Yohanis
Dapa Tanda dari Tuhan
Kitab yang bicara soal apa yang mau jadi
1:1-3
1
1 Ini ni kitab yang bicara soal hal-hal yang seng lama lai mau jadi, yang Yesus Kristus kasi unju par Antua pung jongos-jongos. Dong tu samua orang parcaya. Allah kasi unju akang par Antua, la Antua utus Antua pung malekat par kasi tau akang par beta Yohanis, Antua pung jongos. 2 Jadi, beta carita soal samua yang beta su lia deng dengar tu. Itu tu pasáng dari Allah yang Yesus Kristus kasi unju par beta. 3 Sapa yang baca tulisang-tulisang soal apa yang mau jadi ni deng sapa sa yang dengar la biking akang, dia paleng baruntung. Barang, seng lama lai samua yang Yesus kasi tau par beta ni mau jadi.Yohanis kiring salam par tuju jamaat
1:4-8
4 Tabea! Par basudara samua di tuju jamaat yang ada di propinsi Asia. Beta ni Yohanis. Beta minta biar Allah yang su ada dari dolo-dolo lai, yang ada sakarang, deng yang ada tarus-tarus kasi Antua pung berkat basar deng dame par kamong samua. Beta jua minta biar Allah pung Roh, yang dapa panggel par Allah pung tuju Roh yang ada di muka Tuhan pung kadera raja tu, kasi Antua pung berkat basar deng dame par kamong.* 5 Beta jua minta biar Yesus Kristus kasi Antua pung berkat basar deng dame par kamong lai. Antua tu Saksi yang tetap bicara tarang-tarang soal apa yang Tuhan Allah bilang par Antua. Antua tu orang yang partama hidop kombali dari samua orang mati deng yang pegang kuasa par raja-raja di dunya.*
Mari puji-puji Antua yang sayang katong samua deng yang su kasi tumpa Antua pung dara di kayo salib par kasi lapas katong dari katong pung dosa-dosa. 6 Antua su biking katong jadi satu karajaang. Antua su pili katong par jadi imam-imam yang karja par Allah, Antua pung Bapa. Mari puji-puji Antua yang pegang kuasa tarus-tarus. Amin.*
7 Taru kira bae-bae! Yesus datang dalang awang-awang la samua orang nanti dapa lia Antua. Bagitu lai deng orang-orang yang su tikang Antua. La samua bangsa di dunya nanti marata basar-basar tagal Antua. Itu batul! Samua tu nanti jadi! Amin.*
8 Tuhan Allah bilang, “Beta ni Alfa deng Omega, Yang Partama deng Yang Laste.* Beta ada dari dolo-dolo lai, Beta ada sakarang, deng Beta ada tarus-tarus. Beta ni Allah yang pung Kuasa Paleng Basar.”*
Yesus kasi unju diri par Yohanis di pulo Patmos
1:9-20
9 Basudara samua! Beta ni Yohanis, kamong pung sudara yang sama-sama parcaya Yesus. Beta deng kamong ni orang-orang yang dapa parenta dari Allah yang jadi katong pung Raja. Katong sama-sama sangsara deng tahang hati tagal katong satu hati deng Yesus. Beta dapa tangkap la dapa buang di pulo Patmos tagal kasi tau Allah pung pasáng deng kasi tau apa yang Yesus bilang par beta. 10 Satu kali bagini, pas hari Minggu, Allah pung Roh pimping beta la beta dengar suara yang karas dari beta pung balakang, macang deng trompet babunyi. 11 Suara tu bilang, “Tulis apa yang ale lia ni dalang kitab satu la kiring akang par tuju jamaat ni: jamaat Efesus, jamaat Smirna, jamaat Pergamus, jamaat Tiatira, jamaat Sardis, jamaat Filadelfia, deng jamaat Laodikia.”
12 Tarus, beta bale muka par lia kata itu sapa yang bicara par beta. La beta dapa lia kaki lampu tuju bua dari mas. 13 Di tenga-tenga kaki lampu tuju tu ada satu orang badiri. Antua pung rupa macang deng Ana Manusia. Antua pake baju panjang luar yang panjang sampe di kaki. Antua jua pake salempang mas di dada.* 14 Antua pung rambu puti macang deng santang pukat la Antua pung mata tarang paskali macang deng api yang manyala basar.* 15 Antua pung kaki mangkilat macang deng tambaga yang ada dapa bakar, la Antua pung suara dengar macang deng hener basar pung suara.* 16 Antua pung tangang kanang ada pegang bintang tuju bua deng ada parang tajang muka-balakang satu kaluar dari Antua pung mulu. Antua pung muka tarang macang deng matahari tenga hari padis.
17 Waktu beta lia Antua, beta jatu di muka Antua pung kaki deng seng bagara, macang deng orang mati. Tarus, Antua taru Antua pung tangang kanang di atas beta la bilang, “Jang taku! Beta ni Yang Partama deng Yang Laste, 18 deng Yang Hidop tarus-tarus. Beta su mati, mar lia, sakarang Beta hidop sampe tarus-tarus! Beta pegang kuasa par kamatiang deng orang mati pung tampa, jadi Beta kasi hidop orang mati kombali. 19 Jadi, tulis apa yang ale su lia, yang jadi sakarang ni, deng yang nanti jadi. 20 La rahasia dari bintang tuju bua yang ale lia di Beta pung tangang kanang deng kaki lampu tuju bua dari mas tu bagini: Bintang tuju bua tu malekat tuju dari tuju jamaat, la kaki lampu tuju bua dari mas tu tuju jamaat.”