang,“Puji Tuhan!
Mari katong angka tinggi-tinggi katong pung Allah
yang pung kuasa paleng basar deng yang kasi salamat katong.
2 Barang, Antua putus parkara deng batul deng seng barát sabala.
Antua su hukum kota Babel yang macang deng parampuang tarbae yang top tu.
Barang, orang-orang di kota tu su buju samua orang di dunya par iko dong pung kalakuang jahat.
Allah su balas dong tagal dong su bunu Antua pung jongos-jongos.”*
3 La orang banya tu bilang par kali kadua,
“Puji Tuhan!
Asap dari api yang bakar kota basar tu nai sampe tarus-tarus.”*
4 Tarus, dua pulu ampa pamimping deng ampa makluk tu tikang lutu la somba Allah yang dudu di kadera raja. Dong bilang,
“Amin! Puji Tuhan!”
Domba Ana pung pesta kaweng
19:5-10
5 Tarus, beta dengar suara dari kadera raja bilang kata,
“He kamong samua Allah pung jongos,
puji katong pung Allah!
He kamong yang dengar-dengarang Antua,
orang kacil ka basar, puji Antua!”*
6 Abis itu, beta dengar suara macang deng orang banya paskali pung suara. Akang sama deng hener basar pung suara deng guntur basar pica. Suara tu bilang,
“Puji Tuhan!
Barang, katong pung Tuhan Allah yang pung Kuasa Paleng Basar su pegang parenta par samua!*
7 Mari katong barsuka deng hati sanang!
Mari angka Antua tinggi-tinggi!
Barang su waktu par Domba Ana pung pesta kaweng.
La Antua pung panganting parampuanga tu su siap lai.
8 Allah su kasi pakiang dari kaeng lenan alus
yang mangkilat deng barsi par dia pake.”
(Kaeng lenan alus tu pung arti Allah pung orang-orang pung kalakuang-kalakuang yang batul.)
9 La malekat tu bilang par beta kata, “Tulis bagini: Sapa yang dapa undang ka Domba Ana pung pesta kaweng, dia tu paleng baruntung!” Malekat tu bilang lai kata, “Kata-kata tu batul, akang dari Allah.”*
10 La beta tikang lutu di muka malekat tu par somba dia, mar dia bilang par beta, “Jang biking bagitu! Beta ni Allah pung jongos sama deng ale deng ale pung basudara yang pi kasi tau Allah pung pasáng yang Yesus bilang. Somba Allah sa! Barang, itu Allah pung Roh yang kasi kuasa par orang-orang par kasi tau pasáng dari Allah yang Yesus bilang tu.”
Yang dudu di kuda puti deng samua tantara sorga pi prang
19:11-21
11 Tarus beta lia sorga tabuka* la kuda puti saekor ada di situ. Yang dudu di kuda tu pung nama Yang Pegang Janji deng Yang Batul. Antua batul waktu putus parkara deng waktu baku prang.* 12 Antua pung mata tarang paskali macang deng api yang manyala basar, deng di Antua pung kapala ada banya makota. Di Antua pung badang ada tatulis satu nama, yang cuma Antua sandiri sa yang tau akang pung arti.* 13 Antua pake baju panjang luar yang su dapa colo dalang dara. Antua pung nama tu Allah pung Kata-Kata.* 14 Samua tantara sorga iko Antua. Dong nai kuda puti deng pake baju dari kaeng lenan alus yang puti barsi. 15 La ada parang tajang satu kaluar dari Antua pung mulu yang Antua pake par hantam bangsa-bangsa. Antua nanti pegang parenta par dong deng karas.* Antua kasi binasa dong macang deng orang ramas anggor par ambe akang pung aer. Deng cara bagitu, Antua kasi unju Allah yang pung Kuasa Paleng Basar tu pung morka yang hebat paskali.* 16 Di Antua pung baju panjang luar di bagiang paha ada tatulis:
Raja dari sagala raja deng Tuhan dari sagala tuhan.
17 La beta lia malekat satu badiri di matahari. Dia tabaos kuat-kuat par samua burung makang bangke yang tarbang tinggi di langit kata, “He! Mari bakumpul par iko Allah pung pesta makang basar. 18 Mari datang makang daging dari raja-raja, panglima-panglima, tantara-tantara, kuda-kuda lapis deng orang-orang yang nai akang, deng dari samua orang biar kata jongos ka bukang jongos, orang kacil ka basar.”*
19 Abis itu, beta lia binatang tu deng raja-raja di dunya deng dong pung tantara-tantara su bakumpul par prang lawang Antua yang dudu di kuda puti tu deng Antua pung tantara-tantara. 20 Mar, binatang tu dapa tangkap sama-sama deng juru bicara parlente, yang biking tanda-tanda herang deng kuasa dari binatang tu. Deng tanda-tanda herang tu dia parlente orang-orang yang su tarima binatang tu pung tanda deng somba akang pung patong. Binatang deng juru bicara parlente tu dapa lempar hidop-hidop dalang lautang api walirang yang manyala-manyala.* 21 La Antua yang dudu di kuda puti tu bunu samua orang laeng deng parang yang kaluar dari Antua pung mulu. La samua burung tu makang dong pung bangke sampe kanyang.