Karumpu ni Pue Ala rabubu i dunia
16
1 Kuepe mbuimo sambua wotu anu mololita mauni-uni lako i rara nu Tombi ni Pue Ala i malaeka anu pitu, nauli, “Nibubumode karumpu ni Pue Ala i dunia, lako i pamboliana!” 2 Lau mpuumo malaeka anu mpolinguruna, mobubu karumpu ni Pue Ala lako i pamboliana, i wongko dunia. Ungangkidamo mensuwu bisu anu maruminsi kaduana i tau anu ria tanda nu binata etu, ai i tau anu menomba i watu anu rababei ewa lense nu binata etu.3 Malaeka karoduana mobubu mbuimo karumpu ni Pue Ala lako i pamboliana i tasi. Ue nu tasi etu mewali ewa raa nu tomate, duduuna mamate ope-ope anu tuwu i rara nu tasi.
4 Malaeka anu katolu mobubu mbuimo karumpu ni Pue Ala lako i pamboliana i ope-ope koro ue ai i ope-ope ulu ue, duduuna ope-ope ue etu mewali raa. 5 Roo awetu, kuepe sadua malaeka anu makuasa i ue anu manguli:
“Pue Ala anu magali,
anu ria ami lako mpolinguruna,
ai anu ria ei-ei.
Manoto mpuu pesukuMu ei,
6 lawi tau anu i dunia
mampopate sira tauMu anu mawori;
raa nu nabiMu sira rabubu.
Etumo mpane Nubalikimo ue i dunia mewali raa,
mpane Nupanginui topepopate aretu ai raa.
Sintoto mpuu pesukuMu si sira!”
7 Roo awetu, kuepe sambua wotu lako i meja potunua popenomba anu manguli, “O Pue Ala, batena mamonso ai manoto pesukuMu. Melumbu kuasaMu lako i sinangkana!”
8 Lako ni se etu, malaeka anu kaiba mobubu mbuimo karumpu ni Pue Ala lako i pamboliana i eo, mpane eo rakiraka kuasa mopakamampu manusia ai kamakulana anu maruminsi. 9 Mamampu sira tau lako i kamakula nu eo, ewa kamampu nu manusia i apu, ai mopakoi sira i Pue Ala, lawi i Pue Ala anu makuasa i pepopesiasi etu. Naudapae awetu, baria sira madota menonso lako i dosara, ai baria sira madota motoia sanga ni Pue Ala.
10 Malaeka anu kalima mobubu mbui karumpu ni Pue Ala lako i pamboliana i pomesoa kadatua nu binata etu. Sumalele kadatuana, ungangkidamo madedi, mpane tau sira mokikimo dilara nakenimpantodisara. 11 Lako ni se etu, mopakoi sira i Pue Ala anu i suruga nakeningkamaduara ai bisu etu. Agaiana baria sira menonso lako i babeiara anu madaa.
12 Roo awetu, malaeka anu kaaono mobubu mbuimo karumpu ni Pue Ala lako i pamboliana i ue mabose anu rasanga koro ue Efrat. Mautimo koro ue etu, duduuna ria dala anu pensani rapoliungi nu datu lako mbai pensibea eo i tempora mai mombeala. 13 Mpane kuita lako i ngudu nu naga ai lako i ngudu nu binata ai lako i ngudu nu nabi anu mepakanawu etu, mensuwu tolu mpangkana kuasa anu madaa anu ewa toda lensera. 14 Sira aretu iamo kuasa-kuasa anu madaa, anu moparia anu mewulii. Tolu kuasa anu madaa aretu, lau sira i ope-ope datu i sumalele dunia, ragulu sira bona mombeala i eo anu mabose, iamo eo ni Pue Ala anu melumbu kamakuasaNa lako i ope-opena.
15 Nauli ni Pue Yesu, “Nipetingai! Ungangkidamo dongka Aku, ewa kadongka nu topanangka. Matono mpuu sira tau anu mainga-inga ai anu mangkeni liliu sampira. Ane dongka Aku luwu, baria sira ina molumako meloa ai baria sira ina maea, lawi matimama sira Kukadongkai.”
16 Mewali kuasa anu madaa aretu, mogulumo sira datu-datu ai surudadora lako i sumalele dunia, i pearia anu rasanga i rara basa Ibrani: Harmagedon.
17 Roo awetu, malaeka anu kapitu mobubu mbuimo karumpu ni Pue Ala i laerawa, lako i pamboliana. Mpane kuepe sambua wotu anu mololita lako i pomesoa nu datu, anu i rara nu Tombi ni Pue Ala i suruga, Nauli mauni-uni, “Sopomo!” 18 Lako ni se etu, kegumpatamo, kebanibimo, ai kelinumo. Mepuu i pewalina manusia i dunia duduuna ei-ei, baria mani ria linu anu ewa etu kamarimbukuna. 19 Kota anu rasanga Babeli mabokamo mewali tolu mboka, mpane mageromo kota-kota i sumalele dunia. I Pue Ala mosurungi dosa nu tumpu kota Babeli anu mabose. Etumo mpane napari-pari sira ni Pue Ala manginu anggoro. Anggoro etu lempona karumpu ni Pue Ala anu maruminsi mpii. 20 Ungangkidamo matonto ope-ope lewuto i tasi, ai bariamo ria bulu. 21 Wua uda anu ewa watu kabosena, manawu lako i langi monawusingi manusia. I rarana saogu, kira-kira lima mpulu kilo kamantimina. Etumo mpane tau sira mopakoi sira i Pue Ala, lawi maruminsi mpuu karapopesiasira etu.