Pampekatandai anu pitu
(6:1–8:5)
Ana Dimba mobungkasi aono pampekatandai anu mpolinguruna
6
1 Roo awetu, kuitamo Ana Dimba mobungkasi pampekatandai anu kaisa lako i pitu mbua pampekatandai etu. Kuepe sambaa lako i iba mpangka pinatuwu aretu meronde mauni-uni ewa pomomoni nu gumpata, nauli, “Maingkomode!” 2 Ungangkidamo, kuita sambaa dara anu bula. Ai tau anu mensawi i dara etu mopatoro pana, mpane rakiraka sambua songko kamakuasa, songko etu tanda nu penangina. Laumo ia ewa sadua topenangi anu lau monangi iwalina.3 Roo awetu, Ana Dimba etu mobungkasi pampekatandai anu karombuana, mpane kuepe pinatuwu karombaana, manguli, “Maingkomode!” 4 Mai mpuumo dara anu sambaana. Dara etu mawanta mpii. Tau anu mensawi i dara etu, rakiraka kuasa mogero posintuwu nu tau i dunia duduuna mombepopate sira tau i sumalele dunia. Ai rakiraka mbui ia samata guma anu mabose.
5 Ana Dimba mobungkasi mbuimo pekatandai anu katolu, mpane kuepemo pinatuwu anu katoluna, manguli, “Maingkomode!” Kuita mbuimo sambaa dara anu maeta. Tau anu mensawi i dara etu mopatoro sambua popetimba.a 6 Pensuwu nu dara anu maeta etu, ria kuepe ewa tau anu mololita i olo nu iba mpangka pinatuwu aretu, manguli, “Saro saeoa wule sondo rapopobaluki pobae sakilo, ba palelo tolu kilo ngkida. Agaiana inee nupakarugi lana saitun ai anggoro.”
7 Roo awetu, Ana Dimba mobungkasi mbuimo pekatandai anu kaiba, mpane kuepe pinatuwu anu kaiba, manguli, “Maingkomode!” 8 Kuita sambaa dara anu balibi. Sanga nu tau anu mensawi i dara etu iamo “Kamate,” mpane i talikuna naula ia nu “Pearia nu Tomate.” Anu rodua aretu rakiraka kuasa mampopate sangkira iba lako i ope-ope tau i dunia. Ria sira anu rapopate i rara nu pombealaa, ria sira anu mamate maoro, ria sira anu mamate narumpa nu saki anu melelesi, mpane ria sira anu rapopate nu binata anu maseke.
9 Roo awetu, kuita mbui Ana Dimba etu mobungkasi pekatandai anu kalima. Kuita i woi meja potunua popenomba,b ria sira tanuana nu tau anu rapopate lawi mobambari sira Ngkora ni Pue Ala, ai mopangaku liliu sira ka i Yesuna Puera. 10 Monganga sira mauni-uni, raulira, “O Pue anu makuasa, Pue anu magali ai manoto! Sangkia mani kasaena, lako Nusukuda sira tau anu madaa anu meari i dunia? Kiperade bona Nusurungi babeiara mampopate kami.” 11 Ope-ope tanuana aretu, sadua-sadua rakiraka sira santau badu anu bula. Mpane naulika sira ni Pue Ala, “Nipegia sala, lawi ria mani rangami anu sampopobago ai pokami sampepepotuu anu ina rapopate sira ewa komi. Ane sondomo kaworimi anu rapopate, lako Kusurungida sira iwalimi.”
12 Roo awetu, kuita Ana Dimba etu mobungkasi pekatandai anu kaaono. Ungangkidamo kelinu mabose, eo mewali maeta ewa buri, mpane wula mewali mawaa ewa raa. 13 Betue imba-imba ngkida manawu lako i langi toa i dunia, ewa kanawu wua nu kau anu sesena mani ane nawui nu pambui marimbuku. 14 Langi, ungangkidamo tewilulu ewa ali, mpane ope-ope bulu ai ope-ope lewuto i tasi, telimba lako i peariara. 15 Ni tempo etu, datu-datu i dunia, tuana, tadulako-tadulako pombeala, topebuku, tau anu makuasa ai ope-ope tau ntanina, dongka-dongka i tau anu baria batua ai anu batua katuwura, mentawunimo sira ope-ope i rara nu balamba ai i kala nu watu. 16 Mpane mongangamo sira mangulika bulu-bulu ai watu-watu, “Limbangimode kami! Bona tewuni kami lako i petotoki nu Sadua anu momeso i pomesoa nu datu, bona baria kami narumpa karumpu nu Ana Dimba anu ina mai!” 17 Lawi dongkamo eo anu mewulungati. Mewali ni tempo etu, i Pue Ala ai Ana Dimba mopatongawa karumpuRa, ai baria ria mogalo sadua tau anu nabuku mampombelioka Sira.