5
1 Lako ni se etu, kuita mbuimo, ria sura anu tewilulu i pale kuana nu sadua Tau anu momeso i pomesoa datu etu. Sura etu buke uki mpotimali, rawilulu, mpane rapekatandai ai pitu mbua pampekatandai.a 2 Kuita ria sadua malaeka anu maroso anu mololita mauni-uni, nauli, “Ima anu sintoto mobungkasi sura ei, ai ima anu pensani mobungkasi pampekatandaina bona sura ei pensani rabasa?” 3 Baria mpuu rasumba sadua anu pensani mobungkasi sura etu, mpane mobasa isina. Mogalo i suruga ba i dunia ba i rara nu tana i pearia nu tomate, baria ria sadua anu nabuku. 4 Motumangi aku nakeningkawioraku, lawi baria ria sadua anu rasumba anu sintoto mobungkasi sura etu, ai mampeita isina. 5 Roo awetu, ria sadua lako i tadulako anu rompulu iba anu mangulika aku, “Inee iko motumangi. Lawi ria anu menangimo! Ia rauli Singa anu lako i toYehuda, pemulea ni Datu Daudi!b Ia anu pensani mobungkasi pitu pampekatandaina mpane mobungkasi sura etu.”6 Roo awetu, kuita i olo nu pomesoa nu datu ai iba mpangka pinatuwu ai tadulako aretu, meongko sambaa Ana Dimbac. Ia ewa tesambalemo. TonduNa pitu mbua, ai pitu mbua mbui mataNa. MataNa anu pitu etu, lempona Inosa ni Pue Ala anu pitu anu Natudu lau i sumalele dunia. 7 Ana Dimba etu, lau modoko sura etu lako i pale kuana nu sadua Tau anu momeso i pomesoa nu datu. 8 Awetu Nadoko sura etu, iba mpangka pinatuwu aretu ai tadulako anu rompulu iba molingkudumo sira motumpa i lio nu Ana Dimba. Ope-ope sira mopatoro kecapi ai mangku bulawa anu buke ai anu-anu mawongi anu rauli dupa. Dupa etu, lempona pekakae nu tau ni Pue Ala. 9 Moduduluamo sira ai sampangka dulua anu bou, raulira:
“Ikomo anu sintoto modoko sura etu
ai mobungkasi pekatandaina
lawi rapopatemo Iko;
Mpane raaMu anu lako i kamateMu,
Nupoposoremamo sira tau,
lako i ope-ope kadatua, lako i ope-ope pemulea ai lako i sinangkana basa,
mpane Nususu sira si Pue Ala.
10 Nupopewalimo sira sambua kadatua anu mewali tadulako menomba
anu mampopolumako bago penomba si Pue Ala, Pueta.
Ina meparenta sira i wongko dunia.”
11 Roo awetu, kuitamo ai kuepe wotu nu malaeka anu mawori mpii. Meongko sira motoleliki pomesoa nu datu ai iba mpangka pinatuwu ai tadulako aretu. 12 Moduluamo sira mauni-uni, raulira:
“Ana Dimba anu rasambale etu, sintoto mpuu modoko kamakuasa, kapebuku, kamatopa, ai karoso lako si Pue Ala;
tabila, tapakabose sangaNa, ai tatoia.”
13 Lako ni se etu, kuepe mbuimo ope-ope anu tuwu i suruga, i dunia, i rara nu tana pearia nu tomate ai i rara nu tasi; modulua sira mauni-uni ewa ei:
“Sadua Tau anu momeso i pomesoa nu datu ai Ana Dimba,
tatoia, tabila, tapakabose sangaRa,
ai makuasa Sira duduuna kasae-saeana!”
14 Rasonoi nu iba mpangka pinatuwu aretu, “Amin!”. Tadulako aretu molingkudu mpane motumpamo sira dongka i tana, menomba.