Domba Ana deng orang-orang yang Dia kasi salamat
14:1-5
14
1 Abis itu, beta dapa lia Domba Ana badiri di atas gunung Sion. Dia badiri sama-sama deng 144.000 orang yang di dong pung testa ada tatulis Domba Ana pung nama deng Dia pung Bapa pung nama.* 2 La beta dengar suara dari sorga macang deng hener basar deng guntur basar pica. Suara tu dengar macang deng suara musik dari orang banya yang maeng kecapi. 3 Dong 144.000 orang tu manyanyi lagu baru satu di muka kadera raja, ampa makluk, deng dua pulu ampa pamimping. Seng satu lai yang tau lagu tu, cuma dong 144.000 orang dari dunya yang Allah su kasi salamat tu sa. 4 Dong tu, orang-orang yang pung hidop barsi, sama deng laki-laki yang seng tidor deng parampuang yang bukang dia pung bini. Dong iko Domba Ana tu ka mana sa Dia pi. Dari samua manusia, dong tu yang su dapa tabus par jadi Allah deng Domba Ana pung orang-orang. Dong tu macang deng hasil partama dari kabong yang orang kasi par Allah. 5 Dong seng mulu parlente deng seng biking apapa yang sala.*Malekat tiga deng dong pung pasáng
14:6-13
6 Tarus, beta lia malekat satu laeng tarbang tinggi di langit. Malekat tu bawa Kabar Bae yang ada tarus-tarus par kasi tau akang par samua orang di dunya dari sagala bangsa, suku, bahasa, deng mata ruma. 7 Malekat tu tabaos kata, “Taru hormat par Allah deng puji-puji Antua, tagal sakarang su waktu par Antua putus samua orang di dunya pung parkara. Somba Antua yang biking langit, dunya, lautang, deng samua mata aer!”
8 Abis itu, malekat kadua datang la bilang kata, “Su rubu! Kota basar Babel tu su rubu rata deng tana! Barang, orang-orang di kota tu su buju samua bangsa di dunya par iko dong pung napsu jahat, macang deng parampuang tarbae yang kasi mabo laki-laki deng dia pung anggor par tidor deng dia.”*
9 Abis itu malekat katiga datang dari balakang dua malekat tu la tabaos kata, “Sapa sa yang somba binatang tu deng akang pung patong, deng tarima akang pung tanda di dia pung testa ka tangang, 10 dia nanti tarima Allah pung morka deng hukumang yang Antua seng kasi kurang sadiki lai. Itu sama sa deng dia ada minong anggor pait yang seng tacampor deng aer sadiki lai.* Dia nanti dapa siksa dalang api deng walirang di muka malekat-malekat kudus deng Domba Ana.* 11 Asap dari api yang siksa dong tu nai sampe tarus-tarus. Dong yang somba binatang tu deng akang pung patong, deng yang tarima akang pung nama pung tanda, dong dapa siksa siang-malang.”* 12 Jadi, Allah pung orang-orang yang dengar-dengarang Antua deng tetap parcaya Yesus, dong musti tahang hati dalang susa deng sangsara.
13 Abis itu, beta dengar suara dari sorga bilang kata, “Tulis bagini: Mulai dari sakarang, orang-orang yang mati tagal parcaya Tuhan, dong paleng baruntung!” Allah pung Roh bilang, “Batul paskali! Dong nanti seng karja karas lai, mar ambe sanang. Barang, Tuhan nanti balas dong pung lala.”
Allah pung hukumang par manusia waktu kiamat
14:14-20
14 Tarus, beta lia awang puti satu. La di awang tu ada satu orang dudu, yang pung rupa macang deng Ana Manusia. Di Dia pung kapala ada makota mas deng di Dia pung tangang ada sabit tajang.* 15 Tarus ada malekat satu lai kaluar dari Allah pung Ruma, la bicara deng suara basar par Dia yang dudu di awang tu kata, “Kasi lari Ale pung sabit tajang tu suda. Barang su waktu par ambe hasil di dunya tagal hasil tu su tua.”* 16 La Dia yang dudu di atas awang tu kasi lari Dia pung sabit ka dunya la ambe akang pung hasil.
17 La beta lia malekat satu laeng lai kaluar dari Allah pung Ruma di sorga. Dia jua ada pegang sabit tajang satu. 18 Abis itu, malekat satu laeng lai datang dari meja tampa bakar korbang. Dia pung kuasa par api. Dia bilang deng suara basar par malekat yang pegang sabit tajang tu kata, “Kasi lari ale pung sabit tajang tu la potong bua-bua anggor di dunya, tagal akang su masa!” 19 Tarus, malekat tu kasi lari dia pung sabit ka dunya la potong bua-bua anggor tu. La dia kumpul akang la lempar akang ka tampa ramas anggor yang basar, yang pung arti Allah pung morka deng hukumang. 20 Bua-bua anggor tu dapa ramas di luar kota. Dari tampa ramas anggor tu dara malele macang deng hener yang panjang tiga ratus kilometera deng kadalang satu meter stenga.*