Domba Ana lapas kitab yang tagulung pung segel-segel
6:1-17
6
1 Abis itu, beta lia Domba Ana lapas segel partama dari tuju segel di kitab yang tagulung tu. La beta jua dengar satu dari ampa makluk tu bilang deng suara basar macang deng guntur kata, “Mari!” 2 Tarus beta lia kuda puti saekor.* Yang dudu di akang ada pegang pana-pana satu deng dapa kasi makota satu. Dia yang su manang tu, dia pi ka dunya par manang lawang dia pung musu-musu lai.3 Abis itu, Domba Ana tu lapas segel kadua. Waktu itu, beta dengar makluk yang kadua bilang kata, “Mari!” 4 Tarus kuda saekor kaluar lai. Kuda tu pung warna mera macang deng dara. Yang dudu di akang dapa kuasa par biking orang-orang di dunya pung hidop seng dame satu deng laeng, biar dong baku bunu. Dia dapa kasi parang basar satu.*
5 Abis itu, Domba Ana tu lapas segel katiga, la beta dengar makluk yang katiga bilang kata, “Mari!” Tarus beta lia kuda itang saekor. Yang dudu di akang ada pegang dacing par timbang makanang tagal makanang susa. 6 Tarus beta dengar suara satu macang dari tenga-tenga ampa makluk tu. Suara tu bilang, “Gandum satu kilo pung harga sama deng ongkos karja satu hari. La jelai tiga kilo pung harga sama deng ongkos karja satu hari lai. Mar jang kasi rusak pohong-pohong saitun deng kabong anggor.”
7 La waktu Domba Ana lapas segel kaampa, beta dengar makluk yang kaampa bilang kata, “Mari!” 8 Tarus beta lia kuda pucat saekor. Yang dudu di akang tu pung nama Kamatiang, deng ada yang iko dia dari balakang yang pung nama Orang Mati pung Tampa. Dong dapa kuasa par bunu seperampa dari samua manusia di dunya. Dong bisa bunu manusia deng prang, susa makanang, macang-macang panyaki, deng binatang-binatang jahat.*
9 Abis itu, waktu Domba Ana lapas segel kalima, beta lia di bawa tampa bakar korbang, ada roh-roh dari orang-orang yang su dapa bunu tagal tetap parcaya Allah pung ajarang deng kasi tau akang par orang laeng. 10 Roh-roh tu bataria kata, “Sio Tuhan Allah e! Tuhan yang pung Kuasa Paleng Basar, yang kudus deng yang batul. Apa tempo baru Tuhan putus hukumang par orang-orang di dunya deng balas dong yang su bunu katong tu?”
11 Tarus Antua kasi baju panjang luar puti par dong satu-satu. Antua bilang par dong kata, “Kamong musti sabar sadiki lai. Tunggu sampe kamong pung jumla su pas baru Beta hukum dong. Barang, masi ada kamong pung tamang-tamang yang kasi tau Allah pung ajaranga deng jua sudara-sudara orang parcaya laeng yang nanti dapa bunu sama deng kamong do.”
12 Abis itu, beta lia Domba Ana lapas segel kaanam deng langsung tana goyang basar paskali.* Matahari jadi itang macang deng arang la bulang jadi mera macang deng dara.* 13 Bintang-bintang di langit jatu ka dunya macang deng bua ara muda gugur waktu anging basar goyang akang pung pohong.* 14 Langit tagulung macang deng tikar, la samua gunung deng pulo tapinda dari akang pung tampa.* 15 Tarus raja-raja di dunya, orang-orang basar, panglima-panglima, orang-orang kaya, orang-orang yang pung kuasa, deng samua orang laeng yang jongos ka bukang jongos, dong samua lari basambunyi di goa-goa deng lobang-lobang batu di gunung-gunung.* 16 Dong bataria par gunung-gunung deng batu-batu kata, “Mari rubu tindis katong deng sambunyi katong dari Antua yang dudu di kadera raja tu deng dari Domba Ana tu pung morka jua!”* 17 Barang, hari par Tuhan Allah deng Domba Ana hukum dunya su datang deng seng ada saorang lai yang kuat tahang Dong pung morka deng hukumang tu.*