Tuhan Allah kasi ancor kota Babel
18:1-24
18
1 Abis itu, beta dapa lia malekat satu lai turung dari sorga. Malekat tu pung kuasa basar deng dia pung sinar paleng tarang sampe dunya jadi tarang. 2 Dia tabaos kuat-kuat kata,“Su rubu! Kota basar Babel tu su rubu rata deng tana!*
Akang su jadi setang-setang deng sagala roh jahat pung tampa tinggal
deng tampa basambunyi par sagala macang burung yang haram deng yang orang paleng binci.*
3 Barang, orang-orang di kota tu su buju samua bangsa di dunya par iko dong pung napsu jahat,
macang deng parampuang tarbae yang kasi mabo laki-laki deng dia pung anggor par tidor deng dia.
Raja-raja di dunya su biking kajahatang sama-sama deng orang-orang Babel,
macang deng laki-laki yang tidor deng parampuang tarbae.
Orang-orang di dunya yang badagang, dong jadi kaya
tagal orang-orang Babel paleng napsu balanja barang mahal-mahal deng bagus-bagus.”*
4 La beta dengar suara laeng lai dari sorga yang bilang kata,
“Beta pung orang-orang e!
Kaluar dari Babel tu!
Jang kamong iko dong di situ pung dosa-dosa,
biar waktu Babel dapa sagala cilaka, jang kamong jua dapa akang.*
5 Barang, dong di Babel pung dosa su batambong-tambong sampe ka langit
deng Allah seng lupa dong pung kajahatang-kajahatang.*
6 Balas dong macang deng apa yang dong su biking par orang laeng.
Balas dong dua kali lipa dari apa yang dong su biking tu.
Campor minomang dalang dong pung cawan sandiri par dong minong.
Campor akang dua kali labe pait dari minomang yang dong su kasi par orang laeng.*
7 Biking dong susa deng sangsara deng marata
sama banya deng dong pung sombong deng hidop hura-hura.
Barang, dong angka-angka diri dalang hati kata,
‘Beta ni ratu yang pegang parenta!
Beta bukang janda deng nanti seng parna marata.’*
8 Tagal dong angka-angka diri tu,
dalang waktu satu hari sa dong nanti dapa sagala cilaka ni.
Dong nanti mati, marata, deng susa makanang,
la kota tu nanti tabakar deng api.
Barang Tuhan Allah yang putus dong pung parkara tu,
Allah yang pung kuasa paleng basar.”
9 Raja-raja di dunya yang su biking kajahatang sama-sama deng orang-orang Babel, deng yang su hidop hura-hura sama-sama deng dong, raja-raja tu nanti manangis marata par kota Babel tu waktu dong lia asap dari kota yang tabakar tu. 10 Dong nanti badiri jau paskali dari kota tu, tagal dong takotang kalo dong nanti dapa hukumang macang bagitu lai. La dong bilang,
“Sio e! Cilaka kota basar Babel!
Cilaka kota yang hebat tu,
tagal dalang satu jam sa akang su ancor!”*
11 Orang-orang di dunya yang badagang manangis marata par Babel tu. Barang, seng ada orang lai yang bali dong pung barang-barang* 12 dari mas, perak, permata, deng mutiara. Seng ada orang lai yang bali dong pung kaeng yang mahal-mahal macang kaeng lenan alus, kaeng warna biji gandaria, kaeng sutra, deng kaeng mera. Seng ada orang lai yang bali dong pung kayo-kayo yang bobou sadap, barang-barang dari gading, kayo yang mahal, besi, tambaga, deng batu marmer. 13 Seng ada orang lai yang bali dong pung kayo manis, rampa-rampa yang bobou sadap, minya bobou sadap, mur, deng kamanyaang. Seng ada orang lai yang bali dong pung anggor, minya saitun, tarigu, deng biji gandum. Seng ada orang lai yang bali dong pung sapi, domba, kuda, kareta, deng orang-orang par jadi jongos.*
14 Orang-orang badagang tu bilang,
“Sio orang-orang Babel e! Barang-barang yang kamong pung hati inging tu su seng ada lai.
Kamong pung sagala barang yang mahal-mahal deng bagus-bagus tu su ilang dari kamong.
Kamong seng bisa dapa akang lai.”
15 Orang-orang badagang yang jual barang-barang tu deng yang su jadi kaya tagal orang-orang Babel, dong badiri jau-jau, tagal dong taku jang sampe dong dapa hukumang tu lai. Dong manangis marata par kota Babel* 16 la bilang kata,
“Sio e! Cilaka kota basar Babel!
Cilaka orang-orang yang dolo pake pakiang bagus-bagus dari kaeng lenan, kaeng warna biji gandaria, deng kaeng kirmisi,
deng yang pake barang-barang dari mas, permata, deng mutiara.
17 Barang, dalang satu jam sa kamong pung harta banya tu binasa abis!”
Samua juru mudi, panumpang, ana bua kapal, deng orang-orang yang mancari di lautang badiri jau-jau sa.* 18 Dong lia asap dari kota yang tabakar tu la bataria, “Seng ada kota yang sama deng kota basar Babel tu!” 19 Dong ambe abu la ambor akang di dong pung kapala par jadi tanda kalo dong pung hati susa. Dong manangis marata kata,
“Sio e! Cilaka kota basar Babel!
Cilaka kota yang dari akang pung barang-barang mahal
samua orang yang pung kapal di lautang jadi kaya!
Barang, dalang satu jam sa akang su binasa abis!”*
20 Mar ada suara dari sorga yang bilang kata,
“He kamong yang ada di sorga e!
Mari barsuka, tagal Allah su kasi binasa Babel!
He Allah pung orang-orang, utusang-utusang, deng juru-juru bicara e!
Mari barsuka, tagal Allah su hukum orang-orang Babel
par balas apa yang dong su biking par kamong!”*
21 Abis itu, malekat satu yang kuat ambe batu basar paskali yang basar sama deng batu giling gandum la lempar akang ka dalang lautang, la bilang,
“Deng cara bagitu, kota basar Babel tu nanti dapa lempar ka bawa kuat-kuat
sampe seng bisa dapa akang lai.
22 La suara musik dari orang-orang yang manyanyi, maeng kecapi, deng tiop suling deng trompet,
seng dapa dengar di kota tu lai.
La tukang batu, tukang kayo, ka tukang-tukang laeng
seng karja di kota tu lai.
Bagitu jua batu giling gandum pung suara
seng dapa dengar di situ lai.
23 Seng ada lampu manyala dalang kota tu lai
deng seng ada suara pesta kaweng lai.
Kota basar tu dapa hukum macang bagitu,
tagal orang-orang badagang yang tinggal di situ paleng kaya di dunya ni,
deng tagal orang-orang di kota tu pake pakatang-pakatang
par parlente samua bangsa di dunya biar dong seng iko Allah.
24 Kota basar tu dapa hukum macang bagitu,
tagal orang-orang di situ su bunu Allah pung juru-juru bicara, Antua pung orang-orang yang laeng,
deng samua orang yang su dapa bunu di antero dunya.”*