Dua saksi kasi tau Allah pung pasáng la dapa bunu mar hidop kombali
11:1-14
11
1 Abis itu, Allah kasi tongka pangukur par beta la bilang kata, “Pi ukur Beta pung Tampa Sombayang Pusat deng meja tampa bakar korbang, la rekeng barapa orang yang datang ibada di situ.* 2 Mar, jang ukur akang pung kintal, tagal Beta su kasi akang par orang-orang yang seng parcaya Beta. Dong nanti inja-inja kota kudus Yerusalem tu* ampa pulu dua bulang sepe-sepe.a 3 Beta nanti utus Beta pung saksi dua orang par pi bilang Beta pung pasáng. Dong nanti pake pakiang dari kaeng busu-busu yang jadi tanda kalo dong pung hati susa deng manusia pung dosa-dosa. Dong nanti pi bilang Beta pung pasáng 1.260 hari sepe-sepe.”4 Saksi dua ni macang deng dua pohong saitun deng dua bua kaki lampu yang badiri di muka Tuhan yang pung kuasa par dunya ni samua.b 5 Kalo ada orang yang coba biking apapa yang jahat par dong dua, dong nanti kasi kaluar api dari dong pung mulu la kasi binasa dong pung musu-musu tu. Jadi, sapa yang coba biking apapa yang jahat par dong, dia nanti mati deng cara bagitu. 6 Allah su kasi kuasa par dong dua par biking ujang seng turung sampe dong abis kasi tau pasáng yang dong dapa dari Allah.* Dong jua dapa kuasa par roba aer jadi dara deng hantam dunya deng macang-macang cilaka apa tempo sa dong mau.*
7 Kalo dong su abis kasi tau Allah pung pasáng, binatang satu yang kaluar dari lobang yang paleng kadalang paskali par pi ka setang-setang pung tampa, akang nanti serang dong la kasi kala deng bunu dong.* 8 Dong pung mayat nanti dapa kasi tinggal di jalang dalang kota basar, tampa dong dua pung Tuhan dapa salib. Kota tu macang deng Sodom deng Mesir tagal orang-orang yang tinggal di situ paleng kajahatang macang deng orang-orang di Sodom deng Mesir.* 9 Orang-orang dari samua bangsa, suku, bahasa, deng mata ruma nanti lia dong pung mayat dalang tiga hari stenga, deng seng kasi ijin dong dapa kubur. 10 Samua orang di dunya yang seng parcaya Allah nanti paleng sanang tagal dong dua su mati. Dong nanti biking pesta deng baku tukar kado tagal dua juru bicara tu su seng bisa biking orang-orang di dunya sangsara lai.
11 Abis tiga hari stenga, Allah kasi napas par dong dua la dong hidop kombali. Dong bangong la badiri sampe samua orang yang lia itu takotang paskali.* 12 Tarus, dong dua dengar suara basar dari sorga yang bilang par dong kata, “He, nai kamari!” La dong dua pung musu-musu lia dong dua tarangka ka sorga tabungkus dalang awang.* 13 Oras itu jua, tana goyang basar sampe sepersapulu dari kota tu ancor deng tuju ribu orang mati. Orang-orang yang seng mati, dong samua takotang paskali la bilang, “Allah di sorga pung kuasa paleng basar!”*
14 Cilaka basar kadua su lewat. Mar lia, seng lama lai cilaka basar katiga mau datang.
Malekat katuju tiop dia pung trompet
11:15-19
15 Tarus, malekat katuju tiop dia pung trompet, la beta dengar suara-suara basar di sorga yang bilang kata,
“Sakarang yang pegang parenta par samua orang di dunya tu
katong pung Tuhan deng Dia yang Antua su Angka par Kasi Salamat Manusia.
Dia tu yang jadi Raja tarus-tarus.”
16 La dua pulu ampa pamimping yang dudu di dong pung kadera-kadera yang ada di muka Allah, dong tikang lutu la somba Antua. 17 Dong bilang,
“Sio Tuhan Allah yang pung Kuasa Paleng Basar,
yang ada sakarang deng yang su ada dari dolo-dolo lai!
Katong minta dangke dari Tuhan,
tagal Tuhan su pake Tuhan pung kuasa basar
deng su pegang parenta par samua orang di dunya.
18 La orang-orang yang seng parcaya Tuhan, dong pung dara mandidi,
mar su waktu par Tuhan kasi unju Tuhan pung morka
deng par putus orang-orang yang su mati pung parkara.
Sakarang ni su waktu par Tuhan kasi ancor sapa sa yang kasi ancor manusia di dunya.
Sakarang ni jua su waktu par Tuhan kasi hadia par Tuhan pung jongos-jongos.
Dong tu Tuhan pung juru-juru bicara
deng Tuhan pung orang-orang yang taru hormat par Tuhan, orang kacil ka basar.”
19 Tarus, Allah pung Ruma di sorga tabuka la Peti Tampa Simpang Allah pung Parenta* dapa lia di dalang Ruma tu. La kilat baku sambung, guntur pica, tana goyang, deng ujang es turung kuat-kuat.