Sura anu rapakatuka sira jumaa anu i kota Sardis
3
1 Nauli mbui ni Pue Yesu si aku, “Ukimode lolita ei dongka i malaeka anu mokadipuraka jumaa i kota Sardis:Eimo lolita nu Tau anu mopatoro pitu Inosa ni Pue Ala,a ai pitu ogu betue etu, Nauli: Kuinsani apa anu nibabei. Rauli tuwu komi, molentano kamonsona, mamate pepotuumi! 2 Pematamode komi! Nipakaroso pepotuumi anu ria mani lako baria mani ope-ope etu mamate, lawi apa anu nibabei Kuita ope-ope, ai baria mani ria anu manoto i petotoki ni Pue Ala TuamaKu. 3 Etumo mpane Kuulika komi: sangangaa nikaendo patudu anu niepe ai anu nidoko ni banimpia. Nipeulaimode apa anu rapatuduka komi etu, mpane menonsomo komi lako i dosami. Mainga-inga komi, lawi ane baria komi kasaliu mengkawangu, ina dongka Aku mampomberumpaka komi. Ai i kadongkaKu etu, ewa kadongka nu topanangka, lawi baria niinsani kaimpiana. 4 Agaiana ria basangkia tau i olomi i Sardis anu tetida sira i rara nu pepoputuura, lawi baria sira mobabei babeia anu madaa. Sira etu ewa tau anu mokampai liliu kabula nu badura. Ina molumako sira simbela-mbela ai Aku, mebadu ai sampi anu bula anu meningki, lawi sira anu sintoto Kuporanga.
5 Ima anu menangi lako i kuasa anu madaa, ina Kujubai sira ai juba anu bula. Sangara baria ina Kuparisi lako i rara Sura Ngkatuwu.b Ai i lio nu TuamaKu ai malaekaNa, Kupangaku ka sirana tauKu.
6 Ima komi anu mangepe, nipetingai mpii apa anu nauli nu Inosa Magali i jumaa-jumaa.”
Sura anu rapakatuka sira jumaa anu i kota Filadelfia
7 Nauli mbui ni Pue Yesu si aku, “Ukimode lolita ei dongka i malaeka anu mokadipuraka jumaa i kota Filadelfia:
Eimo lolita nu Tau anu magali ai anu manoto. Iamo anu mopatoro pegili boboka i kadatua ni Daudi.c Agaiana Ia anu mobungkasi boboka, baria ria anu pensani motuko. Ane Ia anu motuko boboka, baria ria anu pensani mobungkasi, 8 Nauli: Kuinsani apa anu nibabei. Peita, Kubungkasika komi boboka anu baria pensani ratuko, lawi nauda saudidamo rosomi, agaiana nipeulai pololitaKu ai baria mpuu nisapuaka ka nipotuuKu. 9 Ria sira tau anu manguli ka sirana toYahudi, agaiana dongkora ngkida. I rarara, baria sira toYahudi, topeguru Datu nu Seta sira. Tau aretu, ina Kukeni mai si komi. Ina molingkudu sira i liomi, ai rainsanira ka Kupokaasimi. 10 Nakenimpangulami parentaKu anu manguli sangangaa tetida komi i rara nu kapari, etumo mpane ina Kuperurui komi lako i kapari anu ina morumpa sumalele dunia. Ope-ope etu ina mewali bona mampetandaka tau anu meari i dunia.
11 Bariamo masae ina dongka Aku! Sangangaa nipatoro liliu pepotuumi si Aku, bona baria ria sadua anu pensani mandoa saromi, tanda mpenangimi.
12 Ima anu menangi lako i kuasa anu madaa, ina Kupopewali sira ewa pesuga arii i Tombi ni Pue Ala anu magali ai ina meari sira i se etu duduuna kasae-saeana. I wotora ina Kuuki sanga ni Pue Ala TuamaKu ai sanga nu kota ni Pue Ala. Kota etu iamo Yerusale anu maboud anu ina mendolu mai lako i suruga lako si Pue Ala TuamaKu. Ewa etu mbui ina Kuuki i wotora sangaKu anu mabou.
13 Ima komi anu mangepe, nipetingai mpuu apa anu nauli nu Inosa Magali i jumaa-jumaa.”
Sura anu rapakatuka sira jumaa i kota Laodikia
14 Nauli mbuimo ni Pue Yesu si aku, “Ukimode lolita ei dongka i malaeka anu mokadipuraka jumaa i kota Laodikia:
Eimo lolita nu Tau anu rasanga ‘Amin.’ Iamo Sabi anu mobambari liliu apa anu mamonso. Iamo Pepuuae nu sinangka-nangkana anu nateru ni Pue Ala, 15 Nauli: Kuinsani apa anu nibabei. Pepotuumi baria mamate, baria mbui mabuke ewa ue anu baria makula ai baria mbui malengi. Aginamo mamate ba mabuke pepotuumi. 16 Mewali nakeningkabariana mamate pepotuumi ai baria mbui mabuke pepotuumi, etumo mpane lako i rara nu ngangaKu ina Kulua komi, lempona bariamo komi Kuunde. 17 Niuli pebuku komi, sondo katuwumi, ai bariamo ria kamakurami. Agaiana, kamonsona baria niinsani kaadiwami! Maruminsi mpii pesiasimi! I rara pepotuumi, mesiasi komi, mabilo komi, ai meloa komi. 18 Etumo mpane Kukiraka komi lolita ei: bona nibalukimo si Aku bulawa anu roomo rasowu i rara mbugi nu apu, bona pebuku mpii komi. Nibaluki mbui si Aku sampi anu bula bona mebadu komi ai tewuni anu nipokaea. Mpane nibaluki mbui si Aku pakuli nibasaika matami bona meita komi. 19 Ope-ope tau anu Kupokaasi, sira anu Kukambaroka ai anu kusepe bona mangula sira patuduKu. Etumo mpane Kuuli, sangangaa mabuke pepotuumi mpane menonsomo komi lako i dosami!
20 Nipeita! Aku se ei, meongko Aku i lio boboka, mpane motangkudodoo boboka etu. Ane ria anu mangepe wotuKu mpane nabungkasika Aku, ina mesua Aku i rarana, mpane meari simbela-mbela ai ia. Ina mangkoni Aku simbela-mbela ai ia, mpane ia mbui ina mangkoni simbela-mbela ai Aku.
21 Ima anu menangi lako i kuasa anu madaa, ina Kupopomeso simbela ai Aku i pomesoa kadatuaKu, simbela ewa Aku mbui menangimo, mpane momeso Aku meparenta simbela-mbela ai TuamaKu i kadera kadatuaNa.
22 Ima komi anu mangepe, nipetingai mpii apa anu nauli nu Inosa Magali i jumaa-jumaa.”