Sambaa binata anu maseke mensuwu lako i tasi
13
1 Roo awetu, kuita sambaa binata anu maseke mensuwu lako i tasi. Tonduna sampulu mbua, mpane woona pitu ogu. I ope-ope tonduna, mopake songko nu datu, mpane i ope-ope woona teuki sanga-sanga anu mopapakoi i Pue Ala. 2 Binata anu kuita etu, lensena ewa lense nu binata macan tutul, agaiana paana ewa paa nu berua mpane nguduna ewa ngudu nu singa.a Mpane naga etu, mokiraka poparentana, karosona ai kuasana anu mabose mpii, i binata anu maseke etu. 3 I saogu woona anu pitu etu, kuita ria ewa mabela anu ina nakeni mamate, agaiana maosamo. Tau i sumalele dunia, mawuli mpuu sira mangita binata anu maseke etu, etumo mpane meulamo sira si ia. 4 Menombamo sira i naga, lawi ia anu mokiraka kuasa i binata anu maseke. Mpane menomba mbui sira i binata etu, raulira, “Mabose mpuu kuasana binata ei! Imapae anu simbela kamakuasana? Imapae anu pensani moewa ia?”5 Binata anu maseke etu napogeaka ni Pue Ala mampololita lolita anu mengkaiwongko ai anu mopapakoi i Pue Ala. Rapogeaka mbui meparenta ai mobabei peundeana i rarana iba mpulu rombula kasaena. 6 Mpane mepuumo ia mopapakoi i Pue Ala ai sanga ni Pue Ala, ewa etu mbui pearia ni Pue Ala i suruga ai ope-ope anu meari i suruga. 7 Rapaliu mbui ia mampombealaka sira tau ni Pue Ala mpane monangi sira. Mpane rapogeaka ia mokuasai tau i sumalele dunia, lako i ope-ope kadatua, ope-ope pemulea ai sinangkana basa. 8 Ope-ope tau anu meari i dunia menomba si ia, ngkalina ngkida tau anu teuki sangara i rara nu Sura Ngkatuwu lako baria mani dunia rateru, baria sira menomba si ia.
9 Mewali, ima komi anu mangepe, nipetingai mpii lolita ei:
10 Tau anu tepakanoto karatawanira,
batera ina ratawani.
Tau anu tepakanoto karapopatera ai guma,
batera ina rapopate ai guma.
Etumo mpane tau ni Pue Ala, sangangaa tetida i rara nu kapari ai sangangaa maroso pepotuura.
Binata anu karombaana mensuwu lako i rara nu tana
11 Roo awetu, kuita mbuimo sambaa binata ntanina anu mensuwu lako i rara nu tana mai. Tonduna rombua ewa tondu nu ana dimba, agaiana wotuna ewa wotu nu naga. 12 Mpane ope-ope kuasa lako i binata anu dongka mpolinguruna, napopolumako nu binata karombaana etu i lio nu binata anu mpolinguruna. Binata anu karombaana etu, mopari-pari ope-ope tau anu meari i dunia bona menomba sira i binata anu mpolinguruna, anu maruminsi belana agaiana maosamo. 13 Binata anu karombaana etu, mobabei maisi tanda kuasa. I lio nu tau wori, napariamo apu anu lako i langi mai. 14 Tanda kuasa etu, nakira nu binata anu mpolinguruna. Ai kuasa etu, napakanawumo sira tau anu meari i dunia. Natudumo sira mobabei sambua anitu tanda pebilara i binata anu mpolinguruna. Binata anu mpolinguruna etu, iamo binata anu rabelai ai guma, agaiana batena tuwu. Anitu anu rababeira etu, iamo watu anu rababei ewa lense nu binata anu mpolinguruna. 15 Binata anu karombaana rakiraka kuasa mokiraka inosa i watu anu rababei ewa lense nu binata etu, duduuna pensani mololita. Ima ngkida anu baria menomba i watu etu batena rapopate. 16 Ope-ope tau, malompe anu mabose katuwura ba anu kokoi katuwura, anu pebuku ba anu mesiasi katuwura, anu batua ba anu baria batua katuwura, napari-pari sira bona modoko tanda nu binata etu, i pale kuanara ba i wingkera 17 Baria ria sadua tau anu pensani mobaluki ba mobalu-balu ane baria ria tanda etu i palena kuanana ba i wingkena. Tanda nu binata etu, iamo sanga nu binata anu mpolinguruna, ba tanda angka anu lempona sangana.
18 Sangangaa taperade kapande lako si Pue Ala bona tainsani lempona lolita ei. Ima anu matopa, pensani sira moimba ai manginsani lempona angka nu binata etu. Lawi angka etu, iamo sanga nu sadua tau. Angka etu iamo: aono atu aono mpulu aono.