Pepopeitaka
si Suro Yohane
1
1 Isi nu sura ei mampololita apa anu napopeitaka ni Yesu Kerisitu, kono i apa anu ina mewali. I Pue Ala motudu i Yesu Kerisitu mobambari si kita tudua-tuduaNa apa anu bariamo masae sangangaa mewali. I Yesu motudu malaekaNa lau mampopeitaka ope-ope etu si Yohane, tuduaNa. 2 Mewali napololitamo ni Yohane ope-ope Ngkora ni Pue Ala anu naita etu, anu napopeitakamo ia ni Yesu Kerisitu. 3 Matono mpuu tau anu mobasa, ai matono mbui sira anu mampetingai ai mampeulai tewai ni Pue Ala, anu teuki i rara nu sura ei, lawi bariamo masae ope-ope ei sangangaa mewali.Lolita tabea
4 Sura ei anu lako si aku, i Yohane, kupakatuka komi jumaa anu meari i pitu ogu kota anu i propinsi Asia. Kupekakaeka bona i Pue Ala ina mowati komi i sukana kabula nu raraNa ai ina Nakiraka komi kalompe nu katuwu. Pewati ei nisumba lako si Pue Ala. I Pue Ala riamo lako ni mpolinguruna, ai anu ria ei-ei, ai anu ria duduuna kasae-saeana. Ai pewati ei nisumba lako i Inosa anu pitu anu ria i lio nu pomesoa ni Pue Ala, 5 ai lako si Yesu Kerisitu anu mpolinguruna tuwu mpesola lako i kamate. I Yesu Kerisitu iamo Sabi anu manguli liliu apa anu mamonso, ai Iamo Tadulako anu moparentai ope-ope datu i dunia.
I Yesu mampokakaia kita, Nasusu wotoNa rapopate bona Napawia kita lako i kuasa dosa, 6 ai Napopewali kita tauNa i rara nu peparentaaNa. Napopewalimo kita tadulako menomba anu mampopolumako bago penomba si Pue Ala, TuamaNa. I Yesu Kerisitumo anu mabose sangaNa ai anu makuasa duduuna kasae-saeana. Amin!
7 Nipetingai lompe, ina niita mai Ia nabalungkusi nu gawu!a
Ope-ope tau ina mangita Ia,
awetu mbui tau sira anu motambuku Ia ni banimpia.
Ai ope-ope tau i dunia ina motumangi nakeningka Iana.b
Kalawiana ina mewali. Amin!
8 Nauli ni Pue Ala, “Aku iamo Alfa ai Omega,c lempona Akumo pepuua nu sinangka-nangkana ai anu kasopoana. Ria Aku lako ni mpolinguruna, ria Aku ei-ei, ai batena ria liliu Aku duduuna kasae-saeana. Akumo anu makuasa mpii lako i ope-opena.”
PepopeitakaNa anu mpolinguruna
(1:9–3:22)
I Yohane mangita peawa ni Kerisitu
9 Aku ei i Yohane, pokami i rara sanga ni Yesu. Simbela karapopesiasita nakenimpeulata si Yesu, ai simbela ka tasumbana tibota i rara peparenta ni Pue Ala, ai simbela mbui katetidata mantodisa pepopesiasi etu. Ane aku ei, ratende aku i lewuto anu rasanga Patmos lawi mobambari aku Ngkora ni Pue Ala, ai mampololita aku kono i Yesu. 10 I Eo ni Pue nakuasai aku nu Inosa Magali, ai kuepemo wotu nu tau i talikuku. Marimbuku wotu etu, ewa pomomoni nu tatamburu. 11 Naulika aku ewa ei, “Apa anu nuita, ukimode i sura mpane nupakatuka sira jumaa anu meari i pitu ogu kota iamo: Epesu, Smirna, Pergamus, Tiatira, Sardis, Filadelfia ai Laodikia.”
12 Membalili aku i talikuku bona kuita ima anu mololita si aku. Awetu aku membalili, kuita pitu mbua pambolia sulo anu rababei lako i bulawa. 13 I olo nu pambolia sulo etu, kuita sadua tau, lenseNa ewa Ana Manusia.d Kamandoe nu jubaNa dongka i todeaNa ai pondana tetuko ai bana anu rababei lako i bulawa. 14 WuluaNa bula ewa wulu dimba, bula ewa kakawu. MataNa mewangka ewa mbugi nu apu. 15 Mbai i paaNa mewangka ewa tambaga anu lako rasowu i rara mbugi nu apu. WotuNa ewa pomomoni rumuku ue anu mowoo. 16 Pale kuanaNa mopatoro pitu ogu betue, mpane lako i ngangaNa mensuwu samata guma anu mataru anu momata mpotimali. LioNa mewangka ewa pewangka eo makere.
17 Awetu Ia kuita, kasaliu lau aku i lioNa molumba i tana, ewa tau anu mamate. Lako ni se etu, wotoku Napaga ai pale kuanaNa mpane Naulika aku, “Inee iko maeka. Aku eimo pepuua nu sinangka-nangkana ai anu kasopoana. 18 Akumo anu tuwu. Mamate Aku ni banimpia, agaiana tuwu mpesola Aku duduuna i kasae-saeana. Aku anu makuasa mopatoro pegili boboka nu kamate ai pearia nu tomate.e 19 Mewali, ukimode apa anu nuita ni mpongone, apa anu mewali i tempo ei, ai apa anu ina mewali. 20 Ane pitu ogu betue anu nuita i pale kuanaKu ai pambolia sulo anu lako i bulawa anu pitu mbua, baria mani nuinsani lempona. Mewali, ina Kupakanotoka iko lempona: betue anu pitu ogu, lempona malaeka anu mokadipuraka jumaa anu meari i kota anu pitu mbuana.f Mpane pambolia sulo anu pitu mbua, lempona jumaa i pitu ogu kota.”