Sura anu nauki ni
Yudasi
1
1 Poka-poka anu kupokaasi! Sura ei lako si aku i Yudasi, tudua ni Yesu Kerisitu poka ni Yakobu. Sura ei kupakatu si komi poka anu narondemo ni Pue Ala Tuamata mewali tauNa. I Pue Ala mampokaasi ai mokampai liliu komi duduuna i kadongkaNa mpesola i Yesu Kerisitu. 2 Kupekakaeka komi si Pue Ala bona nakiraka komi pepokaasiNa ai kalompe nu katuwu ai kamaasiNa.Tunggaia nu sura ei
3 Poka-poka anu kupokaasi! Mpolinguruna pampekiriku kuunde mpii moukika komi sura kono i katesoremata anu tasumbamo lako si Pue Ala. Agaiana ei-ei, tebaliki pampekiriku, lawi tesuweki raraku moukika komi sura ei, bona batena nipari-pari mopakaroso pepotuumi i patudu anu mamonso, anu Napadongkamo si kita tauNa.
4 Kuuli ope-ope ei lawi ria sira guru agama anu mesua ngkandii-ndii i olomi anu mangkeni patudu anu masala. Tau aretu manguli, ka siranamo pokata sampepepotuu, agaiana kamonsona baria sira mengkoru si Pue Ala. Raulira mbui, nakeningkabula rara ni Pue Ala pensani mboto kita mampeulai peundea nu rarata anu madaa. Patudu etu madaa, lawi mobaliki sira patudu anu mamonso kono i kabula rara ni Pue Ala, ai mosapuaka sira Datuta ai Pueta, i Yesu Kerisitu. Guru anu mepakanawu aretu, ina rasuku sira, lawi lako ni banimpiamo napakanotomo ni Pue Ala i rara Sura Ngkora Magali kono karasukura.
Pesuku ni Pue Ala i tau anu madaa babeiara
5 Mewali, kamonsona ope-ope anu kuulika komi ei niinsanimo. Agaiana nauda awetu, kupenoka mampopaingaka mpesola komi adiwa pesuku ni Pue Ala i tau anu madaa babeiara. Ni banimpia i Pue mosorema toSaraeli anu mawori lako i tana Masiri. Agaiana roo awetu, i Pue Ala mampopate tau sira anu baria mepotuu si Ia. 6 Nikaendo mbui basangkia dua malaeka anu ni banimpia. Santongo sira baria mamposondoka kuasara anu rakirakamo sira ni Pue Ala, ai mopalengi sira peariara i suruga. Malaeka aretu nasilu sira ni Pue Ala ai rante anu baria pensani mabotu, ai Nataha sira i rara pearia anu madedi, ai ina Nataha liliu sira duduuna dongka tempona Nabotusi sinangka kara-karara i eo pobotusia. 7 Nikaendo mbui kota Sodomo ai Gomora ni banimpia ai kota ntanina anu gompi. Tumpu nu kota aretu madaa babeiara ewa kadaa nu malaeka anu kupololita ni mpongone. Sira aretu, mebualosi sira ai maisi babeiara anu merikati, etumo mpane rapopesiasi sira i rara apu anu mambugi liliu. I Pue Ala mosuku toSodomo ai toGomora bona mewali pepopainga i ope-ope tau.
8 Mewali, nauda ewa etumo pesuku ni Pue Ala i guru-guru anu mepakanawu aretu, batena madaa babeiara. Raulira pansumbara pangipi, ai pangipi etu mopaliu sira mobabei anu merikati. Baria rahailera kuasa ni Pue Ala ai mopapakoi sira malaeka-malaeka i suruga. 9 Mogaloda i Mikael tadulako nu ope-ope malaeka, baria pebai mopapakoi Datu nu Seta lako i kuasana saduduana, agaiana naulika ngkida, “I Pue saduduaNa ina mokambaroka iko!” Etu mewali i tempo nu kamate ni nabi Musa, mampombesesei sira wotowata ni Musa ba ima anu ina mangala. 10 Agaiana tau anu mepakanawu aretu, mopapakoi sira sinangka anu baria rainsanira. Mampeulai ngkida sira peundeara saduduara, simbela ewa binata anu baria ria pampekirira. Nakeni nu babeiara etu, moparia karopu si sira. 11 Marugimo sira! Mangula ngkida sira babeia ni Kai ni banimpia. Manawu sira i rara dosa simbela ewa i Bileam, lawi mangkadelo ngkida sira doi. I Pue Ala ina mosuku sira duduuna maropu ewa i Kora i tempona moewa i Pue Ala.
12 I pogulu-gulumi mangkoni simbela, lako baria mani komi mangkoni roti mokaendo kamate ni Yesu Kerisitu, guru-guru anu mepakanawu aretu, mepakaea mpuu babeiara lawi mesioro sira ai mampekiri ngkida sira wotora saduduara. Sira ewa gawu anu nawui nu pambui agaiana baria moparia uda. Sira ewa kau anu tewukamo. Naudapae i tempo powua, batena baria ria wuana lawi mamatemo. 13 Babeiara anu mepakaea etu, ina tongawa ewa parupu tesore liliu i wiwi nu tasi anu nakeni balumba nu tasi anu mepakaeka. Sira ewa betue anu baria manoto polumakoana anu mopakawuli tau. I Pue Ala mopatimamakamo peariara anu madedi mpii, ina rasuku sira i se etu duduuna i kasae-saeana.
14 I Heno etu iamo pemulea ni Adama anu kapitu lapina. Ni banimpia mopadongka ia lolita ni Pue Ala kono i tau aretu, nauli, “Monso-monso i Pue ina mai simbela-mbela ai malaeka ni Pue Ala anu i nsobuna kaworira, 15 bona mobotusi Ia kara-kara nu ope-ope tau. Mpane mosuku tau nakeningkabariara mampeulai peundeaNa ai nakenimpopakoira i Pue ai pololitara.”
16 Guru-guru anu mepakanawu aretu mampodeadeka sira i Pue Ala ai mosasalai sira tau ntanina. Mangula ngkida sira peundea nu rarara anu madaa. Nakeni nu ope-ope babeiara, mampemabose sira, ai moore-ore sira tau bona mansumba rasi.
Patudu bona maroso pepotuuta
17 Agaiana komi, pokaku anu kupokaasi, sangangaa nikaendo apa anu ni banimpia rapadongka nu suro-suro ni Yesu Kerisitu Pueta. 18 Anu raulikamo komi iamo, “I eo-eo lako baria mani dongka eo pebotusi, ria sira tau anu ina mampopowadi-wadi komi. Mangula ngkida sira peundea nu rarara anu madaa.” 19 Tau anu awetu moparia ngkida sira posisisala si komi. Baria sira nakuasai nu Inosa Magali, agaiana mampeulai ngkida sira peundea nu rarara anu madaa.
20 Agaiana komi pokaku anu kupokaasi! Sangangaa mombepakaroso mporara liliu komi bona maroso pepotuumi, lawi pepotuu anu tapotuu etu magali. Mekakae liliu komi ai i rara mpekakaemi, niperade bona nanini liliu komi nu Inosa Magali. 21 Ai tuwu liliu komi i rara kamaasi ni Pue Ala, tongomi mampegia pepokaasi nu Pueta, i Yesu Kerisitu, anu ina mokiraka kita katuwu malompe anu baria mokasopoa.
22 Ane ria sira tau anu bata-bata mani pepotuura, nipatongawa asimi si sira. 23 Ane ria sira anu mensopi lako i pepotuura, maliga komi motulungi sira ewa potulungimi tau anu ina nakonimo nu apu bona tesorema sira lako i apu. Nipopeitaka mbui sira tau ntanina asimi, agaiana sangangaa mainga-inga komi bona ntena komi tedii i rara nu babeiara. Nipokaasi sira tau aretu, agaiana nikasisi babeiara anu madaa.
Petoia si Pue Ala
24 Toiamode i Pue Ala! Makuasa Ia mokampai komi bona ntena komi manawu i rara nu dosa, ai anu mopakagali liliu komi. Ai Ia anu mampopewali komi pensani dongka si Ia, bona mampombelioka Ia. I tempo etu ina maruminsi mpuu katonomi. 25 I Pue Ala, anu baria ria kasimbelaana, Ia Topesoremata mampoliungi i Yesu Kerisitu Pueta. Tepomabose sangaNa lawi Ia ngkida anu meawa, anu mabose katuwuNa, anu makuasa ai anu teadai, lako baria mani ria dunia, duduuna ei-ei, ai duduuna i kasae-saeana. Amin!