Parampuang satu deng ular naga
12:1-6
12
1 Skrek bagini, beta lia tanda satu yang luar biasa di langit. Beta lia parampuang satu tabungkus deng matahari la bulang ada di bawa dia pung kaki. Di dia pung kapala ada makota dari sapulu dua bintang. 2 Parampuang tu ada deng badang, deng su mau kasi lahir ana, jadi dia bataria tagal dia pung poro saki.3 Tarus beta lia tanda laeng lai di langit. Beta lia naga mera basar saekor yang pung kapala tuju deng tando sapulu. Di dia pung kapala tuju tu, satu-satu ada makota.* 4 Naga tu pake dia pung ekor par hela sepertiga dari bintang-bintang la lempar akang ka dunya. Naga tu badiri di muka parampuang yang mau kasi lahir Ana tu, biar dia bisa langsung talang parampuang tu pung Ana bagitu Ana tu lahir.* 5 Tarus, parampuang tu kasi lahir Ana laki-laki satu yang nanti pegang parenta par samua manusia di dunya deng karas.* Naga tu mau talang Ana mera-mera tu, mar Ana tu dapa bawa lari ka Allah di Antua pung kadera raja. 6 Parampuang tu lari ka padang gurun ka tampa yang Allah su kasi siap par dia, biar dia tapiara di situ 1.260 hari.
Naga dapa kasi kala
12:7-12
7 Abis itu, ada prang di sorga. Malekat pung pamimping yang nama Mikael deng malekat-malekat yang iko dia baku prang lawang naga tu. La naga tu dapa bantu dari malekat-malekat yang iko dia.* 8 Mar naga tu dapa kasi kala, la dia deng malekat-malekat yang iko dia seng dapa tarima lai di sorga. 9 Naga basar tu ular tua yang parlente manusia di dunya. Dia jua nama Setang pung Raja deng Tukang Tudu.a Dia deng malekat-malekat yang iko dia dapa lempar ka dunya.*
10 Tarus, beta dengar suara basar di sorga bilang kata,
“Sakarang ni su waktu par katong pung Allah kasi salamat manusia.
Sakarang Antua su kasi unju Antua pung kuasa deng su pegang parenta jadi Raja.
Sakarang Orang yang Allah su Angka par Kasi Salamat Manusia su kasi unju Dia pung kuasa.
Barang, Setang pung Raja yang suka tudu orang-orang parcaya di muka Allah siang-malang tu
su dapa lempar dari sorga.*
11 Orang-orang parcaya tu su manang lawang dia,
tagal Domba Ana pung dara su tatumpa par hapus dong pung dosa-dosa
deng tagal dong tetap kasi tau soal Domba Ana tu par orang-orang.
Mala kalo dong musti mati tagal Antua,
dong siap mati.
12 Jadi barsuka suda, he samua yang tinggal di sorga!
Mar cilaka he, samua yang tinggal di daratang deng lautang!
Barang, Setang pung Raja su turung par kamong deng jumawa paskali,
tagal dia tau kalo dia pung waktu su mau abis.”
Naga iko parampuang tu
12:13-18
13 Waktu naga tau kalo dia su dapa lempar ka dunya, dia pi iko parampuang yang kasi lahir Ana laki-laki tu. 14 Mar, parampuang tu dapa kasi sayap dua macang deng burung elang basar pung sayap, biar dia bisa tarbang ka tampa yang Allah su kasi siap par dia di padang gurun. Di tampa tu dia tapiara tiga taong stenga deng naga seng bisa biking cilaka dia.* 15 Tarus, naga tu sumbur aer banya paskali ka parampuang tu macang deng aer basar biar dia anyo. 16 Mar tana talang aer yang naga sumbur tu par tolong parampuang tu. 17 La naga tu mara parampuang tu paskali, la dia pi cari parampuang tu pung turunang laeng yang dengar-dengarang Allah pung parenta-parenta deng kasi tau soal Yesus par orang-orang. 18 La naga tu badiri di pinggir pante.