Domba Ana lapas segel katuju
8:1-5
8
1 Waktu Domba Ana lapas segel katuju, sorga langsung sunyi kira-kira stenga jam. 2 La beta lia malekat tuju yang badiri di muka Allah. Dong satu-satu dapa kasi trompet. 3 La malekat satu laeng datang badiri di muka meja mas tampa bakar kamanyaang yang ada di muka kadera raja.* Dia ada bawa cawan mas satu yang biasa dapa pake par tampa kamanyaang. La dia jua dapa kasi kamanyaang paleng banya par kasi akang sama-sama deng Allah pung orang-orang samua pung sombayang par jadi korbang par Allah di atas meja mas tu.* 4 Asap dari kamanyaang yang dia bakar tu nai par Allah sama-sama deng Antua pung orang-orang pung sombayang.* 5 Abis itu, dia ambe cawan tu la isi akang deng bara api dari tampa bakar korbang tu.* Tarus, dia lempar cawan tu ka dunya. Langsung guntur pica, kilat baku sambung, deng tana goyang.*Ampa malekat tiop dong pung trompet
8:6-13
6 Abis itu, malekat tuju yang pegang trompet tu siap par tiop akang. 7 Malekat partama tiop dia pung trompet, la ujang es deng api yang baku tacampor deng dara dapa lempar ka dunya.* Sepertiga dari dunya tabakar, sepertiga dari pohong-pohong tabakar, deng rumpu ijo tabakar samua.a
8 Malekat kadua tiop dia pung trompet, la ada apapa satu paleng basar yang lia macang gunung basar yang manyala-manyala tagal api dapa lempar ka dalang lautang. Sepertiga dari lautang jadi dara, 9 sepertiga dari binatang-binatang di lautang mati, sepertiga dari kapal-kapal ancor lai.
10 Tarus, malekat katiga tiop dia pung trompet, la bintang basar satu yang manyala-manyala macang deng obor jatu ka dunya la kana sepertiga dari aer-aer basar deng sepertiga dari mata-mata aer.* 11 Bintang tu pung nama Apsintus, yang pung arti ‘pait’. Waktu bintang tu kana aer, sepertiga dari aer-aer basar deng sepertiga dari mata-mata aer samua rasa pait. La orang banya mati tagal minong aer pait tu.
12 Abis itu, malekat kaampa tiop dia pung trompet, la sepertiga dari matahari, sepertiga dari bulang, deng sepertiga dari bintang-bintang dapa hantam. Jadi sepertiga dari matahari, sepertiga dari bulang, deng sepertiga dari bintang jadi galap. Sepertiga dari siang jadi galap deng sepertiga dari malang labe tamba galap lai.*
13 Tarus, beta lia burung elang satu tarbang tinggi paskali, deng bataria bilang, “Cilaka! Cilaka! Cilaka samua manusia di dunya tagal tiga malekat laeng su mau tiop dong pung trompet.”