Binatang satu kaluar dari dalang lautang
13:1-10
13
1 Tarus, beta lia binatang satu kaluar dari dalang lautang.* Akang pung tando sapulu deng kapala tuju. Di akang pung tando-tando tu satu-satu ada makota, deng di akang pung kapala-kapala tu ada tatulis kata-kata yang hina Allah, yang bilang kalo akang tu Allah.* 2 Binatang yang beta lia tu, akang pung rupa macang deng macan tutul. Akang pung kaki basar, babulu, deng pung kuku tajang macang deng beruang pung kaki. Akang pung mulu jua basar, kuat, deng pung gigi tajang macang deng singa pung mulu. La naga biking binatang tu kuat macang deng dia sandiri deng kasi kuasa yang basar par akang par parenta macang deng raja.* 3 Satu dari akang pung kapala ada luka basar yang bisa biking akang mati, mar luka basar tu bae. Samua orang di dunya taherang-herang la iko binatang tu. 4 Dong somba naga tu, tagal dia kasi dia pung kuasa par binatang tu. Dong jua somba binatang tu lai deng bilang kata, “Seng ada satu lai yang kuat macang deng binatang tu. Seng ada yang bisa lawang akang.”5 Allah kasi biar binatang tu angka-angka diri soal akang pung kuasa deng hojat Antua. Antua jua kasi biar akang parenta dunya ampa pulu dua bulang.* 6 Akang hojat Allah deng hina Antua pung nama deng Antua pung tampa tinggal di sorga, deng samua yang tinggal di sana. 7 Antua jua kasi biar akang lawang Antua pung orang-orang deng kasi kala dong. Akang dapa kasi kuasa par pegang parenta par samua suku, mata ruma, bahasa, deng bangsa.* 8 Samua orang di dunya yang seng parcaya Allah nanti somba binatang tu. Dong tu orang-orang yang dari waktu Allah balong biking dunya ni lai, dong pung nama seng tatulis dalang Domba Ana yang su dapa bunu tu pung buku. Buku tu isi nama-nama orang yang nanti hidop tarus-tarus deng Allah.*
9 Jadi sapa pung talingang, dengar pasáng ni bae-bae,
10 “Sapa yang musti dapa bui,
dia pasti dapa bui.
Sapa yang musti dapa bunu deng parang,
dia pasti dapa bunu deng akang.”*
Tagal itu, Allah pung orang-orang musti tahang hati deng parcaya Antua tarus.
Binatang satu kaluar dari dalang tana
13:11-18
11 Abis itu, beta lia binatang satu kaluar dari dalang tana. Akang pung tando dua macang deng domba ana pung tando, la akang pung suara macang deng naga pung suara. 12 Akang dapa kasi kuasa dari binatang partama par biking binatang partama tu pung mau. Akang suru samua manusia di dunya par somba binatang partama yang dolo ada pung luka basar mar su bae tu.* 13 Binatang kadua tu biking tanda-tanda herang yang luar biasa, mala kasi turung api dari langit ka dunya di muka orang banya. 14 Deng tanda-tanda herang yang akang biking deng kuasa dari binatang partama tu, akang parlente manusia di dunya biar dong parcaya binatang partama tu. La binatang kadua suru dong biking patong binatang partama, yang parna luka dari parang mar tetap hidop tu, par taru hormat par binatang partama tu. 15 Binatang kadua tu dapa kasi kuasa par biking patong binatang partama tu hidop la bicara. Patong tu suru bunu samua orang yang seng somba patong tu. 16 Samua orang, orang kacil ka basar, kaya ka miskin, jongos ka bukang jongos, dong samua dapa paksa dari binatang kadua par tarima tanda di dong pung tangang kanang ka testa. 17 Seng saorang lai yang bisa bali ka bajual kalo dia seng ada pung tanda tu. Tanda tu binatang partama pung nama, ka angka dari akang pung nama.
18 Jadi, katong parlu pikirang tajang par mangarti angka tu. Sapa pung pikirang tajang, dia bisa rekeng angka tu deng mangarti akang, tagal angka tu nama dari satu orang. Angka tu 666.