Pampekatandai anu kapituna rabungkasi
8
1 Awetu nabungkasi nu Ana Dimba pampekatandai anu kapituna etu, ungangkidamo mandii i suruga kira-kira santongo jaa. 2 Kuita pitu malaeka anu meongko i lio ni Pue Ala. Malaeka anu pitu aretu rakiraka sira pitu ogu tatamburu. 3 Lako ni se etu, kuitamo sadua malaeka ntanina anu mangkeni sambua potunua dupa anu lako i bulawa,a dongka ai meongko i lio nu meja potunua popenomba. Mpane rakiraka ia maisi dupa bona natunu napopenomba, simbela-mbela ai pekakae nu ope-ope tau ni Pue Ala. Dupa aretu natunu i potunua dupa anu rababei lako i bulawa i lio pomesoa ni Pue Ala. 4 Tempona motunu dupa aretu, lako i pale nu malaeka etu mengkaoremo rambu nu dupa etu i lio ni Pue Ala simbela-mbela ai pekakae nu tau ni Pue Ala. 5 Roo awetu, malaeka etu mangalamo sambua potunua dupa anu tebabei lako i bulawa etu, mpane naisii ai apu anu naala lako i meja potunua popenomba, mpane naweduka lau i dunia. Lako ni se etu, kegumpatamo, kebanibimo, mpane kelinumo.Tatamburu anu pitu
Iba dua malaeka motawui tatamburura mombesasambei
6 Malaeka anu pitu aretu ni mpongone, sadua-sadua sira mopatoro tatamburura anu ina ratawuira. 7 Malaeka anu mpolinguruna motawuimo tatamburuna, mpane ungangkidamo ria uda anu mowua lako i langi, ai apu anu mogalo ai raa toamo i dunia. Etumo mpane sangkira tolu lako i dunia nakonimo nu apu, mopakarugi puu-puu nu kau ai ope-ope owo i sangkira tolu dunia etu.
8 Malaeka anu karoduana motawuimo tatamburuna, mpane kuita anu ewa sambua bulu mabose anu keapu. Bulu etu rawedukamo i rara nu tasi duduuna sangkira tolu lako i ue nu tasi tebaliki mewali raa, 9 mpane mamate sangkira tolu lako i ope-ope anu tuwu i rara nu tasi, mpane maropu sangkira tolu lako i ope-ope kapala anu ria i wongko nu tasi.
10 Malaeka anu katolu motawuimo tatamburuna, mpane ungangkidamo manawu lako i langi saogu betue mabose anu mambugi ewa sulo. Betue etu monawusingi sangkira tolu koro-koro ue ai ulu-ulu ue. 11 Sangana betue etu, iamo Mapai. Sangkira tolu lako i ope-ope ue mewali mapai, mpane mawori tau mamate lawi manginu sira ue anu mapai etu.
12 Malaeka anu kaiba motawuimo tatamburuna, etumo mpane ria anu mopakarugi sangkira tolu mataeo, wula ai betue. Mewali sangkira tolu pewangkara matontomo. Etumo mpane ane mabaa ai kawengi sangkira tolu lako i pewangkara etu, matonto.
13 Lako ni se etu kuita, ria sambaa tosi moto anu meloko i laerawa. Kuepemo tosi etu momoni mauni-uni, nauli, “Masurewu! Masurewu! Ina masurewu sira tau anu meari i dunia, lawi ane tolu malaeka anu kasopoana motawui luwu tatamburura, ria mani tolu mpangkana pepopesiasi anu ina morumpa sira.”