Pampekatandai ni Pue Ala i tauNa anu raperampai lako i rugi
7
1-2 Lako ni se etu, kuita sira iba malaeka anu meongko i iba suno dunia. Malaeka aretu mansumba sira kuasa lako si Pue Ala, bona mopakarugi tasi ai lore. Motaha sira pewui nu pambui lako i iba suno dunia, bona ntena ria pambui anu mewui i tasi, i lore ai i wana. Mpane kuita sadua malaeka dongka mbai i pensibea eo mangkeni pampekatandai anu lako si Pue Ala anu tuwu. Malaeka etu mololitamo mauni-uni mangulika sira malaeka anu iba ni mpongone, nauli, 3 “Inee sala nipakarugi tasi, lore ai wana, ane baria mani kiboli tanda i wingke nu tudua ni Pue Ala Pueta, ntena sira narumpa nu rugi etu.” 4 Mpane ria anu mangulika aku, kaworira anu rapekatandai aretu: sangatu iba mpulu iba nsobuna, lako i sampulu rontina toSaraeli. 5 Santina-santina sira, sampulu ronsobu anu rapekatandai.Lako i pemulea ni Yehuda, sampulu ronsobu anu rapekatandai.
Ewa etu mbui lako i pemulea ni Rube, pemulea ni Gad,
6 pemulea ni Aser, pemulea ni Naftali, pemulea ni Manase,
7 pemulea ni Simeo, pemulea ni Lewi, pemulea ni Isakar,
8 pemulea ni Sebulo, pemulea ni Yusupu, ai lako i pemulea ni Benyami.
Tau ni Pue Ala anu mawori mpii
9 Roo awetu, kuita mbuimo manusia anu mawori mpii, bariamo pensani raimba kaworira. Sira aretu, lako i sumalele dunia, lako i ope-ope kadatua, lako i ope-ope pemulea ai i sinangkana basa. Meongko sira i lio nu pomesoa nu datu ai i lio nu Ana Dimba. Mejuba sira juba anu bula, mpane mopatoro sira tawe anu ewa tawe nu sarao, rawera-werakara liliu mopatongawa kamatonora. 10 Mongangamo sira mauni-uni, raulira:
“Toiamo i Pue Ala, katesoremata tasumba lako si Pue Ala Pueta anu momeso i pomesoa nu datu, ai lako i Ana Dimba etu.”
11 Pomesoa nu datu ai tadulako anu rompulu iba simbela-mbela ai iba mpangka pinatuwu, ratoleliki nu ope-ope malaeka. Motumpamo ope-ope malaeka aretu, i lio nu pomesoa etu, ai menomba sira si Pue Ala, 12 raulira:
“Amin!
Tetoiamo Pueta i Pue Ala,
Tapomabose sangaNa,
Tapadongka katopaNa,
Tauli maisi kalompena si Ia,
Tabila,
Tabambari karosoNa,
Takaendo kamakuasaNa,
duduuna kasae-saeana! Amin.”
13 Roo awetu, sadua lako i tadulako aretu mekune si aku, nauli, “Ane tau anu mebadu bula arei, ba nuinsani kaimara? Ba nuinsani lako imba sira mai?”
14 Kusonoi, “Baria sira kuinsani. Komi tua anu manginsani.”
Mewali naulika aku, “Sira aretu, tau anu roomo sira mampodalai anu rauli tempo pepopesiasi anu maruminsi mpii. Sampira rabakosi ai raa Ana Dimba bona mewali mabula. 15 Etumo mpane meongko sira i lio nu pomesoa ni Pue Ala, mpane menomba sira eo-eona ai wengi-wengina i rara nu Tombi ni Pue Ala. Mpane i Pue Ala anu momeso i kadera kadatuaNa ina mokampai sira. 16 Bariamo sira ina maoro, bariamo sira ina mangkamara, ai bariamo sira ina nasimbaki nu eo anu makere, 17 lawi Ana Dimba anu momeso gompi i pomesoa nu datu ina mamporewu sira. Nanini sira lau i ue anu moparia katuwu. Mpane i Pue Ala ina moparisi ue matara anu moili lako i matara.”