Sura anu rapakatuka sira jumaa i kota Epesu
2
1 Naulika aku ni Yesu, “Ukimode lolita ei dongka i malaeka anu mokadipuraka jumaa i kota Epesu:Eimo lolita nu Tau anu mopatoro betue anu pitu oguna i pale kuanaNa ai anu molumako i olo pambolia sulo anu lako i bulawa anu pitu mbua, 2 Nauli: Kuinsani apa anu nibabei. Maruminsi pobagomi ai tetida komi i rara nu bagoKu, ai tetida komi ane rapopesiasi komi nakenimpepotuumi si Aku. Kuinsani ka nikasisina babeia nu tau sira anu madaa. Ria sira anu manguli ka sirana suroKu, agaiana baria mamonso. Niinsani podongkora, lawi roomo sira nipetandaka. 3 Sabara komi i rara nu kapari nakenimpepotuumi si Aku, ai baria malede rarami meula si Aku. 4 Agaiana ria anu Kusalaika komi: bariamo Aku nipokaasi ewa pepokaasimi anu mpolinguruna. 5 Etumo mpane nikaendo: nipetingai! Manawu komi i rara nu dosa. Mewali, penonsomode komi! Nibabeimode apa anu nibabei mpolinguruna. Lawi ane baria nibabei ewa etu, i tempona kamaiKu luwu, ina Kulaliki pambolia sulomi lako i peariana. 6 Agaiana ria mbui babeiami anu malompe, lawi baria niunde babeia nu tau sira anu mampeulai patudu ni Nikolaus, anu Kukasisi mbui.
7 Ima komi anu mangepe, nipairara apa anu nauli nu Inosa Magali i jumaa-jumaa i kota-kota ntanina.
Tau anu menangi lako i kuasa anu madaa, Kupaliu mpuu mangkoni wua nu kau ngkatuwua i Bonde Paradesi ni Pue Ala.”
Sura anu rapakatuka sira jumaa i kota Smirna
8 Roo awetu, nauli mbuimo ni Pue Yesu si aku, “Ukimode lolita ei dongka i malaeka anu mokadipuraka jumaa i kota Smirna:
Eimo lolita nu Tau, anu pepuua nu sinangka-nangkana ai anu kasopoana, anu mamatemo agaiana tuwu mpesola, 9 Nauli: Kuinsani kapari anu morumpa komi, ai Kuinsani pesiasimi, agaiana kamonsona pebuku komi i rara nu pepotuumi. Kuinsani adiwa karakaisiimi lolita nu tau sira anu manguli ka toYahudira. Agaiana kamonsona, i rarara baria sira toYahudi; topeguru Datu nu Setada sira. 10 Bona niinsani: Datu nu Seta ina motarunggu basangkia dua i olomi, ai ina nakelo-kelo komi bona baria komi tetida lako i pepotuumi. Ina rapopesiasi komi i rarana sampulu eona kasaena. Agaiana inee nipokaeka pepopesiasi etu. Sangangaa tetida komi i rara nu pepotuumi naudapae komi rapopate. Ane ewa etu nibabei, ina Kukiraka komi katuwu malompe anu baria mokasopoa, surungina lako i penangimi.
11 Ima komi anu mangepe, nipairara mpii apa anu nauli nu Inosa Magali i jumaa-jumaa.
Ima anu menangi lako i kuasa anu madaa, baria mpuu sira ina mansumba pesuku i rara naraka anu rasanga kamate karombelana.”
Sura anu rapakatuka sira jumaa anu i kota Pergamus
12 Roo awetu, nauli mbui ni Pue Yesu si aku, “Ukimode lolita ei dongka i malaeka anu mokadipuraka jumaa i kota Pergamus:
Eimo lolita nu Tau anu mopatoro guma anu momata mpotimali, 13 Nauli: Kuinsani imba peariami. Meari komi i kadatua Datu nu Seta. Agaiana i se etu, batena nipangaku liliu sangaKu. Awetu mbui i karapopatena sabiKu i Antipas anu matundu, i kotami anu nakuasai Datu nu Seta, ni tempo etu baria nisapuaka pepotuumi si Aku. 14 Agaiana ria basangkia mpangkana anu Kusalaika komi, lawi ria komi basangkia dua anu mampeulai patudu ni Bileam.b Ni banimpia i Bileam etu mopaguru i Balak adiwa dalana mopakanawu toSaraeli bona madosa sira. Nabawai sira mangkoni pangkoni anu rapopenomba i anitu, ai nabawai sira mebualosi. 15 Ewa etu mbui, ria i olomi anu mampeulai patudu nu topeguru ni Nikolaus. 16 Etumo mpane Kuulika komi, penonsomode komi lako i dosami etu! Ane baria, ina lau Aku si komi mampombealaka tau anu baria menonso lako i dosara, ai guma anu ria i ngangaKu.
17 Ima komi anu mangepe, nipairara mpii apa anu nauli nu Inosa Magali i jumaa-jumaa.
Ima anu menangi lako i kuasa anu madaa, ina Kupaliu sira mangkoni roti mannac anu tewuni. Ina Kukiraka mbui sira saogu watu anu bula. I watu etu teuki sanga anu bou, anu baria rainsani nu tau ntanina. Anu manginsani, batena ngkida anu modoko watu etu.”
Sura anu rapakatuka sira jumaa anu i kota Tiatira
18 Nauli mbui ni Pue Yesu si aku, “Ukimode lolita ei dongka i malaeka anu mokadipuraka jumaa i kota Tiatira:
Eimo lolita nu Ana ni Pue Ala. MataNa mewangka ewa mbugi nu apu, mpane mbai i paaNa mewangka ewa tambaga anu lako rasowu i rara mbugi nu apu, 19 Nauli: Kuinsani apa anu nibabei. Kuinsani asimi i singka rangami ai pepotuumi si Aku. Malompe pampopolumakomi bagoKu. Tetida komi i rara nu kapari. Melumbu karuminsina pobagomi si Aku ei-ei, mpane lako i pobagomi ni tempomi mpolinguruna mepotuu si Aku. 20 Agaiana ria mani anu Kusalaika komi. Lawi ria sadua towawine anu ewa i Isebeld ni banimpia anu manguli ka iana sadua nabi, mpane nipogeaka ngkida ia mopaguru tau anu mepotuu si Aku. Towawine etu mopatudu ia tuduaKu sira bona mebualosi, mpane mangkoni sira pangkoni anu rapopenomba i anitu. Mawori tuduaKu napakanawu ai patuduna etu. 21 Kukirakamo ia tempo bona menonso lako i dosana, agaiana baria ia madota mopawia babeiana mampobalu wotona. 22 Mewali ei-ei, ina Kupoparumpaka ia saki, simbela-mbela ai sampombebualosina sira. Batena mantodisa mpuu ia i paturuana. Ngkalina ngkida ane tau aretu bariamo mampeulai babeia ni Isebel. 23 Anu meula si ia ina Kupopate. Lako i se etu, ina tongawa i ope-ope jumaa ka Akuna anu moparesa pekiri ai rara nu manusia. Ina Kusurungi ope-ope babeiami.
24 Agaiana ria komi sanggaa i Tiatira anu baria mampeulai patudu anu madaa etu, ai baria niunde mampegurui patudu anu rauli panginsani Datu nu Seta anu tewunikai. Mewali Kuulika komi, bariamo ina Kutambai kolongami ai parenta ntanina, 25 agaiana pepotuumi si Aku sangangaa maroso, duduuna dongka Aku.
26-27 Ima anu menangi lako i kuasa anu madaa, ai mampeulai peundeaKu duduuna i kasopoana, ina Kukiraka ia kuasa simbela ai kuasa anu Kudoko mbui lako i TuamaKu. Ina Kukiraka ia kuasa moparentai santina-santina tau i dunia. Karoso nu kuasaKu anu Kukiraka ia etu ewa karoso nu lai besi. Ai kuasa etu, ina napake mopakaropu tau anu santina-santina etu ewa kura tana anu rapengka.e 28 Ai bona mopatongawa penangina, ina Kukiraka ia betue mbai i pensibea eo.
29 Ima komi anu mangepe, nipairara mpii apa anu nauli nu Inosa Magali i jumaa-jumaa.”