Pasáng par jamaat di Sardis
3:1-6
3
1 Ana Manusia bilang par beta lai kata, “Yohanis, tulis Beta pung pasáng par malekat dari jamaat di Sardis. Tulis bagini:Ini ni pasáng dari Beta yang pegang bintang tuju bua deng yang pung kuasa par Allah pung Roh yang dapa panggel par Allah pung Tuju Roh.
Jamaat Sardis e! Beta tau apa sa yang kamong biking. Orang-orang bilang kata kamong tu ada hidop, mar yang batul kamong tu su mati. 2 Jadi bangong la kasi kuat kamong pung parcaya yang tinggal sadiki deng yang su amper mati tu! Barang, Beta lia kalo apa yang kamong biking tu balong pas di muka Beta pung Allah. 3 Tagal itu, inga ajarang yang kamong su parna dengar deng parcaya dolo tu! Iko akang tarus deng kasi tinggal kamong pung dosa-dosa! Kalo kamong seng sadar-sadar jua, skrek nanti Beta datang par kamong macang deng pancuri. Kamong seng tau apa tempo Beta datang.*
4 Mar, ada babarapa orang dari kamong di Sardis yang jaga dong pung hidop bae-bae biar dong seng biking dosa, macang deng orang yang jaga dia pung pakiang biar akang seng kotor. Dong nanti pake pakiang puti la bajalang sama-sama deng Beta, tagal dong pantas par itu.
5 Sapa yang manang macang deng dong, Beta nanti kasi pake dia deng pakiang puti. Beta nanti sama sakali seng hapus dia pung nama dari Allah pung buku yang isi nama-nama orang yang nanti hidop tarus-tarus deng Antua. La Beta jua nanti mangaku di muka Beta pung Bapa deng Antua pung malekat-malekat kalo dia tu Beta pung orang.*
6 Sapa pung talingang, dia musti dengar apa yang Allah pung Roh bilang par jamaat-jamaat!”
Pasáng par jamaat di Filadelfia
3:7-13
7 Ana Manusia bilang par beta lai kata, “Yohanis, tulis Beta pung pasáng par malekat dari jamaat di Filadelfia. Tulis bagini:
Ini ni pasáng dari Beta, Yang Kudus deng Yang Batul. Beta yang pegang konci dari Raja Daud pung karajaang. Kalo Beta buka pintu, seng satu orang lai yang bisa tutu akang la kalo Beta tutu pintu, seng satu orang lai yang bisa buka akang.*
8 Jamaat Filadelfia e! Beta tau apa sa yang kamong biking. Beta tau kalo kamong pung pangaru sadiki sa, mar kamong iko Beta pung ajarang deng seng manyangkal Beta. Coba lia! Beta su buka pintu par kamong yang seng satu orang lai bisa tutu akang. 9 Dengar! Beta nanti biking orang-orang yang binci kamong tu par datang tikang lutu di muka kamong pung kaki la mangaku kalo Beta paleng sayang kamong.* Dong bilang kata dong tu orang Yahudi yang somba Allah, mar yang batul tu seng. Dong tu Setang pung Raja pung orang-orang. 10 Tagal kamong su iko Beta pung parenta par tetap tahang hati dalang susa deng sangsara, jadi Beta jua nanti jaga kamong dari susa deng sangsara yang mau jadi di antero dunya par uji samua orang.
11 Seng lama lai Beta datang! Jadi, pegang kamong pung parcaya tu kuat-kuat biar kamong manang, la deng bagitu seng ada satu orang lai yang bisa rampas kamong pung hadia tagal kamong su manang.
12 Sapa manang, Beta nanti biking dia tinggal tarus-tarus deng Allah, macang deng tiang yang tatanang mati dalang Beta pung Allah pung Tampa Sombayang Pusat, la dia nanti tetap tinggal deng Antua. Beta nanti tulis Beta pung Allah pung nama deng Antua pung kota pung nama di dia. Itu tu Yerusalem baru yang nanti Allah kasi turung dari sorga. Beta jua nanti tulis Beta pung nama yang baru di dia lai.*
13 Sapa pung talingang, dia musti dengar apa yang Allah pung Roh bilang par jamaat-jamaat!”
Pasáng par jamaat di Laodikia
3:14-22
14 Ana Manusia bilang par beta lai kata, “Yohanis, tulis Beta pung pasáng par malekat dari jamaat di Laodikia. Tulis bagini:
Ini ni pasáng dari Beta, Yang Batul. Beta ni Saksi yang batul deng yang salalu bicara tarang-tarang soal Allah. Lewat Beta, Allah biking dunya ni deng akang pung isi samua.*
15 Jamaat Laodikia e! Beta tau apa sa yang kamong biking. Beta tau kalo kamong seng manyangkal Beta, mar kamong seng pegang kamong pung parcaya kuat-kuat. Kamong macang deng aer yang seng dinging deng seng panas. Labe bae tu kalo kamong dinging ka panas.a 16 Jadi, tagal kamong macang deng aer angat, seng dinging ka seng panas, Beta mau munta kamong kaluar dari Beta pung mulu. 17 Kamong bilang kata kamong tu kaya, su kumpul harta banya, jadi seng parlu apapa lai. Mar, kamong seng tau kalo kamong tu seng pung apapa, paleng kasiang, talanjang, deng buta. 18 Tagal itu, dengar Beta bilang par kamong: Bali mas asli dari Beta biar kamong jadi kaya. Bali pakiang puti dari Beta par tutu kamong pung badang yang talanjang yang biking kamong malu. Bali obat dari Beta lai la goso kamong pung mata biar kamong bisa dapa lia. 19 Orang-orang yang Beta sayang, Beta tagor deng ajar dong biar dong roba dong pung sala. Jadi, kamong musti pegang kamong pung parcaya kuat-kuat deng kasi tinggal kamong pung dosa-dosa.*
20 Dengar bae-bae! Beta badiri di muka pintu la toki pintu. Sapa dengar Beta pung suara la buka pintu par Beta, Beta nanti maso baku dapa deng dia. Tarus, Beta dudu makang sama-sama deng dia la dia jua dudu makang sama-sama deng Beta.
21 Sapa manang, Beta nanti kasi dudu dia sama-sama deng Beta di Beta pung kadera raja, sama deng Beta yang su manang la dudu sama-sama deng Beta pung Bapa di Antua pung kadera raja.
22 Sapa pung talingang, dia musti dengar apa yang Allah pung Roh bilang par jamaat-jamaat!”