Dulua nu topenangi
15
1 Roo awetu, kuita mbuimo i langi sambua tanda anu mewulii mpii iamo: ria pitu malaeka ai pitu mpangka pepopesiasi anu kasopoana. Ane sopomo pepopesiasi aretu, opemo karumpu ni Pue Ala i tau i dunia. 2 Mpane kuita ria anu ewa tasi kaembana, lensena ewa kaca mogalo apu. Mpane i wiwi nu tasi anu ewa kaca etu, kuita mawori tau meongko. Sira aretumo anu monangi binata etu ai watu anu rababei ewa lense nu binata etu, ai tanda angka nu binata etu, anu lempo nu sangana. Tau anu menangi aretu, mopatoro sira kecapi anu nakiraka sira ni Pue Ala. 3 Moduluamo sira, mampodulua dulua ni nabi Musa,a tudua ni Pue Ala ni banimpia, ai dulua pebilara i Ana Dimba. Awei duluara:“O Pue Ala, mabose ai malompe mpii pobagoMu,
melumbu kuasaMu lako i sinangkana!
Ope-ope anu Nubabei, batena manoto ai mamonso.
Ikomo Datu nu ope-ope tau i dunia.
4 Pue, imapae anu baria maeka si Iko?
Imapae anu baria motoia sangaMu?
Lawi Iko ngkida anu magali.
Ope-ope tau batena menomba si Iko,
Lawi tongawamo kamanoto nu pobotusiMu i sinangkana.”
Malaeka mangkeni pitu mbua pambolia anu moisi pepopesiasi ni Pue Ala
5 Roo awetu, kuita tebungkasimo Tombi ni Pue Ala anu i suruga, ai Bambaru Penombaa si Pue Ala ria i rarana.b 6 Mensuwumo pitu dua malaeka lako i Tombi ni Pue Ala etu. Mangkeni sira pitu mpangkana pepopesiasi. Sampira rababei lako i bana anu bula ai mengkila-ngkila. Pondara tetuko ai bana anu rababei lako i bulawa. 7 Tempo nu malaeka anu pitu aretu mensuwu, sambaa lako i iba mpangka pinatuwu aretu, mokiraka malaeka aretu pitu mbua pambolia lako i bulawa anu moisi karumpu ni Pue Ala, iamo i Pue Ala anu tuwu duduuna kasae-saeana. 8 Ni tempo etu mbui, Tombi ni Pue Ala i suruga ungangkidamo buke ai rambu anu mensuwu nakenimpeawa ai nakeningkamakuasa ni Pue Ala. Baria ria sadua anu pensani mesua i rarana, ane baria mani roo pitu mpangka pepopesiasi anu rakeni nu malaeka anu pitu etu.