Yohanis dapa kitab kacil dari malekat
10:1-11
10
1 Abis itu, beta dapa lia malekat satu laeng yang kuat turung dari sorga. Dia tabungkus deng awang deng ada banang raja di atas dia pung kapala. Dia pung muka tarang macang deng matahari la dia pung kaki manyala macang deng api. 2 Di dia pung tangang ada kitab kacil yang su tabuka. Dia pung kaki kanang inja lautang la kaki kiri inja daratang. 3 Dia bataria deng suara basar macang deng singa maraong. La abis dia bataria, guntur basar balas dia tuju kali. 4 Abis guntur balas tuju kali, beta mau tulis apa yang guntur tu bilang. Mar, beta dengar suara dari sorga bilang bagini, “Tutu mati apa yang guntur tu bilang! Jang tulis akang!”5 La malekat yang beta lia badiri deng kaki sabala di lautang deng sabala lai di daratang tu angka dia pung tangang kanang ka langit.* 6 La dia angka sumpa demi Allah yang hidop tarus-tarus, yang biking langit deng akang pung isi samua, dunya deng akang pung isi samua, deng lautang deng akang pung isi samua. Malekat tu bilang kata, “Allah seng tunda-tunda waktu lai par biking apa yang Antua su putus. 7 Mar waktu malekat katuju tiop dia pung trompet, Allah nanti biking Antua pung rencana yang tatutu mati, macang deng apa yang Antua su bilang par Antua pung juru-juru bicara. Dong tu, Antua pung jongos-jongos.”
8 Tarus, beta dengar suara dari sorga bilang kombali par beta bagini, “Pi ambe kitab kacil yang su tabuka tu dari malekat yang inja lautang deng daratang tu pung tangang!”
9 Jadi, beta pi par malekat tu la minta dia kasi akang par beta. La dia bilang par beta, “Ambe la makang akang. Nanti di se pung mulu akang rasa manis macang deng madu, mar akang biking se pung poro panas.”
10 Tarus, beta ambe akang dari dia pung tangang la makang akang. Di beta pung mulu akang rasa manis macang deng madu, mar abis makang, akang biking beta pung poro seng sadap.* 11 Tarus dia bilang par beta, “Se musti pi kasi tau kombali soal apa yang Allah su rencana par orang-orang dari banya suku, bangsa, bahasa, deng par raja-raja.”