Kota Babel dapa hukum
17:1-18
17
1 Abis itu, satu dari tuju malekat yang bawa tuju cawan tu datang par beta la bilang kata, “Mari sini! Beta mau kasi unju par ale bagemana Allah hukum kota basar Babel yang ada di pinggir aer-aer banya tu. Kota Babel tu macang deng parampuang tarbae yang top. 2 Raja-raja di dunya tidor deng dia. La orang-orang di dunya su dapa buju dari dia par minong dia pung anggor sampe mabo la tidor deng dia.”3 Tarus, Allah pung Roh pimping beta la malekat tu bawa beta ka padang gurun. Di situ beta lia parampuang satu dudu di atas binatang satu yang warna mera tua. Binatang tu pung badang pono deng kata-kata yang hina Allah, yang bilang kalo akang tu Allah. Binatang tu pung kapala tuju deng tando sapulu. 4 Parampuang tu pake baju warna biji gandaria deng mera tua yang dapa hias deng mas, macang-macang permata, deng mutiara. La di dia pung tangang ada cawan mas yang pono deng dia pung sagala kajahatang deng hal-hal yang kurang-kurang ajar.* 5 La di parampuang tu pung testa ada tatulis satu nama yang pung arti masi tatutu mati. Nama yang tatulis tu bagini,
“Beta ni kota basar Babel,
samua parampuang tarbae asal dari beta
deng samua hal yang kurang-kurang ajar di dunya datang dari beta.”
6 La beta lia parampuang tu mabo tagal minong Allah pung orang-orang pung dara. Dong tu yang kasi tau soal Yesus par orang-orang.
Waktu beta lia parampuang tu, beta taherang-herang paskali. 7 La malekat tu bilang par beta kata, “Mangapa kong ale taherang-herang? Mari beta kasi tau rahasia soal parampuang tu deng binatang yang bawa dia, yang pung kapala tuju deng tando sapulu tu. 8 Binatang yang ale lia tu parna hidop deng sakarang su mati.* Mar akang nanti muncul dari setang-setang pung tampa deng akang nanti binasa. La samua orang di dunya yang seng parcaya Allah nanti taherang-herang lia binatang tu. Dong tu orang-orang yang dari waktu Allah balong biking dunya ni lai, dong pung nama seng tatulis dalang buku yang isi nama-nama orang yang nanti hidop tarus-tarus deng Antua. Dong taherang-herang tagal binatang tu parna hidop, sakarang su mati, mar nanti muncul kombali.*
9 Katong parlu pikirang tajang par mangarti soal samua tu. Tuju kapala dari binatang tu pung arti tuju gunung yang parampuang tu ada dudu di atas akang. 10 Tuju kapala tu jua pung arti tuju raja. Lima raja su mati, yang satu masi pegang parenta, la yang satu lai balong muncul. Nanti kalo dia muncul, dia pegang parenta mar seng lama. 11 La binatang yang parna hidop deng su mati tu, dia tu raja kadalapang. Dia satu dari tuju raja tu. Dia pegang parenta dua kali, mar nanti binasa. 12 Sapulu tando yang ale lia tu pung arti sapulu raja yang balong pegang parenta. Dong nanti dapa kasi kuasa par pegang parenta satu jam sa sama-sama deng binatang tu.* 13 Sapulu raja tu satu hati par kasi dong pung hak deng kuasa par binatang tu. 14 Binatang deng sapulu raja tu nanti prang lawang Domba Ana, mar Domba Ana nanti kasi kala dong, tagal Antua tu Tuhan dari sagala tuhan deng Raja dari sagala raja. La orang-orang yang Antua su panggel, su pili, deng yang iko Antua tarus, dong ada sama-sama deng Antua.”
15 Malekat tu bilang lai par beta, “Aer-aer banya yang ale su lia, tampa parampuang tarbae tu dudu, akang pung arti orang banya paskali dari sagala mata ruma, bangsa, deng bahasa. 16 Sapulu tando yang ale lia deng binatang tu nanti sama-sama satu hati par binci parampuang tarbae tu. Dong nanti rampas sagala macang barang yang parampuang tarbae tu pung deng kasi tinggal dia talanjang. Dong nanti makang dia pung daging la bakar yang sisa dalang api. 17 Barang Allah su kasi pikirang par dong par biking Antua pung rencana. Jadi Antua biking dong satu hati par kasi dong pung kuasa par binatang tu. La dong nanti iko binatang tu pung mau sampe apa yang Allah bilang jadi. 18 La parampuang yang ale lia tu pung arti kota basar Babel yang pegang parenta par samua raja di dunya.”