Pepopeitaka
si Suro Yohane
Pepuua lolita
Isi nu sura ei mobambari apa anu napopeitaka ni Yesu Kerisitu si Yohane. Mpolinguruna i Yohane mangita i Yesu ewa Ana Manusia anu molumako i olo nu pambolia sulo anu pitu mbuana (1:12-18). Naita mbui ewa Tadulako anu mensawi i dara anu bula (19:11-16). Ai naita ewa Ana Dimba anu momeso i pomesoa kadatua ni Pue Ala i suruga (5:6-14; 21:22-23; 22:1-5).
Sura ei nauki ni tempora topepotuu si Pue Ala rapopesiasi nakenimpepotuura si Yesu. Ni tempo etu, ope-ope tau i kadatua Roma ratudu sira menomba si Datu Roma anu rauli Kaisar. Ria sira topepotuu si Pue Ala anu rapopate nakenimpepotuura, lawi baria sira madota menomba si Kaisar. Ria mbui sira anu baria tetida lako i pepotuura lawi maeka sira. Mewali, isi nu sura ei mopakaroso rarara topepotuu si Pue Ala bona tetida sira lako i pepotuura si Yesu.
Isi nu sura ei rapadongka i rara basangkia mpangkana pepopeitaka. Ria ngkora pandiri anu rapake i rara sura ei anu baria mani manoto lempona si kita. Agaiana nauda ewa etu, puu nu patudu i sura ei manoto mpuu: i rara nu dunia ei, topepotuu si Pue Ala ina rapopesiasi, agaiana inee kita mopawia pepotuuta, lawi i kasopoana, i Pue Yesu ina monangi ope-ope iwaliNa, ai meparenta duduuna kasae-saeana (11:15). Ai kita anu mepotuu si Ia, ina meparenta simbela-mbela ai Ia.
Isi nu Sura
1. Pepuua lolita ai tabea (1:1-8)
2. PepopeitakaNa anu mpolinguruna (1:9–3:22)
a. I Yesu raita ewa Ana Manusia anu molumako i olo nu pambolia sulo anu pitu mbuana (1:9-20)
b. Pepatudu i topepotuu si Pue Ala i pitu mbua kota (2:1–3:22)
3. PepopeitakaNa anu kadua (4:1–16:21)
a. I Yesu raita ewa Ana Dimba anu meongko i tumbiri pomesoa ni Pue Ala i suruga (4:1–5:14)
b. Ana Dimba mobungkasi pekatandai anu pitu mbuana (6:1–8:5)
c. Tatamburu anu pitu mbuana ratawui (8:6–11:19)
d. Pitu tanda anu mopatongawa apa anu ina mewali i eo anu ina mai (12:1–16:21)
4. PepopeitakaNa anu katolu (17:1–21:8)
a. I Yohane mangita sadua towawine anu madaa mpii babeiana, sangana i Babeli (17:1–19:10)
b. I Yesu raita ewa Topensawi i dara anu lau mombeala (19:11–21:8)
5. PepopeitakaNa anu kaibana:
I Yohane mangita sadua towawine anu napotombika Ana Dimba, sangana Yerusale anu Bou (21:9–22:5)
6. Lolita kasopoana (22:6-21)