Tuju cilaka
16:1-21
16
1 Tarus, beta dengar suara basar dari Allah pung Ruma. Suara tu bilang par malekat tuju tu kata, “Pi suda la kasi tumpa Allah pung morka yang ada dalang tuju cawan tu ka dunya.”2 Jadi, malekat partama pi la kasi tumpa dia pung cawan pung isi ka daratang. Skrek lai, bisol-bisol yang biking orang rasa saki paskali ada di samua orang yang tarima binatang tu pung tanda deng somba akang pung patong.*
3 Abis itu, malekat kadua kasi tumpa dia pung cawan pung isi ka lautang. Skrek lai, lautang jadi dara yang bobou busu macang deng orang mati pung dara, la samua yang hidop dalang lautang tu mati.
4 Tarus, malekat katiga kasi tumpa dia pung cawan pung isi ka aer-aer basar deng mata-mata aer la samua aer tu jadi dara.* 5 Abis itu, beta dengar malekat yang pung kuasa par samua aer yang ada di lautang deng daratang bilang kata,
“Sio Tuhan, Tuhan yang Kudus, yang su ada dari dolo-dolo lai deng yang ada sakarang.
Hukumang yang Tuhan kasi turung ka dunya tu batul deng seng barát sabala.
6 Barang, orang-orang di dunya tu su bunu deng kasi tumpa Tuhan pung orang-orang deng juru-juru bicara pung dara.
Jadi, Tuhan su biking samua aer jadi dara par dong minong tagal hukumang tu pas par dong.”*
7 La beta dengar suara dari meja tampa bakar korbang bilang bagini,
“Batul Tuhan! Tuhan Allah yang pung Kuasa Paleng Basar.
Tuhan putus sagala parkara deng batul deng seng barát sabala.”*
8 Abis itu, malekat kaampa kasi tumpa dia pung cawan pung isi ka matahari. La matahari dapa kuasa par bakar manusia pung kuli deng akang pung panas yang macang deng api. 9 Orang-orang yang pung kuli angos tagal matahari pung panas yang luar biasa tu, dong hina Allah pung nama, Allah yang pung kuasa par biking cilaka-cilaka tu. La biar kata dong su dapa cilaka-cilaka macang bagitu, mar dong seng mau kasi tinggal dong pung dosa-dosa deng seng mau puji-puji Antua.
10 Tarus malekat kalima kasi tumpa dia pung cawan pung isi ka binatang jahat tu pung kadera raja. Skrek lai, galap datang tutu orang-orang yang dapa parenta dari binatang tu, la dong samua gigi lida tagal dong paleng sangsara.* 11 La dong hojat Allah di sorga tagal dong paleng rasa saki paskali deng tagal bisol-bisol yang dong dapa tu. Mar, dong seng mau kasi tinggal kajahatang-kajahatang yang dong biking.
12 Abis itu, malekat kaanam kasi tumpa dia pung cawan pung isi ka aer basar Efrat. Skrek bagini, aer basar tu karing, biar akang jadi jalang par raja-raja yang datang dari sabala matahari nai.* 13 Tarus, beta lia tiga roh jahat yang pung rupa macang deng kodo. Roh-roh jahat tu satu kaluar dari naga* pung mulu, satu dari binatang yang kaluar dari dalang lautang* pung mulu, deng satu lai dari binatang yang kaluar dari dalang tana* tu pung mulu. Binatang dari dalang tana tu dapa panggel par juru bicara parlente. 14 Roh-roh jahat tu biking tanda-tanda herang. Dong pi kumpul raja-raja di antero dunya par iko prang. Prang tu jadi pas hari waktu Allah yang pung Kuasa Paleng Basar tu kasi kala Antua pung musu-musu.
15 Tuhan Yesus bilang, “Dengar bae-bae! Beta datang macang deng pancuri, seng saorang lai yang tau! Baruntung par sapa yang tetap jaga-jaga deng salalu kasi siap pakiang par dia pake, biar dia seng talanjang la malu waktu orang lia dia.”*
16 La roh-roh jahat tu kumpul raja-raja di tampa satu. Dalang bahasa Ibrani, tampa tu pung nama Harmagedon.*
17 Abis itu, malekat katuju kasi tumpa dia pung cawan pung isi ka langit. La ada suara basar dari Allah pung kadera raja di Antua pung Ruma. Suara tu bilang, “Samua su klar.” 18 La kilat baku sambung, guntur pica, deng tana goyang paleng basar. Mulai dari manusia ada di dunya ni, balong parna ada tana goyang macang bagitu. Tana goyang tu paleng hebat * 19 sampe kota basar Babel tabage jadi tiga bagiang, deng kota-kota di antero dunya ancor lai. Deng bagitu, Allah balas orang-orang di Babel pung kajahatang-kajahatang. Itu sama sa Antua kasi dong minong anggor pait dari Antua pung cawan. Anggor tu pung arti Antua pung morka yang hebat paskali.* 20 Waktu tana goyang hebat tu jadi, samua pulo deng gunung ilang.* 21 Ujang es basar yang barát mangkali barang lima pulu kilo jatu dari langit la kana orang-orang. La orang-orang hojat Allah tagal ujang es, cilaka yang paleng luar biasa tu.*