Domba Ana yang pantas par ambe deng buka kitab yang tagulung
5:1-14
5
1 Abis itu, beta dapa lia kitab satu yang tagulung di Antua yang ada dudu di kadera raja tu pung tangang kanang. Kitab tu pung muka-balakang pono deng tulisang, deng akang tasegel deng tuju segel.* 2 Tarus, beta lia malekat satu yang kuat tabaos basar-basar kata, “Sapa yang pantas par lapas segel-segel deng buka kitab yang tagulung tu?” 3 Mar, seng saorang lai yang ada di sorga, di dunya, ka di orang mati pung tampa yang bisa lapas kitab yang tagulung tu pung segel-segel deng lia akang pung isi. 4 Jadi, beta manangis tahek-hek tagal seng ada saorang lai yang pantas par buka kitab tu deng lia akang pung isi. 5 Tarus, satu dari dua pulu ampa pamimping tu bilang par beta kata, “He, jang manangis! Lia! Antua yang dapa panggel par Singa dari suku Yehuda, Raja Daud pung Turunang, Antua tu su manang. Jadi, Antua tu yang nanti lapas tuju segel deng buka kitab tu.”* 6 Tarus, beta lia Domba Ana satu badiri di sabala kadera raja, la ampa makluk deng dua pulu ampa pamimping ron kadera tu. Domba tu lia macang kata su parna dapa bunu mar su hidop kombali. Domba Ana tu pung tando ada tuju deng mata ada tuju lai. Mata tuju tu pung arti Allah pung Roh yang dapa panggel par Allah pung tuju Roh, yang Antua utus ka samua tampa di dunya.* 7 Tarus, Domba Ana tu maju la ambe kitab yang tagulung tu dari Antua yang dudu di kadera tu pung tangang kanang. 8 Waktu Domba Ana ambe kitab tu, ampa makluk deng dua pulu ampa pamimping tu langsung tikang lutu di muka Domba Ana tu. Dong satu-satu ada pegang kecapi deng cawan dari mas yang pono deng kamanyaang. Kamanyaang ni pung arti, Allah pung orang-orang pung sombayang-sombayang.* 9 Dong samua tu manyanyi lagu baru satu bagini,
“Domba Ana ni yang pantas par ambe kitab yang tagulung tu
deng lapas akang pung segel-segel.
Barang, Antua su dapa bunu deng Antua pung dara su tatumpa
par tabus orang-orang dari samua suku, bahasa, mata ruma, deng bangsa
biar dong jadi Allah pung orang-orang.*
10 Antua jua su pili dong par jadi satu karajaang deng par jadi imam-imam yang karja par Allah.
Dong tu yang nanti pegang parenta di dunya.”
11 Abis itu, beta lia deng dengar malekat ribu-ribu deng juta-juta pung suara. Dong ron kadera raja, ampa makluk, deng dua pulu ampa pamimping tu.* 12 Dong manyanyi basar-basar bagini,
“Domba Ana yang su dapa bunu tu pantas par dapa hormat, puji, deng dapa angka tinggi-tinggi,
tagal Antua pung kuasa paleng basar, Antua paleng kaya,
Antua pung pikirang paleng tajang, deng Antua paleng kuat.”
13 Tarus beta dengar lai samua yang ada di sorga, di dunya, di orang mati pung tampa, deng di dalang aer manyanyi bagini,
“Antua yang dudu di kadera raja tu deng Domba Ana tu,
Dong pantas par dapa puji, hormat, deng dapa angka tinggi-tinggi tarus-tarus.
Dong yang pegang kuasa par samua-samua tarus-tarus.”
14 Tarus ampa makluk tu bilang, “Amin!” La dua pulu ampa pamimping tu tikang lutu la somba Antua yang dudu di kadera raja tu deng Domba Ana tu.