Rodua sabi ni Pue Ala
11
1 Lako ni se etu, rakiraka aku sangkau lai ewa popesoka, mpane raulika aku, “Laumode mosoka Tombi ni Pue Ala ai meja potunua popenomba. Nuimba sangkia kaworira tau anu menomba i se etu. 2 Agaiana inee nusoka karawaa anu ria i raoa nu Tombi ni Pue Ala. Lawi karawaa etu, rapatimamaka sira tau anu baria manginsani i Pue. Sira anu ina molongko-longko kota anu magali i rarana iba mpulu rombula. 3 I tempo etu, ina Kutudu rodua sabiKu lau mopadongka pololitaKu i rarana sansobu rongatu aono mpulu eo kasaena,a ai sabiKu aretu ina mesampi karu mewali tanda kapari rarara.”4 Sabi anu rodua aretu, rapandiri ewa rompuu kau saitun ai roogu pambolia sulob anu meongko i lio ni Pue Ala, Pue nu sumalele dunia. 5 Makuasa sira mampopensuwu apu lako i rara nu ngangara mampopate ba ima ngkida anu mampenoka mobabei daa si sira. Etumo mpane kasaliu mamate ope-ope iwalira anu mai sira meewa. 6 Ria kuasara motuko langi bona ntena toa uda, tongora mopadongka lolita ni Pue. Makuasa mbui sira i ope-ope ue. Ue pensani rapopewali raa. Ria mbui kuasara mopakasusa dunia ai mampopengaa pepopesiasi, mangula peundeara.
7 Ane sopomo bagora mobambari Ngkora ni Pue, ina dongka sambaa binata maseke, anu mensuwu lako i kabe nu kamate anu baria tesoka kandalana. Binata anu maseke etu, ina moewa sira ai ina monangi sira mpane mampopate sira. 8 Awetu roomo rapopate sabi anu rodua aretu, wotowatara rapogeaka teduli i tongo dala nu kota anu mabose. Kota anu mabose etu, iamo kota popakua nu Puera anu rapandiri ewa kota Sodomo ai tana Masiri ni banimpia. 9 Tau anu lako i sumalele dunia, lako i ope-ope kadatua, lako i ope-ope pemulea ai sinangkana basa anu mangita wotowatara teduli i tongo dala, rapogeakara ewa etu i rarana tolu eo santongo, lawi baria rakirara rapaiwu. 10 Tau i dunia anu baria mampenonsoi dosana, ina mampokatono kamate nu sabi anu rodua aretu. Ina mosusa sira mpane mombehadiangi sira, lawi mamatemo sira nabi anu rodua aretu anu mampopesiasi sira.
11 Agaiana awetu liumo tolu eo santongo, dongkamo Inosa lako si Pue Ala anu mopatuwu rodua sabi aretu. Mewali mengkawangumo sira mpane meongko. Lako ni se etu, mawulungamo sira ope-ope tau anu mangita apa anu mewali. 12 Roo awetu, raepemo sambua wotu lako i suruga anu mololita mauni-uni, moronde sira anu rodua aretu, Nauli, “Pengkaoremode komi mai!” Teore mpuumo sira lau i suruga nabalungkusi nu gawu, ai i pengkaorera etu, rasabiki nu ope-ope iwalira. 13 Tempo etu, ungangkidamo kelinu mabose. Sampulu parasee lako i kota etu magero, mpane nakeningka kelinuna etu, pitu nsobu tau mamate. Mawulunga mpuumo sira tau ntanina, etumo mpane motoia sira i Pue Ala anu i suruga.
14 Mewali, liumo pepakasurewu anu karompangkana. Agaiana ria mani sampangka pepakasurewu anu ina meunsu.
Malaeka anu kapitu motawui tatamburuna
15 Malaeka anu kapitu motawuimo tatamburuna. Ai ria sira anu monganga-nganga masisimbuku i rara nu suruga, raulira:
“Ei-ei! Ope-ope kadatua i dunia
naparenta nu Pueta,
ai naparenta nu Datu Topesorema anu napelisimo ni Pue Ala,
bona meparenta duduuna kasae-saeana.”
16 Mewali tadulako-tadulako anu rompulu iba anu momeso sira i pomesoara i lio ni Pue Ala, molingkudumo sira motumpa menomba si Ia, 17 raulira:
“Pue Ala, melumbu kabosena kuasaMu lako i ope-opena.
Ria Iko mpolinguruna ai ria Iko ei-ei.
Kiuli maisi kalompena si Iko, Pue,
lawi nakeningkamakuasaMu monangi Iko iwaliMu,
ai mepuumo Iko meparenta.
18 Ope-ope tau anu baria sira manginsani Iko,
marumpu sira.
Agaiana dongkamo tempona Nupopensuwuka sira karumpuMu.
Dongkamo tempona Nubotusi kara-kara nu tau anu mamate.
Dongkamo tempona Nusurungi babeia nu tauMu anu malompe:
i nabi-nabi anu mobambari NgkoraMu,
i tau anu mepotuu si Iko,
ai i ope-ope tau anu mobila Iko,
malompe anu mabose katuwura ba anu kokoi katuwura.
Dongkamo tempona Nupakaropu tau anu mopakaropu dunia ei.”
19 Lako ni se etu, tebungkasimo Tombi ni Pue Ala i suruga, mpane i rara nu TombiNa raita Peti Podandi.c Mobini mpuumo banibi, mopereremo gumpata, kelinu, mpane mendolumo uda watu anu marimbuku.