I Yohane mangita sadua malaeka anu mopatoro sampeka sura anu kokoi
10
1 Roo awetu, kuita sadua malaeka anu maroso mendolu lako i suruga. Malaeka etu nabalungkusi gawu, mpane woona natoleliki mparagia. Liona mewangka ewa eo, paana ewa arii anu keapu. 2 Paa kuanana nalongkoka i tasi, mpane paa kabeona nalongkoka i lore. I palena ria sampeka sura kokoi anu tebungkasi. 3 Malaeka etu monganga ewa pegoa nu singa. Roo ia monganga, gumpata anu pitu oguna momoni mauni-uni mosonoi ia. 4 Tongo nu gumpata aretu mololita, awetu ina kuuki pololitara, ungangkidamo kuepe sambua wotu lako i suruga anu mangulika aku, “Inee nuuki etu! Sangangaa nuwuni apa anu rauli nu gumpata anu pitu ni mpongone.”5 Roo awetu, malaeka anu kuita ni mpongone, anu melongko i tasi ai i lore, moongkomo pale kuanana i langi, 6 mpane mosumpa i rara sanga ni Pue Ala anu tuwu duduuna kasae-saeana, anu mampopewali langi, dunia, tasi ai ope-ope isina. I posumpana, nauli ewa ei, “Tempona bariamo teginsu! 7 Ane malaeka anu kapitu motawuimo tatamburuna, i tempo etu i Pue Ala ina mopabukei dandiNa anu masaemo tewunikai, mangula apa anu Naulimo ni banimpia i tuduaNa sira, iamo nabi-nabi anu mopadongka NgkoraNa.”
8 Roo awetu, wotu anu kuepe lako i suruga ni mpongone mangulika mbuimo aku, nauli, “Laumode mangala sura anu tebungkasi, anu ria i pale nu malaeka anu melongko i tasi ai i lore!”
9 Lau mpuumo aku i malaeka etu, mpane kuulika, “Kiraka aku sura anu kokoi etu.”
Naulika aku, “Doamode mpane konimode. Ane i ngangamu, mamomi ewa tinasa. Agaiana awetu i rara nu taimu, mepulei nuepe.”
10 Kuala mpuumo sura etu lako i pale nu malaeka mpane kukoni. I ngangaku, minana mamomi ewa tinasa, agaiana awetu i rara nu taiku, mepulei kuepe. 11 Roo awetu, naulika aku, “Sangangaa nupadongka lolita ni Pue Ala, kono i apa anu ina Nababei i kadatua-kadatua, i datu-datu, i maisi pemulea, i sinangka basa.”