Malekat tuju deng tuju cilaka
15:1-8
15
1 Tarus, beta dapa lia tanda laeng di sorga. Akang hebat deng luar biasa. Beta lia malekat tuju yang pung kuasa par biking tuju cilaka yang laste. Abis tuju cilaka ni Allah pung morka par manusia di dunya abis. 2 Tarus, beta lia apapa satu lai yang lia macang deng lautang kaca yang tacampor deng api. Di akang pung pinggir ada orang-orang badiri. Dong tu orang-orang yang su manang lawang binatang partama tu tagal dong seng somba akang deng akang pung patong, deng seng tarima tanda dari akang pung nama deng angka di dong pung testa deng tangang. Dong yang su manang tu ada pegang kecapi yang Allah kasi par dong. 3 Dong samua manyanyi Allah pung jongos Musa deng Domba Ana pung lagu. Akang bagini,“Sio Tuhan, Allah yang pung Kuasa Paleng Basar!
Samua yang Tuhan biking tu hebat deng luar biasa!
Sio Tuhan, Raja par samua bangsa!
Samua yang Tuhan biking tu batul deng seng barát sabala!*
4 Sapa yang nanti seng taku Tuhan?
Deng manusia sapa yang nanti seng carita soal Tuhan pung hebat?
Barang cuma Tuhan sa yang kudus.
Samua bangsa di dunya nanti datang somba Tuhan,
tagal Tuhan su kasi unju kalo samua yang Tuhan biking tu batul.”*
5 Abis itu, beta lia Allah pung Ruma di sorga tabuka. Itu tu Tenda Sombayang yang kasi unju kalo Allah ada di situ.* 6 La malekat tuju yang pung kuasa par biking tuju cilaka tu kaluar dari Allah pung Ruma. Dong pung pakiang dari kaeng lenan puti barsi yang mangkilat. Dong jua pake salempang mas di dada. 7 La satu dari ampa makluk kasi cawan mas tuju par malekat tuju tu. Cawan-cawan tu pono deng Allah yang hidop tarus-tarus pung morka. 8 Tarus Allah pung Ruma tu pono deng asap. Asap tu tanda kalo Allah tu paleng hebat deng pung kuasa paleng basar. Seng saorang lai bisa maso ka situ sampe tuju cilaka yang malekat tuju biking tu su klar.*