PepopeitakaNa anu kadua
Pepopeitaka kono si Pue Ala anu tongona rapenombai i suruga
4
1 Roo awetu, ria mbuimo anu rapopeitaka aku. Kuitamo boboka anu tebungkasi i suruga, mpane kuepe mbuimo sambua wotu anu mololitamo ni mpolinguruna si aku. Pomomonina, ewa pomomoni nu tatamburu. Naulika aku, “Maingkomode, pemponemode mai! Ina kupopeitaka iko apa anu sangangaa ina maligamo pewalina.” 2 Ni tempo etu mbui, nakuasaimo aku nu Inosa ni Pue Ala, mpane kuita i suruga, ria sambua pomesoa nu datu, ai ria sadua Tau anu momeso i pomesoa etu. 3 LenseNa mengkila-ngkila ewa paramata anu rauli paramata yaspis ai paramata sardis. Ria mparagia anu motoleliki pomesoa nu datu etu, ewa paramata samrud malelewau mengkila-ngkila. 4 Anu motoleliki pomesoa etu, ria rompulu iba pomesoa kadatua ntanina. Pomesoa aretu rapomesoi rompulu iba tadulako anu mesampi bula ai mesongko kamakuasa lako i bulawa. 5 Lako i pomesoa nu datu etu, mombesangkemo banibi, mpane gumpata moperere. I lio nu pomesoa etu, ria pitu mbua sulo anu mambugi. Lempona iamo Inosa ni Pue Ala anu pitu. 6 Ria mbui i lio nu pomesoa etu, lobo anu ewa tasi kaembana, lensena maninto mpuu ewa kaca ba watu anu maninto.Pomesoa anu masuku etu, natoleliki iba mpangka pinatuwu. Maisi mpuu matara. I sumalele wotora nakariangi mata, malompe mbai i liora malompe mbai i talikura. 7 Anu kaisa lako i iba mpangka pinatuwu etu ewa singa. Karombaana ewa japi tuama. Anu katoluna, woona ewa woo nu manusia. Anu kaibana raita ewa tosi moto i tempona meloko. 8 Iba mpangka pinatuwu aretu mokapi aono mbua, mbai i raoa ai mbai rara nu kapira nakariangi mata. Baria sira mengkangkaroo mampololita petoiara. Malompe mabaa ba kawengi, raulira liliu:
“Magali! Magali! Magali!
I Pue Ala iamo anu mabose kuasaNa lako i ope-opena,
Ia anu riamo mpolinguruna,
anu ria ei-ei,
ai anu ria duduuna kasae-saeana!”
9 Iba mpangka pinatuwu aretu mampopenomba petoia, mobila ai manguli maisi kalompena i sadua Tau anu momeso i pomesoa nu datu etu, anu tuwu duduuna kasae-saeana. 10 Ai i tempora mopadongka petoiara, tomana anu rompulu iba molingkudu sira motumpa i lio nu sadua Tau anu momeso i pomesoa nu datu, anu tuwu duduuna kasae-saeana. Menombamo sira si Ia, mpane songko kamakuasara lau rasusura i lio nu pomesoaNa tanda pebilara. Roo awetu, raulira:
11 “Pueki, i Pue Ala!
Ikomo anu sintoto ratoia ai rabila.
Iko ngkida anu makuasa!
Lawi Iko anu mampopewali sinangkana.
NakenimpeundeaMu, Nupopewali ai Nupatuwu sinangkana anu ria.”