Ana Dimba ai topeulaNa i Bulu Sion
14
1 Roo awetu, kuita Ana Dimba meongko i wongko Bulu Sion,a simbela-mbela ai topeulaNa anu sangatu iba mpulu iba nsobu. I wingkera, teuki sanga nu Ana Dimba ai sanga nu TuamaNa. 2 Ria kuepe pomomoni anu mabose lako i suruga, ewa powoo nu ue anu mabose, karuminsina ewa pomomoni nu gumpata. Pomomoni anu kuepe etu, ewa pomomoni nu kecapi mbui anu rakawi nu tau. 3 Moduluamo sira sampangka dulua anu bou i lio pomesoa nu datu ai i lio nu iba mpangka pinatuwu ai tadulako anu motoleliki sira pomesoa kadatua etu. Duluara baria pensani rapegurui nu tau ntanina, batena ngkida anu sangatu iba mpulu iba nsobu etu anu manginsani, lawi dosara nasoremamo nu Ana Dimba. 4 Magali katuwura ai baria sira sambela sampapaturua ai towawine. Imba kalauaana Ana Dimba etu, i se etu mbui kalauaara. Siramo anu nasorema nu Ana Dimba lako i olo nu ope-ope tau i dunia. Ewa tau anu mosusu wua nu tuda-tudana anu mpolinguruna si Pue Ala, sira mbui anu rasusu ewa popenomba anu mpolinguruna si Pue Ala ai i Ana Dimba. 5 Baria sira modongko, ai baria ria salara.Tolu malaeka anu mampopaingaka tau kono i eo pobotusi
6 Mpane kuita mbuimo sadua malaeka ntanina anu meloko i laerawa. Malaeka etu mangkeni Ngkora ni Pue Ala anu baria ria katebalikina duduuna kasae-saeana. Ngkora ni Pue Ala etu, napadongka i manusia anu meari i dunia, i ope-ope kadatua, ope-ope pemulea ai i sinangka basa. 7 Malaeka etu mololita napakauni, nauli, “Mengkoru komi si Pue Ala ai nitoiamo kamakuasaNa. Lawi dongkamo tempona pobotusiNa. Menombamo komi si Pue Ala anu mampopewali langi, dunia, tasi ai ope-ope ulu ue.”
8 Awetu bariamo ria malaeka anu mpolinguruna, maimo malaeka anu karoduana, nauli, “Mageromo! Mageromo kota Babelib anu tolele sangana lako ni banimpia! ToBabeli aretu, mobawai sira tau i sumalele dunia manginu apa anu melangui. Lempona, toBabeli mobawai sira tau ntanina bona mampeulai babeiara anu mepakaea.”
9 Awetu bariamo ria malaeka anu karoduana, maimo malaeka anu katolu, napakauni mololita, nauli, “Ima-ima anu menomba i binata ai i watu anu rababei ewa lense nu binata etu, ai ima-ima anu modoko tanda nu binata etu i wingkera ba i palera, 10 maruminsi karumpu ni Pue Ala si sira ai baria ria kamalulu nu raraNa, ewa tau anu manginu anggoro anu mapai mpii, anu baria ria mogalo saudi galona. Ope-ope tau aretu, ina rapopantodisa i rara nu apu ai belerang i lio nu malaekaNa aretu ai i lio nu Ana Dimba etu. 11 Rambu lako i apu anu mampopesiasi sira ina mengkaore liliu duduuna kasae-saeana. Malompe mabaa ba kawengi, tau aretu ina rapopesiasi liliu sira, lawi menomba sira i binata etu, ai i watu anu rababei ewa lense nu binata etu, ai modoko sira tanda sanga nu binata etu.”
12 Etumo mpane tau ni Pue Ala sangangaa tetida sira i rara nu kapari, mampeulai liliu sira parenta ni Pue Ala, mpane mepotuu liliu sira si Yesu.
13 Roo awetu, kuepe mbuimo sambua wotu lako i suruga anu manguli, “Ukimode ei: Mepuu ei-ei, matonomo sira tau anu mepotuu liliu si Pue, duduura mamate.”
Nauli nu Inosa Magali, “Mamonso mpuu! Lawi tau aretu, manotomo kabariaramo ina mantodisa, ai batera ina mansumba wua nu babeiara.”
Isi nu dunia rapepae
14 Lako ni se etu, kuitamo gawu anu bula. Mpane i wongko nu gawu etu, momesomo sadua tau anu lenseNa ewa Ana Manusia. I wooNa ria songko kamakuasa anu rababei lako i bulawa, mpane i paleNa mopatoro samata kandao anu mataru. 15 Roo awetu, ria sadua malaeka ntanina anu mensuwu lako i Tombi ni Pue Ala. Naulika mauni-uni i Tau anu momeso i wongko nu gawu etu, nauli, “Sombemode! Lawi dongkamo tempona mepae. Mongkomo isi dunia.” 16 Lako ni se etu, Tau anu momeso i wongko nu gawu etu mosombe mpuumo Ia. Napepaemo isi dunia.
17 Roo awetu, kuita mbuimo malaeka ntanina anu mensuwu lako i Tombi ni Pue Ala i suruga. Napatoro mbuimo samata kandao anu mataru. 18 Mpane dongka mbuimo sadua malaeka anu ntanina, anu lako i meja potunua popenomba, anu makuasa i apu. Malaeka etu mololita mauni-uni i malaeka anu mopatoro kandao anu mataru, nauli, “Sombemode wua anggoro anu i dunia, lawi mongkomo wuana.” 19 Malaeka etu mosombe mpuumo wua anggoro lako i puuna, mpane natende i rara nu popieaa anggoro anu mabose. Popieaa anggoro etu, lempona karumpu ni Pue Ala anu mokarumpui tau anu madaa. 20 Mewali, wua nu anggoro etu rapie i raoa nu kota, mpane lako i popieaa etu, moilimo raa ewa poili nu ue anu mabose. Kakarao nu poiliana kira-kira tolu atu kilo mete ai kandalana dongka i ade nu dara.