Malekat kalima tiop dia pung trompet
9:1-12
9
1 Malekat kalima tiop dia pung trompet la beta lia bintang satu yang su jatu dari langit ka dunya. Bintang tu dapa kasi konci par buka mulu lobang yang paleng kadalang paskali par pi ka setang-setang pung tampa. 2 Tarus, bintang tu buka mulu lobang tu, la asap kaluar dari situ macang deng asap dari tungku basar. Matahari deng langit jadi galap tagal asap dari lobang tu.* 3 La bilalang-bilalang kaluar dari dalang asap tu la turung ka dunya. Akang dapa kasi kuasa par tikang orang, sama deng kalajengking di dunya.* 4 Akang dapa larang par jang biking rusak rumpu-rumpu, pohong-pohong, deng tatanamang laeng lai di dunya. Akang cuma bisa serang orang-orang yang di dong pung testa seng ada cap dari Allah.* 5 Akang seng dapa ijin par bunu dong, mar cuma par siksa dong dalang lima bulang. Kalo akang tikang dong, akang pung saki tu macang deng saki waktu kalajengking tikang. 6 Dalang lima bulang tu, orang-orang cari jalang par mati, mar seng mati. Dong mau paskali par putus napas, mar seng bisa.*7 Bilalang-bilalang tu lia macang deng kuda yang siap par pi prang. La di atas akang pung kapala ada apapa satu macang deng makota mas. Akang pung muka macang deng manusia pung muka.* 8 Akang pung rambu panjang macang deng parampuang pung rambu, deng pung gigi macang deng singa pung gigi.* 9 Akang ada pung pampele dada macang deng pampele dada dari besi. Akang pung sayap-sayap babunyi basar paskali, macang deng kareta-kareta yang dapa tarek dari banya kuda par pi prang.* 10 Akang pung ekor macang deng kalajengking pung ekor yang ada bisa. Jadi, akang pake ekor tu par siksa manusia dalang lima bulang. 11 Akang ada pung raja yang pimping akang. Dia tu malekat yang pegang kuasa par lobang yang paleng kadalang par pi ka setang-setang pung tampa. Dia pung nama dalang bahasa Ibrani tu Abadon deng dalang bahasa Yunani tu Apolion yang pung arti ‘tukang kasi ancor’.
12 Cilaka basar yang partama tu su lewat. Mar ada dua cilaka basar laeng lai yang mau datang.
Malekat kaanam tiop dia pung trompet
9:13-21
13 Abis itu, malekat kaanam tiop dia pung trompet. La beta dengar suara datang dari ampa jiku dari meja mas tampa bakar kamanyaang yang ada di muka Allah tu.* 14 Suara tu bilang par malekat kaanam yang pegang trompet kata, “Kasi lapas malekat ampa yang ada taika di aer basar Efrat tu!” 15 La dia pi lapas dong ampa yang su dapa kasi siap par bunu sepertiga dari manusia pas akang pung jam, hari, bulang, deng taong. 16 Beta dapa dengar kalo tantara-tantara yang nai kuda prang tu ada dua ratus juta orang. 17 La beta lia tantara-tantara deng kuda prang, samua pake pampele dada dari besi. Pampele dada tu warna mera api, biru tua, deng kuning walirang. Kuda-kuda tu pung kapala macang deng singa pung kapala, la dari akang pung mulu kaluar api, asap, deng walirang. 18 Sepertiga manusia di dunya mati tagal tiga hal tarbae yang kaluar dari akang pung mulu tu: api, asap, deng walirang. 19 Kuda-kuda tu pung kuasa par bunu manusia bukang dari mulu sa, mar dari ekor lai, tagal akang pung ekor sama deng ular. Ada kapala di akang pung ekor yang biking manusia sangsara.
20 Mar manusia laeng yang seng mati tagal hal-hal tarbae tu, dong tetap seng mau kasi tinggal kajahatang-kajahatang yang dong biking. Dong seng barenti somba roh-roh jahat deng patong-patong mas, perak, tambaga, batu, deng kayo, patong-patong yang seng bisa lia, dengar, ka bajalang tu.* 21 Dong jua seng kasi tinggal dong pung kajahatang-kajahatang macang bunu orang, pake-pake, tidor deng orang yang bukang dong pung laki ka bini, deng pancuri.