Tatamburu anu kalima ratawui
9
1 Roo awetu, malaeka anu kalima motawui tatamburuna, mpane ungangkidamo kuita saogu betue anu manawu lako i langi toa i dunia. Betue etu rakiraka pegili anu mobungkasi boboka kabe nu kamate anu baria tesoka kandalana. 2 Betue etu mobungkasi mpuumo boboka kabe nu kamate. Awetu nabungkasi, mensuwumo rambu anu maruminsi mpii porumukuna, ewa rambu nu apu anu mabose mpii. Eo ai laerawa mewali madedi nabalungkusi rambu nu apu anu lako i kabe nu kamate etu. 3 Lako i rara nu rambu etu, mensuwumo sira kakomba anu mendolu i dunia. Kakomba aretu rakiraka sira pesingki anu mampopantodisa tau, ewa pesingki nu kalajengking. 4 Kakomba aretu, baria sira rapaliu mopakarugi owo ba kau ba tuda-tuda. Anu pensani rapopesiasira, wule tau anu baria ria pampekatandai ni Pue Ala i wingkera. 5 Agaiana baria mbui sira rapaliu mampopate tau aretu. Anu rapaliuka sira, wule mampopesiasi tau aretu i rarana lima mbula. Kadua nu pesingki nu kakomba aretu ewa kamaduana pesingki nu kalajengking. 6 I rarana lima mbula etu, manusia mangkadelo dala bona mamate sira, agaiana baria sira pensani mamate. Rapenokara mamate, agaiana kamate karao lako si sira.7 Lensera kakomba aretu ewa lense nu dara anu rapensawii nu surudado lau mombeala. I woora ria anu ewa songko bulawa. Liora ewa lio nu manusia. 8 Wulura ewa wulua nu towawine, ngisira ewa ngisi nu singa. 9 Pondara natuko nu parewa anu ewa badu besi. Pomomoni nu kapira ewa pomomoni nu sangguruma kareta anu nadii nu dara anu tongora mombeala. 10 Ikura mesingki ewa pesingki nu kalajengking. I ikura etu, ria kuasa mampopesiasi tau anu baria ria pampekatandai ni Pue Ala i wingkera, i rarana lima mbula. 11 Ria datura anu moparentai sira. Datura etu, iamo malaeka anu mokampai kabe nu kamate. Sangana i rara basa Ibrani iamo Abadon. I rara basa Yunani, Apolion. Anu lempona, Toperugii.
12 Pepakasurewu anu mpolinguruna liumo. Agaiana ria mani rompangka pepakasurewu anu ina meunsu.
Tatamburu anu kaaono ratawui
13 Roo awetu, malaeka anu kaaono mbui motawui tatamburuna. Kuepe sambua wotu lako i iba suno meja potunua popenomba anu rababei lako i bulawa, anu i lio ni Pue Ala. 14 Nauli nu wotu etu i malaeka anu kaaono, “Nupawia sira malaeka anu iba anu tesilu i wiwi koro ue Efrat.” 15 Napawia mpuumo sira. Malaeka anu iba aretu rapasilolonga ami bona i pae, i wula, i eo ai i jaa anu rapakanotoka sira, pensani sira mampopate sangkira tolu lako i ope-ope tau. 16 Raulika aku kawori nu surudado anu modara luwu, rongatu juta dua.
17 I rara pampatongawa etu si aku, kuita sira surudado aretu ai dara anu rapensawiira. Surudado aretu, ope-ope sira mebadu besi. Badura mawaa ewa apu, malewau ewa langi, ai makuni mpii ewa watu belerang. Woo nu darara ewa woo nu singa, mpane lako i rara nu ngangara mensuwu apu, rambu ai belerang. 18 Sangkira tolu manusia mamatemo napopate nu tolu pesuku iamo: apu, rambu ai belerang anu mensuwu lako i ngudu nu dara aretu. 19 Kamakuasa nu dara aretu ria i ngangara ai i ikura. I ikura, ria anu ewa woo nu ule anu metilo. Ikura etu rapakera mampopesiasi manusia.
20-21 Agaiana awetu roo pepopesiasi etu, ria mani pelabia nu manusia anu baria mamate. Sira aretu, batena baria sira madota menonso lako i babeiara anu madaa. Baria sira madota mampenonsoi pepopatera, pedotira, pebualosira ai panangkara. Baria mbui sira mopawia penombara i seta ai i lense anitu anu rababei ai palera saduduara. Lense anitu etu rababei lako i bulawa, salaka, tambaga, watu ai kau. Lense anitu anu rababei aretu, baria sira meita, baria sira meepe, baria mbui sira molumako.