Allah pung orang-orang yang dapa kasi tanda di testa
7:1-8
7
1 Abis itu, beta lia malekat ampa ada badiri di dunya pung ampa mata anging. Malekat-malekat tu ada tahang anging biar jang ada yang batiop ka lautang, daratang, deng pohong-pohong.* 2 Tarus, beta lia malekat satu datang dari sabala matahari nai. Malekat tu ada bawa cap dari Allah yang hidop tarus-tarus. Malekat tu tabaos basar-basar par malekat ampa yang su dapa kuasa par kasi ancor daratang deng lautang. 3 Malekat tu bilang, “Jang kasi ancor daratang, lautang, deng pohong-pohong do. Tunggu sampe katong taru tanda di katong pung Allah pung jongos-jongos pung testa, baru kamong biking bagitu.”*4 Beta dengar kalo orang-orang yang dapa kasi tanda tu ada 144.000 orang. Dong tu dari Israel pung 12 suku. 5 Dari satu-satu suku ada 12.000 orang: suku Yehuda 12.000, suku Ruben 12.000, suku Gad 12.000, 6 suku Asyer 12.000, suku Naftali 12.000, suku Manasye 12.000, 7 suku Simeon 12.000, suku Lewi 12.000, suku Isakhar 12.000, 8 suku Sebulon 12.000, suku Yusuf 12.000, deng suku Benjamin 12.000.
Orang banya paskali manyanyi puji Allah deng Domba Ana
7:9-17
9 Abis itu, beta lia orang paleng banya paskali macang deng paser di pinggir pante sampe seng bisa rekeng lai. Dong tu dari sagala bangsa, suku, mata ruma, deng bahasa di dunya. Dong pake baju panjang luar warna puti, deng satu-satu ada pegang jaga-jaga pohong palem. Dong samua badiri di muka kadera raja deng Domba Ana, 10 la deng suara basar dong bilang,
“Katong puji-puji katong pung Allah
yang dudu di kadera raja tu
deng puji-puji Domba Ana,
tagal Dong su kasi salamat katong!”
11 Tarus malekat-malekat samua badiri ron kadera raja, dua pulu ampa pamimping, deng ampa makluk tu. Dong tikang lutu di muka kadera raja tu la somba Allah. 12 La dong bilang,
“Amin!
Katong puji-puji deng angka tinggi-tinggi katong pung Allah tarus-tarus.
Katong taru hormat deng minta dangke banya-banya par Antua yang paleng kuat,
yang pung pikirang paleng tajang,
deng yang pegang kuasa dari dolo sampe tarus-tarus.
Amin!”
13 Abis itu, satu dari dua pulu ampa pamimping tu tanya beta kata, “Orang-orang yang pake baju panjang luar warna puti tu sapa? Dong datang dari mana?” 14 La beta bilang, “Tuang e! Tuang yang labe tau.”
Tarus, antua bilang par beta kata, “Dong tu orang-orang yang su kaluar dari susa deng sangsara yang barát paskali. Dong su cuci dong pung baju panjang luar dalang Domba Ana pung dara la akang su jadi puti barsi.* 15 Tagal itu, dong badiri di muka Allah pung kadera raja la manyanyi deng somba Antua siang-malang di dalang Antua pung Ruma. La Antua yang dudu di kadera tu nanti lia deng jaga dong. 16 Dong seng lapar-lapar deng seng aos-aos lai. Matahari pung panas seng kana dong lai.* 17 Barang, Domba Ana yang ada di pinggir kadera raja tu yang pimping deng kalesang dong. Antua nanti hentar dong ka mata aer yang bisa biking dong hidop tarus-tarus.* Deng Allah nanti seka dong pung aer mata.”*