PepopeitakaNa anu katolu
Kota Babeli rapandiri ewa sadua towawine anu mapobalu wotona
17
1 Roo awetu, sadua lako i malaeka anu pitu anu mopatoro pitu pambolia karumpu ni Pue Ala etu, mai si aku, naulika aku, “Mai iko, ina kupopeitaka iko adiwa karasukuna towawine anu paka mampobalu wotona. Towawine etu lempona kota anu mabose anu rawangu gompi i koro-koro nu ue. 2 Datu-datu i dunia mobabei sira anu merikati ai towawine etu, ai ope-ope tau anu meari i dunia napanginui sira ai panginu anu melangui, lawi nabawai sira mampeulai babeiana anu merikati.”3 Nakuasai aku nu Inosa Magali, mpane malaeka etu mangkeni aku lau i pada lori. Ni se etu kuita sadua towawine anu mensawi i sambaa binata. Binata anu napensawii etu, mawanta mpii. I sumalele wotona teuki lolita pepapakoi si Pue Ala. Woona pitu ai tonduna sampulu mbua. 4 Towawine etu mebadu makamumu ai mawaaga mpii anu raparewai bulawa, mutiara ai paramata anu masuli balukina. Mopatoro ia sambua mangku bulawa. I rara nu mangku bulawa etu, isina buke ai sinangka babeiana anu merikati ai madaa. 5 I wingkena, teuki sanga anu tewunikai lempona. Awei ukina, “Kota Babeli anu mabose etu. Tina nu ope-ope towawine anu mapobalu wotora ai puu nu babeia anu madaa i dunia.” 6 Kuita towawine etu, malangumo manginu raa nu tau ni Pue Ala ai raa nu tau anu mopangaku ka i Yesuna Puera.
Mawuli mpuu raraku mangita towawine etu. 7 Lako ni se etu, malaeka anu mangkeni aku mangulika aku, “Mangkiada mpane nupowuli? Bariapae nuinsani lempona towawine etu ai binata anu napensawii? Mewali, ina kupakanotoka iko lempona. Binata etu, mowoo pitu ai motondu sampulu mbua. 8 Ni banimpia binata etu tuwu mani, agaiana ei-ei bariamo ria, agaiana ina mensuwu mpesola ia lako i kabe nu kamate anu baria tesoka kandalana. Mpane roo awetu, ina rasuku mamate ia. Tau anu meari i dunia anu baria teuki sangara i rara nu Sura Ngkatuwu lako baria mani dunia rateru, ina rapowulira mangita binata etu. Lawi ni banimpia binata etu tuwu, ei-ei bariamo ria, agaiana sambela tempo ina dongka mpesola.
9 Sangangaa tapepekiri lompe bona tainsani lempona lolita ei. Woo nu binata anu pitu etu, lempona pitu ogu bulu, pomesoa nu towawine etu. Woo anu pitu etu, lempona mbui datu anu pitu. 10 Lima lako i datu anu pitu aretu, manawumo sira. Sadua tongona mani meparenta, sadua baria mani mepuu meparenta. Ane dongka luwu, ina meparenta agaiana sampalai ngkida. 11 Sadua lako i datu anu pitu ni mpongone ina mai mpesola bona meparenta. Iamo binata anu tuwu ni banimpia ai anu bariamo ria ei-ei. Ina mai mpesola ia mewali datu anu kawaluna. Agaiana kasopoana datu etu, batena rasuku duduuna kasae-saeana.
12 Tondu anu sampulu anu nuita ni mpongone, lempona sampulu datu anu baria mani mepuu meparenta. Datu anu sampulu aretu, ina rakiraka sira tempo meparenta simbela-mbela ai binata etu, agaiana poparentara sajaa ngkida kasaena. 13 Datu anu sampulu aretu, sampepekiri sira motulungi binata etu. Ope-ope karosora ai kamakuasara ina rakiraka i binata etu. 14 Ina mampombealaka sira Ana Dimba. Agaiana Ana Dimba ai ope-ope tauNa ina monangi sira, lawi Iamo Tua lako i ope-ope tua ai Datu lako i ope-ope datu. Ope-ope tauNa aretu anu Narondemo ai anu Napelisimo, ai anu meula liliu sira si Ia.”
15 Nauli mbui nu malaeka etu si aku, “Koro-koro ue anu nuita ni mpongone, anu napomesoi nu towawine etu, lempona tau anu lako i sumalele dunia, tau lako i ope-ope kadatua ai sinangkana basa. 16 Ane dongka tempona, binata ai datu anu sampulu aretu ina mokasisi towawine anu madaa babeiana. Ina rarampakira sinangka anu natumpui nu towawine etu, mpane rapopeloa ia. Isina ina rakonira, mpane isina anu baria rakonira ina rasuwera. 17 Mpane apa anu rababeira etu, batena tunggaia ni Pue Ala. Lawi i Pue Ala mampopokale rara nu datu aretu bona mampopolumako sira tunggaiaNa. Etumo mpane datu aretu, sampepekiri sira mokiraka kuasa poparentara i binata etu, bona tepabukei mpuu apa anu napadongka ni Pue Ala. 18 Mewali, towawine anu mampobalu wotona anu nuita etu, lempona kota anu mabose etu, anu moparentai ope-ope datu i dunia.”