Pasáng par jamaat di Efesus
2:1-7
2
1 Abis itu, Ana Manusia tu bilang par beta lai kata, “Yohanis, tulis Beta pung pasáng par malekat dari jamaat di Efesus. Tulis bagini:Ini ni pasáng dari Ana Manusia yang ada pegang bintang tuju bua di tangang kanang deng yang ada bajalang di tenga kaki-kaki lampu tuju bua dari mas.
2 Jamaat Efesus e! Beta tau apa sa yang kamong biking. Kamong karja banting tulang par biking Beta pung karja deng tahang hati waktu susa deng sangsara. Beta tau kalo kamong seng kasi biar orang-orang jahat pangaru kamong. Kamong jua su uji orang-orang yang mangaku diri par Allah pung utusang, mar yang batul tu seng, la dapa tau kalo dong tu parlente putar bale. 3 Beta tau kalo kamong tetap parcaya deng tahang hati tarus biar kata kamong susa deng sangsara tagal parcaya Beta, deng kamong seng mundur sadiki lai.
4 Mar Beta mau tagor kamong, tagal kamong su seng sayang Beta deng jua su seng baku sayang lai macang waktu kamong partama kali parcaya Beta. 5 Tagal itu, kamong musti sadar kalo kamong su jau paskali dari yang dolo! Kasi tinggal kamong pung dosa-dosa tu la bale sayang Beta deng baku sayang macang dolo lai! Kalo seng, Beta nanti datang cabu kamong pung kaki lampu dari akang pung tampa par hukum kamong. 6 Mar, ada hal yang bae dari kamong. Kamong binci kalakuang-kalakuang dari orang-orang yang iko Nikolaus pung ajarang, yang Beta jua binci lai.
7 Sapa pung talingang, dia musti dengar apa yang Allah pung Roh bilang par jamaat-jamaat! Sapa manang, Beta nanti kasi dia makang bua dari pohong yang biking orang hidop tarus-tarus, yang ada dalang Allah pung taman.”*
Pasáng par jamaat di Smirna
2:8-11
8 Ana Manusia bilang par beta lai kata, “Yohanis, tulis Beta pung pasáng par malekat dari jamaat di Smirna. Tulis bagini:
Ini ni pasáng dari Beta, Yang Partama deng Yang Laste, yang su mati mar hidop kombali.*
9 Jamaat Smirna e! Beta tau kalo kamong susa deng sangsara. Beta jua tau kalo kamong tu miskin, mar yang batul kamong tu kaya deng sagala macang berkat rohani dari Allah. Beta tau lai kalo orang-orang bicara tar batul-batul soal kamong. Dong bilang kata dong tu orang Yahudi yang somba Allah, mar yang batul tu seng. Dong tu Setang pung Raja pung orang-orang. 10 Jang taku susa deng sangsara yang sadiki lai jadi par kamong. Dengar Beta bilang! Setang pung Raja nanti biking babarapa dari kamong dapa lempar dalang bui. La kamong nanti paleng susa deng sangsara sampe sapulu hari. Deng cara bagitu kamong pung parcaya dapa uji. Mar kamong musti tetap parcaya Beta tarus, biar kata sampe mati lai, la Beta nanti kasi hadia par kamong par jadi tanda kalo kamong su manang. Hadia tu, kamong nanti hidop tarus-tarus deng Allah.
11 Sapa pung talingang, dia musti dengar apa yang Allah pung Roh bilang par jamaat-jamaat! Sapa manang, dia pasti seng mati kali kadua.”*
Pasáng par jamaat di Pergamus
2:12-17
12 Ana Manusia bilang par beta lai kata, “Yohanis, tulis Beta pung pasáng par malekat dari jamaat di Pergamus. Tulis bagini:
Ini ni pasáng dari Beta yang pung parang tajang muka-balakang.
13 Jamaat Pergamus e! Beta tau kalo kamong pung kota tu Setang pung Raja pung tampa pegang parenta, mar kamong tetap iko Beta. Kamong seng manyangkal kalo kamong parcaya Beta, biar kata waktu itu Antipas yang tetap bicara tarang-tarang soal Beta tu dapa bunu di kamong pung kota, tampa Setang pung Raja tinggal. 14 Mar, ada satu dua hal yang Beta seng suka dari kamong. Ada babarapa orang dari kamong yang iko Bileam pung ajarang. Bileam tu yang kasi balajar Balak cara par biking orang Israel bardosa. Dia ajar Balak par buju orang Israel par makang makanang yang su dapa kasi par dewa-dewa, deng par tidor deng orang yang bukang dia pung laki ka bini.* 15 Bagitu lai, ada babarapa orang dari kamong yang iko ajarang dari Nikolaus deng dia pung orang-orang. 16 Jadi, kasi tinggal kamong pung dosa-dosa tu! Kalo seng, seng lama lai Beta datang deng parang yang kaluar dari Beta pung mulu par hantam orang-orang macang bagitu.
17 Sapa pung talingang, dia musti dengar apa yang Allah pung Roh bilang par jamaat-jamaat! Sapa manang, Beta nanti kasi makang dia deng manna* yang ada tasambunyi. La Beta nanti kasi batu puti par dia. Di atas batu tu ada dia pung nama baru yang su tatulis, yang seng satu orang lai yang tau, cuma dia yang dapa akang sa yang tau.”*
Pasáng par jamaat di Tiatira
2:18-29
18 Ana Manusia bilang par beta lai kata, “Yohanis, tulis Beta pung pasáng par malekat dari jamaat di Tiatira. Tulis bagini:
Ini ni pasáng dari Allah pung Ana, yang pung mata tarang paskali macang deng api yang manyala basar, deng yang pung kaki mangkilat macang deng tambaga yang ada dapa bakar.
19 Jamaat Tiatira e! Beta tau samua yang kamong biking. Kamong sayang Beta deng kamong jua baku sayang. Kamong parcaya Beta. Kamong banting tulang par biking Beta pung karja deng tahang hati waktu susa deng sangsara. Beta tau kalo yang kamong biking sakarang ni labe banya dari waktu kamong baru parcaya Beta. 20 Mar Beta mau tagor kamong, tagal kamong tarima Isabel yang mangaku-mangaku kalo dia tu Allah pung juru bicara. Kamong kasi biar parampuang tu ajar apa yang seng batul deng parlente orang-orang yang iko Beta. Dia ajar dong par tidor deng orang yang bukang dia pung laki ka bini deng makang makanang yang su dapa kasi par dewa-dewa. 21 Beta su kasi waktu par dia par kasi tinggal dia pung dosa-dosa tu, mar dia tetap biking samua tu tarus.
22 Lia sa! Beta nanti hukum dia deng panyaki. Beta jua nanti biking orang-orang yang tidor deng diaa tu par sangsara stenga mati kalo dong seng kasi tinggal kalakuang-kalakuang tarbae yang parampuang tu ajar. 23 La Beta jua nanti bunu dia pung anana. Dong tu orang-orang yang iko dia pung ajarang. Deng bagitu, samua jamaat di mana sa bisa tau kalo Beta ni lia orang tambus sampe di dia pung dalang hati deng pikirang. Deng bagitu jua, kamong nanti tau kalo Beta balas kamong satu-satu iko apa yang kamong biking.*
24 Mar ada dari kamong di Tiatira yang seng iko ka balajar Isabel pung ajarang yang orang bilang par Setang pung Raja pung ajarang yang rahasia tu. Par kamong yang macang bagitu, Beta mau bilang kalo Beta seng tamba parenta laeng lai. 25 Cuma, kamong musti tetap pegang kamong pung parcaya tu kuat-kuat sampe Beta bale kombali.
26-27 Sapa manang deng biking apa yang Beta mau sampe Beta bale kombali, Beta nanti kasi kuasa par dia sama deng kuasa yang Beta su tarima dari Beta pung Bapa. Jadi deng tongka besi, dia nanti parenta bangsa-bangsa yang malawang Allah, deng kasi ancor dong macang deng balanga tana yang dapa kasi ancor.* 28 Beta jua nanti kasi bintang timur par dia par jadi tanda kalo dia su manang.
29 Sapa pung talingang, dia musti dengar apa yang Allah pung Roh bilang par jamaat-jamaat!”