Sadua towawine ai sambaa naga
12
1 Mewali, tongawamo i langi sambua tanda anu mewulii, iamo ria sadua towawine anu mamposampi eo, ai anu meongko i wongko wula. I woona ria songko anu rababei lako i sampulu roogu betue. 2 Towawine etu tongona mampaiwoto. Monganga-nganga ia nakeningkamaparina naepe lawi ina moana ia.3 Ria mani sambua tanda anu raita i suruga. Ria sambaa naga anu mawanta. Naga etu mabose mpii, mowoo pitu mbuana mpane motondu sampulu. Woona anu pitu aretu, ope-ope mopake songko datu. 4 Naga etu mowentokamo ikuna, nadii sangkira tolu betue i langi mpane natende sira i wongko dunia. Meongkomo ia i lio nu towawine anu ina moana etu, bona naome Anana anu ina mensuwu. 5 Moana mpuumo towawine etu, sadua tomoane. Anakoi etu, Iamo anu ina moparentai sumalele dunia ai rosoNa anu ewa karoso nu lai besi. Mpane i tempona Anakoi etu ina naome nu naga, raalamo Ia mpane rakeni lau si Pue Ala, ai i lio nu pomesoa ni Pue Ala. 6 Roo awetu, towawine etu melangkamo lau i pada lori, mpane meari i pearia anu napatimamaka ni Pue Ala. I pearia etu, rakadipuraka ia i rarana sansobu rongatu aono mpulu eo kasaena.
7 Lako ni se etu, mewalimo pombeala anu mabose i suruga. Tadulako nu malaeka anu rasanga i Mikael ai singka malaekana sira, moewa naga etu. Mpane naga etu radurei mbui nu singka malaekana sira. 8 Agaiana naga etu ai malaekana sira, ranangi. Naga etu ai malaekana sira bariamo rapaliu meari i suruga. 9 Naga anu mabose etu, anu rauli mbui ule anu matuamo, ia eimo Datu nu Seta ba Datu nu sinangka anu madaa, anu mopakanawu tau anu meari i sumalele dunia, ratende ia lako i suruga toa i dunia simbela-mbela ai malaekana sira.
10 Roo awetu, kuepe sambua wotu i suruga anu mololita mauni-uni, nauli:
“Dongkamo tempona Pueta i Pue Ala
mokiraka katuwu malompe i tauNa,
mampopetuduka kuasaNa,
mepuumo Ia meparenta mewali Datu.
Dongkamo tempona Datu Topesorema anu napelisi ni Pue Ala
ina mopatongawa kamakuasaNa.
Lawi Datu nu Seta ratendemo lako i suruga;
iamo anu mosalai liliu sira pokata sampepepotuuta i lio nu Pueta i Pue Ala kawengi mabaa.
11 Pokata anu sampepepotuuta aretu monangimo Datu nu Seta.
Menangi sira ai kuasa nu raa Ana Dimba.
Menangi sira lawi mobambari liliu sira Ngkora ni Pue Ala.
Menangi sira lawi nauda sira rapopesiasi ba rapopate,
batena tetida sira lako i pepotuura.
12 Etumo mpane matonomo komi, komi anu meari i suruga.
Agaiana marugi komi, komi anu meari i lore ai tasi,
lawi Datu nu Seta mendolumo lau si komi.
Maruminsi kasodona,
lawi nainsani tempona bariamo masae.”
13 Nainsanimo nu naga etu karatendenamo i dunia, mewali nawulaimo towawine anu moana Anakoi tomoane etu. 14 Agaiana towawine etu, rakiraka rombua kapi anu mabose, ewa kapi nu tosi moto. Etumo mpane melokomo ia lau i pada lori i pearia anu rapatimamaka ia, bona ntena napopangkia nu naga etu. Ni se etu, rakadipuraka ia i rarana tolu mpae santongo kasaena. 15 Lako ni se etu, naga etu mosapurukamo ue anu maisi lako i ngangana mototoi towawine etu, bona malome. 16 Agaiana ungangkidamo dunia maboka moome ue anu natapuruka nu naga etu, motulungi towawine etu. 17 Maruminsi kasodo nu naga etu, i towawine etu. Etumo mpane laumo ia mampombealaka pemulea nu towawine etu anu ntanina, anu mampeulai parenta ni Pue Ala ai anu mopangaku ka i Yesuna Puera. 18 Roo awetu, naga etu meongko i wiwi nu tasi.