Yohanis dapa lia Allah pung kadera raja deng samua yang somba Antua di sorga
4:1-11
4
1 Abis itu, beta dapa lia apapa satu lai. Beta lia pintu satu di sorga tabuka, la beta dengar suara yang karas macang deng trompet babunyi yang beta su parna dengar. Suara tu bilang par beta kata, “Nai kamari! Beta mau kasi unju par ale apa yang musti jadi abis ini!” 2 Oras itu jua, Allah pung Roh pimping beta la beta lia kadera raja satu di sorga, deng ada yang dudu di akang.* 3 Yang dudu di kadera tu lia mangkilat macang deng batu permata yaspis deng sardis. Beta jua lia banang raja yang mangkilat macang deng batu permata samrud ada ron kadera tu. 4 Tarus, di pinggir-pinggir kadera tu ada dua pulu ampa kadera laeng yang ron akang. La yang dudu di kadera-kadera tu dua pulu ampa pamimping. Dong samua pake pakiang puti deng makota mas. 5 La dari kadera raja tu kilat kaluar deng guntur pica. La di muka kadera tu ada obor tuju bua manyala. Obor tuju tu Allah pung Roh yang dapa panggel par Allah pung tuju Roh.* 6 Di muka kadera tu jua, ada apapa satu yang lia macang deng lautang yang jarning macang deng kaca. Ada ampa makluk ron kadera tu. Ampa makluk tu pono deng mata muka-balakang.* 7 Yang partama lia macang deng singa la yang kadua lia macang deng ana sapi laki-laki. Yang katiga pung muka macang deng manusia la yang kaampa lia macang deng burung elang yang ada tarbang.* 8 Ampa makluk tu satu-satu pung sayap ada anam. La dong pung badang deng sayap-sayap pono deng mata. Siang-malang dong seng stop-stop puji-puji Allah. Dong bilang,“Kudus! Kudus!
Tuhan Allah yang pung Kuasa Paleng Basar tu kudus.
Antua su ada dari dolo-dolo lai, ada sakarang, deng ada tarus-tarus.”*
9 Ampa makluk tu manyanyi puji-puji, taru hormat, deng minta dangke tarus-tarus par Antua yang dudu di kadera raja, yang hidop tarus-tarus tu. Waktu dong ada biking bagitu, 10 dua pulu ampa pamimping tu langsung tikang lutu di muka Antua yang dudu di kadera raja tu, la somba Antua yang hidop tarus-tarus tu. Dong lapas dong pung makota la taru akang di muka kadera raja tu, la bilang kata,
11 “Sio Tuhan, Allah yang katong somba.
Cuma Tuhan sa yang pung kuasa paleng basar
deng yang pantas par dapa hormat
deng dapa angka tinggi-tinggi.
Barang, Tuhan su biking samua-samua yang ada
deng tagal Tuhan pung mau sampe akang jadi deng ada.”